Ayịsaya 65 - IWE ỌNỊNỊ

¹ Ẹnẹyịmavara kà: Mê tenyi ẹngụ ọyịtụ ohi aduwa aza amị, ama ẹnịnị ẹ yị mẹ̀ aduwa. Mê tenyi ka ẹnịnị è re mi, ama ẹnịnị ẹ yị hyakụ si mi. Mê tenyi ẹngụ ọyịtụ anẹkụra ọnọnị ohi ka, “Ẹmị yọ; mị vaa gụ wụ nịnị ụvọ, ama ẹnịnị ẹ yị hị́ mị.”

² Aza amị vị anayọkatẹngụ anaā mẹ̀ ịsa ẹnẹ ẹ̀ yị vọrọ, dị ẹ zị oze ẹnịnị, ama mê yi tenyi ẹngụ ọ̀yị za wa gụrị ẹngụ.

³ Ụhị́ ẹ yị ma nyị wa, vị ẹẹ̄ mẹ ayịị kụ́ mị nị. Ẹnịnị vị anaā mẹ̀ ịsọvọ hi ori ịnị ụbazị ẹnẹ dà yị ori, dị ẹyaa rị eturare ịra ịrẹsụ ụta ana a dà yị ori.

⁴ Ịrahụ-ịrahụ vị ẹnẹ enee hi ịnị ụtẹha ọnịrị ụsị ene e ne oku hi. Dị ẹyaa họ̀ oku nịnị usirẹyị. Ẹ yaa rị uye ụra ọnịrị ẹpẹ ana a sị uye ana a sị mẹ̀ ịsọvọ hi ori ne.

⁵ Ẹnịnị vanaā kà a yị aza ana vọ ka, “kana kwooze, a sị ụ sị ụvọ kanyị yị, ka aza ọnịnị ị vị̀ nị.” Ẹmịrị ẹngụ aza ẹnẹẹ ẹ yị zụ mẹ ọnya. Màa kụ ayịị hi wa, vị ọ sị mẹẹ anka ịra ene è yi me mí avọọ nị.

⁶ Me ree tenyi ẹngụ ụya ẹnịnị, a sị ọkarẹyị ẹnịnị chẹrẹ tịtẹ ọvịdị amị. Mẹ yị vaa sị eyii hụụnị ịsị ẹ mẹ, mi vee sí wa atọ.

⁷ Ẹnẹyịmavara kà, “Mi vee si wa atọ ịvị ẹnịnị ọnịrị ịvị oni ohiku ẹnịrị rị. Agụvị ka ẹnịnị ệ nọ ịrẹsụ ataba na mẹ̀ ịsọvọ, dị ẹ yà ịrẹsụ ataba eweyi kụ́ mị ụhụ nị. Mị vaa sị́ ụya anịị rị wa a mẹ̀ vọrọ.”

⁸ Ẹnẹyịmavara kà, “ọza e yi me du igirepi ozoza ha, vị a sịị̄ mẹ eche ene zoza nị. Ẹ̀ me yi re vee vu aza amị ẹtẹ. Avọọ gẹdẹ-gẹdẹ, mị vaa hụ agụvị ezi ahụ amịị dọ waa ha.

⁹ Mị vaa mẹ ọyịzaa yị Anisirẹrị nịnị ana vị Anijuda Ezi ẹnịnị mị vaa sị ẹtẹ ana ataba amị nịnị hi ịnị anịị yị nị. Aza amị ẹnị mị nyị ẹ vaa nyị nị, dị ezi ahụ amị ra hi ịzọọ.

¹⁰ Yị aza amị anaa hẹkẹ mị, ẹtẹ Ịsarọnị vaa vara ịzị atẹmẹ aa rị, dị inozi Aakọ vị aha ịzị ịsụpa vaa sụ́tẹtẹẹ hi.”

¹¹ Ama ẹwụ nịnị ana va ịrẹma Ẹnẹyịmavara, di u hi ayị ataba ọnịnị amị nịnị, ẹwụ nịnị ana naa hẹkẹ ori ana aā hị́ Igadi ọnịrị ori ana aā hị́ Imeni. Ori ẹnẹnị ụ ka ẹẹ̄ mẹ ka ọza ọ̀ nyị ịrẹsụ ọyịza, dị ẹ mẹ ka ịsị ẹ̀ẹ vị ọ́ọza ò ree dọ nị, áawụ nịnị vaa vị irenyi.

¹² Mị vaa mẹ ka we sú isu ịrịịra nịnị, agụvị ka ụmẹ ọnị mị sị hị́ wụ nịnị, we yi tụ́ ohi, ụmẹ ọnị mị kà ịrẹyịị wụ nịnị, wẹ yị sị ụtọ pe ẹtẹ. Wâ nyị ka akamawụ ụ waa mẹẹ hi mi nị, dị ụ wa mẹ̀ ịsa odivi nịnị nị.

¹³ Agụvị avọọ, Ẹnẹyịmavara Ohomorihi ka: Ezi ahụ amị anaa saasa ịrẹyị amị vaa rị ịsa, ama ụngwẹ vị ana vaa kụ̀ ẹwụ nịnị. Ẹnịnị vee hú, ama onyi vị ana vaa kụ̀ wụ nịnị. Ezi ahụ amị vee hine ayị, ama ẹwụ nịnị vị ana a vaa mẹ ụhịị nyị.

¹⁴ Ayị ezi ahụ amị vee hine, dị ẹyaa jị ahẹ, ama ẹwụ nịnị vị ana ayị anị vee du, dị u we nowu. Ayị awụ nịnị vaa vazi, di u wee sú ùnè.

¹⁵ Aza amị ẹnị mị nyị vị ana vaa sị ịrẹha awụ nịnịị chìi hi ọza. Ẹmị Ẹnẹyịmavara Ohomorihi vaa mẹ ka we su nịnị. Ama mị vaa sị ịrẹha ọwọọwaa yị aza anaa saasa ịrẹyị amị.

¹⁶ Ọza tụra ọza ene èe sị̀ ka ọnị ọ̀ mẹ̀ aduwa ịnị ẹtẹ ọnọnị, vị ana vaa sị ịrẹha Ẹnẹyịmavara Ohomorihii mẹ̀ ẹ. Ịrẹha Ẹnẹyịmavara Ohomorihi, ọzọza kụkụ vaa sịị hị́ eku ịnị ẹtẹ ọnọnị nị.

Ịsa ọwọọwa oni Ohomorihi mẹ

¹⁷ Ẹnẹyịmavara kà: Maà vaa mẹ ẹbẹẹba ọnịrị ẹhẹ ọwọọwa. E vee hí ayị ịsa ana mẹ tụ ịrẹma saka-saka.

¹⁸ Ama waa jẹ agụvị ịsị maa mẹ̀ aanị, dị ayị awụ oo hine. Agụvị ka maà vaa mẹ Ijerusarẹmị ọwọọwa. Ọ vaa mẹ ka ayị awụ oo hine, dị aza anị aa jẹ.

¹⁹ Ayị ẹmị ụvọta vee hine agụvị Ijerusarẹmị, dị maa jẹ agụvị aza amị. Aza ẹ yị ma vana jị òrèrè ịzọọ; ọza ẹ yị me vene nowu ka à va gụ ẹnị ụvọ.

²⁰ Ezinụvọ e yi me vene sú ini ozweyi. Avaba aza vaa mẹ ẹhẹ ẹnịnịị tu oruva. Aza ana àa vị ịrayị ẹchẹhị di e su nị, vị ana a vaa hị́ ezweyi. Ọza ẹnẹ ẹ̀ yị gụ ịrayị ẹchẹhị di o su nị, vị ana si zụ ka vị a sị ụya rị ọ nị.

²¹ Ẹnịnị vaa dà irehi, dị ẹ ra ịnị anị. E vee chire ọchị ịvayịnị, dị ẹ rị ẹtụtụ anị.

²² Ẹnịnị ẹ yị vaa dà irehi, dị a hịka ọza ẹnẹsa ọ ra ịnị anị nị. Ẹnịnị e yi vee chire ịsa dị ọza ẹnẹsa ọ̀ rị ọ. Aza amị vi ene vee ku orubo anka ọchị mee ku orubo avọọ. Ịsa aza amị sị ụvọ ẹnịnị mẹ, vị ẹnẹ vaa rịị kù.

²³ Ẹnịnị ẹ̀ẹ mẹ̀ ụkọrọ, ẹ yị vaa vị ọọhẹ. Ẹngụkata edivi ẹ yị vee tu ezi ẹnịnị. Mị vaa mẹ ka ò ze yị ezi ẹnịnị ọnịrị ezi ẹnẹ ẹ vanaa ma pooro.

²⁴ Dị à va nyị ka ẹnịnị ẹẹ hị́ mị, mi vee tu wa ohi. Ẹ̀ẹ yaa kà ịrẹyị kẹnẹ, mị vaa wụ́.

²⁵ Akatapooro ọnịrị ozi atẹmẹ vaa rị ịsaa vaabẹ, idu nịnị vaa rị avị anka ụnọ mẹ̀ẹ rị avị, dị ẹ́wụ́ nịnị kụkụ aa rị èzi. Ẹnịnị ẹ yị ma vana zama ọza, à vị ka ẹ̀ wụ̀ ọza. Ẹnẹyịmavara kà ẹ yị ma vana nyị ịsị ẹẹ zama ọza ịrẹsụ ataba ọnịnị amị.