Ayịsaya 64 - IWE ỌNỊNỊ

¹ Àa yẹ wa na ihinẹba di u we chi vẹ, agụvị ataba nịnị è re wu, di ẹẹ bànyị angwa òo mee hi wa.

² Ẹnịnị vaa da ẹgahị anka enyi ene sì hii ịra, dị aa há avọọ. Vẹ, wa va sị ụkata awụ zụ ọnịvị awụ nịnị, dị ụ wa mẹ ka anẹhẹ ẹẹ da ẹgahị eyi awụ.

³ Â nyị ụmẹ ọnị ụ sị vaa mẹ ịtọmatapa ọnị ye yi tụra eyi, ataba nịnị mè re wu, vị́ ẹyaa bànyị angwa mee hi wa nị.

⁴ Hụrẹ ụmọrụmọ vẹ, ệ yị nyị ọza wụ́ ọ, à vị ka à nyị ọza ene re da ka áa nyị Ohomorihi ọsa ịrẹma awụ.

⁵ Aza anaā sịị ayohinee mẹ̀ ịsa ana vọrọ vị ọnị ụụ̄ zaa gụrị ẹngụ. Ẹngụ aza ẹnẹẹ ẹ tamayị ú mè sì ka ẹnị ẹ̀ ra nị. Wâ kụ́ ayị hi yị. Ama dị ụ daka yị kụ́ ayị hi yi ẹtẹẹtẹrẹ, vị́ yị ká tụ ọvịdị hu avọọ ịnị ebira odivi ọyịmẹ̀ hụrẹ ịyẹẹyẹ vẹ nị.

⁶ Avaba ayị ọ sị ịvị mẹ; ebira ozoza ene hu ọnị mẹ vị ọnịrị ịdọtị anka ụsẹ avọọ. Agụvị ebira odivi ayị, vị́ ị kụkụ sị mẹẹ anka avị ana wụ, dị ahị hì wa kwooze avọọ nị.

⁷ Ẹ yị nyị ọza anaa hị́ ịrẹha awụ. Ẹ yị nyị ọza anaa vẹ ịdị awụ vee sì ọgụvọ. Wa raa sị ẹngụ awụ tẹ̀ yị, wa raa hụrẹ yị ụvọ, agụvị ebira odivi ayị.

⁸ Ama Ẹnẹyịmavara, ẹwa yị vị Ada ayị nị. Vị́ ị sị mẹẹ ụmọpa avọọ, dị ẹwụ sị mẹẹ ọjụnọkọ avọọ nị. Ụkọrọ ụvọ awụ ị vị̀ nị.

⁹ Agụvị avọọ, navọ a sị ụ kụ́ ayị hi yi, à vị ka wa tamayị ịvị pooro. Tamayị ka aza awụ avaba ayị vị nị.

¹⁰ Avaba ẹkụra awụ ẹ sị vara ụnọmị. Ijerusarẹmị ọ raa tụ́ osusu.

¹¹ A sị irehi ọnịnị ayị ana maanị zoza rị ịra. Ịzọọ ohiku ayị nịnị yaa gama wụ nị. Avaba aha ẹnị i sì ịrẹyị anị ẹ sị jị eburu.

¹² Tee! Ẹnẹyịmavara, aanị ka ẹ yị nyị ịzị avaba ọsọnị kanyị wụ? Aanị ụ wáá mẹ vaa yaatụ kẹnẹ dị ẹ yị nyị ịsị ụ mẹ, dị ụ mẹ ka ya rị ụya ọngwọọngụ nị?