Ayịsaya 6 - IWE ỌNỊNỊ

Ohomorihi ô hị́ Ayịsaya ka ọnị aa tụ́ ọ ụtụ

¹ Â nyị ẹkụhị ọnya ịnị ịrayị oni ohinọyị ana aā hị́ Uzaya sú. Di mi re Ananyị yị ka ộ yaayịtẹ ịrẹsụ ode ohinọyị nị. Ịzị ọ yà ộ nẹba dị ọ nyayịnẹ nyị ụbanyị nị. Ụtọ-ụtọ ịta anị vi ene hi avaba irehi Ohomorihi.

² Â nyị ịsa ịrịịra ẹnyị aanị ana nyị avaka ịhịnọnyị, dị ẹnị maanị hi ẹbẹẹba nị. Ệ sị ẹvaka ẹẹva kú eyi, dị ẹ sị ẹẹva kú ahụ, dị ẹ yaa sị ẹẹva ana vọ hira nị.

³ Dị ẹ yaa hị́ ẹngụ, dị ẹ ka “Ọnịnị, Ọnịnị Ọnịnị! Ẹnẹyịmavara Ochẹtẹẹngụ vị ọnịnị. Ụbanyị anị vi ene chi avaba ẹhẹ ẹngụ.”

⁴ Ẹ mẹ̀ maanị nowu, di irehi Ohomorihi henyi jigijigi na ngụ ịzị a ka a ẹtẹ, dị irehi Ohomorihi hi yị areyi nị.

⁵ Di mi nowu za ẹtẹ, dị mị ka, “Ma sị dà, ịrẹyị ô tù mị. Ịsị mịị̄ si irenu amịị ka e yi zoza. Avọọ aza ẹnị ẹmịrị ra vabẹ ẹnị mẹ̀ rẹẹ kà ịrẹyị ene è yi zoza nị. Ẹmị ọnọọ ọ raà sị eyii re ohinọyị aanị nị. Ọnị ọ vị Ẹnẹyịmavara Ochẹtẹẹngụ nị.”

⁶ Dị ọnya ịnị ịsa ịrịịra ẹnẹẹ sị apụka dị ọ sị akịna hụụnị ụta ịzị a yàa rị ịsọvọ ịra di o hira ve tù mi nị.

⁷ Dị ọ sị akịna ọnọọ kanyị mi irenu dị ọ ka emi éē re ịra ọnị ọnị sị kanyị mi irenu aanị. Ọ kà a raà sị ịvị ọnị mị rị kwooze, a rẹ raà mẹ̀ ịsọvọ ịvị ọnị mị mẹ.

⁸ Dị mị va wụ́ ka Ananyị yị ka, “Ẹnị maa vaa tụ́ ụtụ aanị kẹ, ẹnẹ vaa zị ụtụ ọnọnịị yị? Dị mị ka ẹmị yọ, tụ́ mị.”

⁹ Dị ọ ka ma na kà a yị aza ẹnẹẹ ka ẹ raa sị ụtọ pè ẹtẹ pooro dị ẹ yị wụ́, e re vee re ẹtẹ pooro dị ẹ yị yẹ ịsị eyee re.

¹⁰ Ọ kà ma mẹ ka azị aza ẹnẹẹ kụkụ tẹsị ịrẹyị anị, dị asị ẹ kụkụ zụ wụ́ ịrẹyị dị asị ẹ rẹ kụkụ zụ sị eyi ẹnịnị re ẹtẹ. Ọ kà ẹnịnị èe sị eyi ẹnịnị re ẹtẹ, dị ẹ na sị ịrẹyị wụ́ nị, ẹ nyayịnẹ vara ebira ana vaa mẹ ka a dọ wa ha.

¹¹ Di mi ve họ̀ use dị mị ka Ananyị yị, ye re ụmẹ ọnị ọ maanị vaa yà nee tụ̀? Dị ọ ka pooro dị avaba ẹkụra ọnọnị ọ̀ vara eburu dị asị a kụkụ nyị aza ana ra hi ịnị anị, Avaba irehi rẹ vaa tụ́ osusu, di e re du avaba aarẹ ha.

¹² Ụmẹ ọnọọ Ẹnẹyịmavara raà dụ avaba aza na huu, dị ẹtẹ kụkụ vị osusu.

¹³ Àa daka nyị ịzị aza gụ ẹẹwụ tụ̀ dị ahịka ọza ịnya ọ vọ nị, ọza ịnya ọnọọ vị ọnị ọ vaa sị hụrẹ oze. Ama aza chee ana vọ aanị vị ana vaa sị mẹẹ anka igugu ọchị ọbanyị ene è yi me sú avọọ. Aza Ohomorihi vị ana vaa sị mẹẹ anka igugu ọnọọ àaa ha avọọ.