Ayịsaya 55 - IWE ỌNỊNỊ

¹ Ẹnẹyịmavara kà, avaba ẹwụ nịnị oni onyi aa kụ̀, wa vẹ nịnị. Enyi yị! Ẹwụ nịnị ẹnẹ ẹ̀ yị nyị ẹkẹhị, wa vẹ. Vá hị́ apaapa dị ụ wa rị ọ. Vá hị́ eche ọnịrị ịrẹva ụnọ ọọhẹ nịnị.

² Sị ẹ vẹ di ú wee du ẹkẹhị awụ nịnịị ha tụ ịnị ịsa ẹnẹ ẹ̀ yị vaa ha ọza ịnẹ? Sị ẹ vẹ dị ụ́ waa mẹ̀ ụkọrọ, dị ụ́ wàa kụ̀ ẹkẹhịị ha nịnị, dị ụngwẹ aa yịị kụ̀ wụ nịnị? Sị ụtọ pe mi nịnị, dị ụ waa rị ịsa ene zoza nịnị. Ụ vaa rị ịsa ọyịza-ọyịza nịnị dị ayị awụ nịnị ee hine.

³ Ẹwụ nịnị aza amị ọ̀ sị ụtọ pe ẹtẹ, dị ụ wa ká mị vẹ nịnị. Ká mị vẹ nịnị, ka ụ vaa yàra nịnị. Mi vee wo otoo yị wụ nịnị ọnị mị vaa mẹ pooro. Ize ọnị mị wo oto anị yị Idevidi, mị vaa sịị yị wụ nịnị.

⁴ Re, Ẹma mẹ̀ ẹ onivenu yị aza nị, dị mị mẹ̀ ẹ ọdọvịdị ọnịrị ọga isoja yị aza anị,

⁵ Ụ vaa hị́ anẹkụra ọsa nịnị, dị anẹkụra ẹnẹẹ ẹnẹ ẹ̀ yị vịdị yẹ wụ nịnị zwè ve tu wu. Ẹmị Ẹnẹyịmavara, Ohomorihi awụ nịnị, Ohomorihi Ọnịnị Ísirẹrị ọ vaa mẹ ka ọ̀ vavọọ ya nị. Mị vaa sị ụbanyị ọnịrị igirimaa yị wụ nịnị.

⁶ Sì Ẹnẹyịmavara ịnị ụmẹ ene nyengu si re e, Hị́ ọ booro aanị ọnị ọ gụrị ẹtẹ.

⁷ Navọ ọza ọhịmị ọ và hụụnị ẹhẹ odivi anị, dị ọza odivi ọ̀ và hụụnị aro odivi anị. Navọ ẹnịnị ẹ̀ và ka Ẹnẹyịmavara vẹ ka ọ vaa vayị ẹnịnị. Ẹnịnị ẹ̀ và ka Ohomorihi ayị vẹ, ka ọ vaa vaa gu wa ẹtẹẹtẹrẹ.

⁸ Ẹnẹyịmavara kà, “Agụvị ka aro amị ọnịrị aro awụ nịnị ẹ yị vene ẹngụ. Oze ẹmịrị ẹwụ nịnị ẹ yị rẹ jịrị ẹngụ.

⁹ Agụvị ka Ẹbẹẹba mẹ̀ nẹba huna ẹtẹ, avọọ oze amị ọnịrị aro amị mẹ̀ nẹba huna awụ nịnị nị.

¹⁰ Orihi ọnịrị ata orihi vị anaā hụrẹ ẹbẹẹba vẹ, dị ẹ yị vavẹ ịzọọ, ẹ̀ yị vị ịjị ẹtẹ sị enyi hú. Ẹtẹ ọ̀ọ sị enyi hú, dị ọ mẹ ka ịsa ịnị aarẹ ẹ̀ chị́ hi ẹhẹ, dị ẹ si ihu yị ọza eneē mí ịsa ọyịna, dị ọ sị ịsọyịrị yị ọza.

¹¹ Avọọ gẹdẹ-gẹdẹ ịrẹyị ọnị mị kà mẹ yà nị. Ẹ yị vaa vàa ka mịị vẹ osusu, ama ọ vaa mẹ ịsị mị mẹ eto anị; ọ vaa mẹ avaba ịsị mị tụ́ ọ ka ọ̀ na mẹ.

¹² Ịrajẹ ụ vaa sị hụrẹ Ịbabịrọnị nịnị nị; ẹngwọọrọ a vaa sịị kụ́ wụ nịnị varẹma hụrẹ ẹkụra ọnọọ nị. Ataba ẹbanyị ẹnịrị ataba eweyi vee nyima aa jị ahẹ, dị avaba ọchị ịnị avị aa kụ̀rà ụvọ ẹnịnị.

¹³ Ọchị ịsayịpụrọọsị vee nyi hi ịzị avị ikeyi-ikeyi nyị hi booro aanị. Ọchị ana aā hị́ Imatiri vaa chịị tụ ịzị ikeyi nyị hi. Apọtẹrẹwa ọsọnị vaa vị̀ pooro zịna-zịna nị. A vaa sị tamayị ịsa ẹmị Ẹnẹyịmavara mẹ.”