Ayịsaya 54 - IWE ỌNỊNỊ

Ohomorihi ô wo oto Ẹngwọọrọ

¹ Ẹnẹyịmavara kà: Ẹwụ ọbọrị, waa jị ahẹ. Ẹwụ ẹnẹ ẹ̀ yị barẹẹ da, wa jị ahẹ booboro, dị ụ waa jẹ. Agụvị ka ụ vaa nyị ezii huna ọnẹẹ ana và ọnọrụ.

² Dà ajẹngụ awụ gana hu avọọ. Tana ịta ọnị ụ sị jị oze irehi awụ. Dà obo awụ gọdọ, dị u we hi ọchị ọnị ụ sụ́ obo ajẹngụ za katẹngụ.

³ Agụvị ka ụ vaa yaraa ne eyi-ụvọrị, dị ụ yara na eyi-ụvọha. Ezi ewu vaa dọ avaba ẹtẹ ana anẹkụra ana vọ ra hi ịnị anị, dị aza ra hi avaba ẹkụra ana tụ osusu aanị.

⁴ À sị u hí angwa, agụvị ka ọza ẹ́ ma vana mẹ̀ ụhị nyị wụ. Àsị u hụrẹ ayịnẹ, agụvị ka ụhị ẹ́ ma vana nyị wụ. U vee hí ayị ụhị ana nyị wụ ịjị ọnị ụ vị ozweyi. Wẹ́ ma vana tamayị ụhị ana nyị wụ ịjị ọnị ụ vị ọnịịnya anka osoku avọọ.

⁵ Agụvị ka Ohomorihi ana mẹ wụ vị ana vaa sị mẹẹ anka ọ vaa yị wu. Ịrẹha anị ọ rị Ẹnẹyịmavara Ochẹtẹẹngụ nị, Ohomorihi Ọnịnị Ísirẹrị vaa dọ wụụ ha. Ọnị ọ vị Ohomorihi avaba ẹhẹ nị.

⁶ Isirẹrị, vị́ ụ sị mẹẹ anka ọnẹẹ ozweyi, ọnị ọva anị hụrẹ ụvọ tịtẹ, dị ee du ayị ẹtẹẹtẹrẹ avọọ nị. Ama Ẹnẹyịmavara ọ raà hị́ wụ và ka ẹngụ anị vẹ, dị ọ kà

⁷ Mâ hụrẹ ụvọ ụmẹ chee, ama agụvị ka mê sì ịrẹyị ẹnẹmẹhị, mị vaa sị ụụ varẹma.

⁸ Ayị ộ kụ́ mị, dị mị navọ ụ tịtẹ ụmẹ chee nị, ama mị vaa sị zụ̀ wụ m mẹmẹ sì ịrẹyị awụ pooro. Ẹnẹyịmavara ana dọ wụ ha, ọ kà avọọ nị.

⁹ Vị́ ịrẹyị ọnọnị sị mẹẹ yị mị anka ụmẹ Inowa avọọ nị. Mâ hị́ eku ka mẹ ma vana sị enyi kụ́ ẹhẹ anka ụmẹ Inowa, avọọ m mẹ rẹ hị́ eku ka mẹ ma vana kụ́ ayị hi wu nị. Mẹ ma rẹ vana maanị tụ́ wụ ohuvọ.

¹⁰ Ataba ẹbanyị ọnịrị ataba eweyi e zụ wú va hi ẹtẹ, ama ẹmị vee sì ịrẹyị awụ pooro. Oto oni mi wo ka ụ vaa nyị ẹngwọọrọ vaa jẹẹ pooro. Ẹnẹyịmavara ene sì ịrẹyị awụ ọ kà avọọ nị.

¹¹ Ẹnẹyịmavara kà, “Ẹwụ Ijerusarẹmị, ẹwụ anaa rị ụya di wè yi re ọza gụ wụ ụvọ, ẹ yị nyị ọza ana a vọrọ ka ọ̀ hunẹnẹ wụ ayị. Mị vaa sị ịrẹta akaakaa tenyi ohyẹtẹ awụụ dà.

¹² Mị vaa sị ịrẹta ọkatarihi ana aā hi irubii dà irehi ọgọdọ tụ ịnị ịnẹ awụ. Ịrẹta anaā zá anka ịra avọọ mị vaa sị mẹ oze ọbanyị awụ nị, dị mị rẹ sị ịrẹta akàaka tụra avaba ọvọ awụ.

¹³ Ẹmị ụvọta vaa zụ̀ ezi ewu ịsa. Mị vaa mẹ ka ò ze yị wa ẹtẹẹtẹrẹ, dị mị sị ẹngwọọrọ yị wa.

¹⁴ Ịzẹyịza ọnịrị ịsa ana a vọrọ ọyịmẹ̀ vaa mẹ ka wa nyị ụkata. Ẹ yị nyị ọza ana va zụụ mẹ ẹvayaa yị wụ, agụvị avọọ we yi vee hí angwa. Ịsa ee chire ọza angwa ẹ yị vaa gụrị ẹwụ.

¹⁵ Àa nyị ọza anaa kụ́ ịrazịị tu wu, mẹ yị tụ ọza ọnọọ ụtụ. Ọza tụra ọza ana àa kụ ịrazị ve tu wu vị ana vaa hyẹdụ.

¹⁶ Re, ẹma tụ́ anịngẹrẹ anaā kà ịra akịna nị; dị e si tụ́ ẹnya ịrẹkụ. Ẹ ma rẹ tụ́ isoja nịnị anaā sịị ẹnya ịrẹkụ ẹnẹẹ wụ̀ ọza nị.

¹⁷ Ama ẹ yị nyị ẹnya ịrẹkụ ana hụ vị awụ mẹ, ana vaa mẹ̀ ụkọrọ. Avaba ịrarẹ ana àa sị ịrẹyị awụ na tụ́ ịrẹka, vị ọnị ụ vaa kụụ hi ireche.” Ẹnẹyịmavara kà ịsa ọnị mẹ tịtẹ yị ezi ahụ anị yị, ọnị vaa mẹ ka ẹ̀ nyị ehuna.