Ayịsaya 50 - IWE ỌNỊNỊ

Ẹnẹyịmavara ọ nyị ụkata ọyị sị sị ụya rị ọza.

¹ Ẹnẹyịmavara kà, ẹnịnị wéé ro ka a ọnị dụ aza anị jịnẹ anka ọnọrụ ene yi ose anị tịtẹ avọọ nị? Ẹnịnị wéé ro ka ọnị ná wa ọrịhị nọ ẹkụra ọsa anka ọza ana ná ezi ọrịhị avọọ nị? Eyiyee de! Ịvị Ọnị ệ mẹ̀ ọ mẹ ka a za wa ọrịhị nọ ẹkụra ọsa nị. Agụvị ebira odivi ẹnịnị a dụ wa jịnẹ nị.

² Ọ kà, sị ẹ vẹ dị aza anị ẹ yị tụ ọnị ohi ịnị ụmẹ ọnị ọnị sị na ka ọnị naa dọ wa ha? Sị ẹ vẹ dị ọnị hị́ wa, dị ẹnịnị e yi tụ ohi ịrẹyị? A vị ọnị sị hịmị ọyị dọ wa haa? Ọnị ọ̀ọ ka ịrẹyị kẹnẹ enyi ịnị oku aa wụ̀ za ẹtẹ. Ọnị ọ zụ vara irehu ẹtẹ ọyịwụ̀, dị ivovo ene hi ịnị anị su va ha agụvị ka ẹ yị nyị enyi.

³ Ọnị ọ zụ mẹ ka ẹbẹẹba o hozi ojoji piri-piri anka achị anaā sịị ba arụwẹ ọza ene su avọọ.

Ozi ahụ Ẹnẹyịmavara ệ wụ́ chire e.

⁴ Ayịsaya ka, Ẹnẹyịmavara ọga ộ raà sị ịrẹyị zụ ọnị agụvị ọnị ọ yara tụ ọza ọnị ọ ngụ ẹngụ ọtụtụrụma. Ẹnẹnẹnẹ ọọ̄ mẹ̀ ka ọnị ọ kụ ẹngụ hi ọyị kọsẹ ịrẹyị ana aa sị zụ ọnị nị.

⁵ Ộ mẹ̀ ka ọnị yẹ, dị asị ọnị mẹ akamawụ, dị asị ọnị va ịrẹma ka ọnị.

⁶ Ọnị ộ navọ ịrẹma yị aza ene tu ọnị, dị ọnị navọ eyi tịtẹ yị wa di e yee tura ọnị ịrẹwa, dị ẹ yaa jị achị kú ọnị, dị ẹ yaa kụ̀ ọnị ụhụ nị.

⁷ Ama Ẹnẹyịmavara Ohomorihi ộ yị zẹ ka ịsị ẹ mẹ̀ ọ zàmà ọnị, dị ọnị sị ẹngụ dọ ịrẹyị ẹnịnị agụvị ka Ohomorihi ẹ yị vaa zẹ ka ụhị ọ nyị ọnị.

⁸ Ọga ana vaa jị ịhị yị ọnị ya ẹtẹ. Ẹnẹ nyayịnẹ jịnẹ vee du ọnị? A jẹẹ di eyi o gẹreyi kẹ! Aza ene du ọnị ẹ jịnẹ tụ ẹhẹ kẹ.

⁹ Ẹnẹyịmavara Ohomorihi vaa gụ ọnị ụvọ. Ọ vaa sị zụ ka ọnị ẹ yị rị ịvị. Aza ene du ọnị vaa ta hụrị ẹtẹ. E vee vu ẹtẹ anka idegu mẹẹ̄ rị awuru avọọ nị.

¹⁰ Avaba aza ene hí angwa Ẹnẹyịmavara, dị ẹ saasa ịrẹyị ozi ahụ anị; oze ọnị ẹ zị ọ daka hozi, ẹ sị ayị tụra Ẹnẹyịmavara, e chi ayị za Ohomorihi.

¹¹ Avaba aza ana mẹ eto odivi ka ẹnị ẹ wụ̀ ọnọhụva ẹnịnị vị ọnị eto odivi ẹnịnị vaa rị ịrẹsụ. Ẹnẹyịmavara va mẹ ka odivi ọnị ọza o si yị ọnọhụva anị ọ vị aanị.