Ayịsaya 49 - IWE ỌNỊNỊ

Isirẹrị ọ vị ẹtohweyi avaba anẹkụra nịnị nị.

¹ Sị ụtọ pe ẹtẹ ẹwụ nịnị anẹkụra ana ra utenyi. Batọ ẹwụ nịnị anẹkụra aha ene noze. Ẹnẹyịmavara ộ sị mị nyị dị a va yẹ ka â ma mị. Ịnị ịhị ozi ọnyị amị mị ya dị ọ sị ịrẹha yị mị nị.

² Ộ mẹ ka ịrarẹ amị ọ rẹ anka ụhwọ ọ́za, a vị ọpa. Ẹnẹyịmavara ộ sị mị tẹ tụ ịnị ivoku anị.

³ Ẹnẹyịmavara ộ kà a yị ka, Isirẹrị vị ozi ahụ anị nị. Agụvị anị aza vaa nyayịnẹ sị ụbanyị yị ọnị.

⁴ Ama mê tụ ọ ohi ka ọ sị ngụ mị ẹngụ, mị du ụmẹ amị ha kẹnẹ. Avaba ịsị mị mẹ vị ọnị mị mẹ yị Ẹnẹyịmavara Ohomorihi, ama ẹ yị nyị ịsa ọnị ọ sị yị mị.

⁵ Dị a va ma mị Ẹnẹyịmavara nyị mị nị; ộ mẹ̀ mị ozi ahụ anị ọnị ọ ka ọ kụ aza anị Isirẹrị ana gara hi ẹhẹ varẹma vẹ. Ẹnẹyịmavara ộ raà sị mị tụ ẹbẹẹba, dị ọ sị ụkata yị mị nị.

⁶ Ộ ka, ẹ yị hụ ka ma vị ozi ahụ kẹnẹ. A nyị ka ma kụ ezi Ijekọvụ ana vị Isirẹrị ana ha nọ udi ụbanyị ẹnịnị. Ẹnẹyịmavara kà ọnị ọ raà nyị ọ ka ọ vị ẹtohweyi yị avaba anẹhẹ agụvị ọ sị ẹdọha yị ọza ọnyọọnya.

⁷ Ẹnẹyịmavara kà a yị Isirẹrị ka ọnị ọ vị Ohomorihi ọnịnị ana dọ wa ha hụụnị ụvọ ohinọyị nịnị ana za wa ọrịhị ọnịrị anẹkụra ana sị eyi wụ̀ wa. Ama booro aanị ọnị o wo oto ka ohinọyị nịnị ọnịrị ọdọvịdị nịnị vaa sị ụbanyị yị wa, di e yee ku ẹtẹ yị wa agụvị ka ọnị vị ọnịrẹyịzẹyịza, ọza ọnịnị Anisirẹrị ana nyị wa.

⁸ Â nyị ụmẹ ọnya ọnị Ẹnẹyịmavara kà ịrẹyị yị Anisirẹrị: Ọ kà ụmẹ mee tu ọnị ọ wụ́ aduwa ẹnịnị, dị ọnị gụ wa ụvọ, dị ọnị rẹ dọ wa ha. Ọnị rẹ vaa mẹ̀ ịsa yị wa ọnị anẹkụra ana vọ vaa nyị ụvọọ tụ ọ. Ọnị vaa da ẹkụra ẹnịnị ene du varẹma yị wa.

⁹ Ọnị rẹ vaa dọ aza ana a mẹ ẹvaya yị ha hụụnị ụya ẹnẹ ẹ yaa rị, dị ẹ nyị ẹngụ ẹnịnị. Dị ọ mẹ ka ẹnịnị ẹ nyị ịsọyịrị ene chi wa ẹngụ. Dị ẹtẹ ọpapara ẹnịnị aa mẹ̀ ịsa yị wa.

¹⁰ Ụngwẹ ọnịrị onyi ẹ yị kụkụ vaa kụ wa. Ẹngụ ẹnịnị vee hi ahị. Ẹnẹyịmavara vaa vayị ẹnịnị, dị ọnị mẹ̀ ịsa ọnị e yee si yị wa anka ọza ene enyi aa kụ ene re enyi ohunẹnẹ hu avọọ.

¹¹ Ọ kà akanya ẹnịnị ana sị mẹẹ anka ataba avọọ vị ọnị vaa kụ kwooze. Dị ẹnịnị kụkụ aa zị ụsẹ hwẹẹrẹ anka avọọ.

¹² Dị aza kụkụ a hụrẹ avaba aha ana ọnịrị ẹkụra ana hị́ Isini.

¹³ Dị avaba ịsa ene hi ini ihinẹba ọnịrị ẹtẹ ẹẹ jẹ ịrajẹ, mẹ ọda yị avaba ataba nịnị ka ẹ gụ ahẹ. Aza Ẹnẹyịmavara ẹ raà rị ụya ama ọ raà vayị ẹnịnị, dị ọ mẹ ẹngwọọrọ yị wa nị.

¹⁴ Aza ene hi Ịzayọnị kà, Ẹnẹyịmavara ọ raà va ịrẹma ka ẹnị, di o hi ayị ẹnịnị nị.

¹⁵ Ẹnẹyịmavara ộ họ̀ wa ka, ọnyị ozi wéé hi ayị ozi anị ana ka ịrẹva? Ọ́ọ́ zụ nyị ịhyẹrẹ ozi anyavava ana hụụnị ẹngụ anị tụ ẹhẹ. Ọnyị ozi ọ̀ọ daka hi ayị ozi anị ọnị e yi vee hi ayị ẹnịnị.

¹⁶ Ẹnẹyịmavara kà ẹ yị nyị ụmẹ ọnị ọnị sị hi ayị ẹnịnị. Ịrẹyị ẹnịnị vị ọnọnị chẹrẹ tụ ịnị ụvọta anị.

¹⁷ Aza ene ve tenyi ẹkụra awụ nịnị aa vẹ, dị ẹnị ene du ọ aa ee zwe hụrị ịzọọ.

¹⁸ Kụra eyi tụ ẹba, dị ụ we re aza awụ nịnị ana vẹ eehi. Ẹnẹyịmavara kà ọnị ọ̀ọ yara, ẹnịnị va sị aza ẹnịnị mẹ eyi anka ọnyẹnẹẹ ọwọọwa ana a kụ ọmọ hi ẹngụ avọọ.

¹⁹ Ijerusarẹmị ô sị du. Ẹ yị nyị ịsị ẹ vọ. Ama e vee tenyi ọ dà, dị aza hi ọ. Ọnịvị ẹnịnị ene divi sị huu da zị ana na.

²⁰ Ijerusarẹmị sị mẹẹ anka ọnyẹnẹẹ ana ma ezi anị ịnị ayodu ẹkụra ọsa avọọ nị. Ezi ẹnẹẹ ẹ vavẹ eehi, dị aha ẹ yị dọ wa, di e yee si aha ẹkụra ẹnịnị.

²¹ Dị Ijerusarẹmị aa jị ọ ịrẹka ka ọnị ọ́ọ́ maanị ma ezi ẹnẹnị nị? Ọnị mẹmẹ maanị ma wa ọnị mẹ ya ịnị ayị odu ịnị ẹkụra ọzọga? Ẹnẹ pa ezi ẹnẹnị? Ịzị ẹ hụrẹ vẹ?

²² Ẹnẹyịmavara Ochẹtẹẹngụ ộ ka yị aza anị ka ọnị vaa sị ụvọ hị́ anẹkụra nịnị ka ẹ kụ ezi anọrụ ọnịrị anẹẹ ẹnịnị va yị wa.

²³ Ohinọyị anẹkụra nịnị ịzị a ya pa ezi ẹnẹẹ vaa va ku ẹtẹ yị wụ, dị ẹ tẹsị awụ anka ọrịhị mẹẹ̄ tẹsị adarehi anị avọọ. Isirẹrị vaa yẹ ka ọnị ọ vị Ẹnẹyịmavara nị. Aza ana àa sị ayị tụra a, ọ yị vaa va ịrẹma anị.

Ẹnẹyịmavara ya pe Isirẹrị

²⁴ Áá zụ dọ isoja ẹnya ọnị kụ hụrẹ eyi ịrẹkụ? Áá zụ dọ aza ana za ọrịhị eyi ịrẹkụ hụụnị ụvọ ọza ana chamayị yị ọ?

²⁵ Ama Ẹnẹyịmavara ọ̀ kà a ka ọnị vaa va eyi ịrazị ka aza ene pe wa vụ ịrẹvụ. Ọnị vaa dọ ezi ẹnịnị hụrẹ ụvọ ọnịvị ẹnịnị ana vị anayịchama.

²⁶ Ẹnẹyịmavara kà ọnị vaa mẹ aza ana mẹ ẹvaya yị wa ẹẹ wụ̀ ẹngụ ha, dị anya aza ọnị ẹ yaa wụ̀ ọọ mẹrị wa anka eche avọọ. Ịjọnọọ anẹhẹ nịnị vaa yẹ ka Ẹnẹyịmavara ana dọ aza anị ha vị Ohomorihi ana nyị ụkata ẹnẹmẹhị.