Ayịsaya 48 - IWE ỌNỊNỊ

Ohomorihi ọ vị Ẹnẹyịmavara ana nyị ụhwọ nị.

¹ Batọ ịrẹyị ọnọnị, ẹwụnị Anisirẹrị ana vị evere Ijuda ana sị ịrẹha Ẹnẹyịmavara hị́ eku. Ẹ ka ẹnị aa hẹkẹ Ohomorihi Anisirẹrị ama ireche osusu.

² Di e yee wu ka ẹnị vị anẹkụra ọnịnị ene chi ayị za Ohomorihi Anisirẹrị ọnị ịrẹha vị Ẹnẹyịmavara Ochẹtẹẹngụ.

³ O si ku ọnị Ẹnẹyịmavara vịdị ka wa ọnọ ịsa ana vaa mẹ. Ộ mẹ̀ ẹ hụrẹ hi wa, dị ịrẹyị anị sẹ nị.

⁴ Ộ yẹ ka ẹnịnị vaa mẹ ịrẹsụ ọkatẹngụ, ayị ẹnịnị ọ vị, dị ọ katẹngụ hu ịrẹta nị.

⁵ Ẹnẹyịmavara kà ọnị ọ vavọọ ka yị wa agụvị ịjị ọ̀ọ sị mẹ asị ẹ kà a ka ori ọnị ẹ yaa hẹkẹ ộ mẹ̀ ẹ nị.

⁶ Avaba ịsa ọnị ọ raà ka yị wa vị ana sẹ. Ẹ dọ ka ịrẹyị anị ộ gẹ ẹ. Booro aanị, ọnị vaa kà a yị wa ịsa ọwọọwa ana aa vẹ. Ịsa ana tẹ̀ ọnị ẹ yị nyị ọza ana yẹ ọ vị nị.

⁷ Ịsa ọwọọwa ọ vị nị. Ẹ yị vị ịsa ana vịdị mẹ, agụvị avọọ ẹnịnị ẹ zụ kà a ka ẹnị ẹ yẹ oze anị.

⁸ Ẹnẹyịmavara kà ọnị ọ yẹ ka ẹnịnị ẹ yị wụra sị ayị tụra. Â yẹ wa ka anakamawụ ẹ vị hụrẹ ẹtẹẹtẹ nị. Agụvị avọọ ẹ yị wụ́ ịrẹyị ọnọnị vụrụ-vụrụ nị. Ẹnịnị ẹ sị ụtọ kụ ahị ịrẹyị anị.

Anisirẹrị nịnị ẹ sị ha hụụnị ụvọ Anibabironi

⁹ Agụvị aza ẹẹ ga ọnị, ọnị ẹ yị kụkụ vaa kụ ayị hi wa, dị ọnị o vee vu wa ẹtẹ.

¹⁰ Ẹnẹyịmavara kà ọnị ộ sị ẹngụkata zama wa re anka aā mẹẹ sị ịra akẹnẹ zama isiriva re avọọ. Ama ọnị ore ka ẹ yị nyị ịsị ẹ vị.

¹¹ Ọ kà agụvị ẹngụ anị ọnị dọ wa ha nị. Ịzẹyịza, agụvị ẹngụ anị yọ nị. Ọnị ọ yị vaa zẹ ka a mẹ̀ ụhị nyị ịrẹha anị, a vị ka ọnịrị ọzọnyọzọnyị ọ ga ụbanyị ana vị áanị ịnya kẹnẹ.

¹² Ẹnẹyịmavara kà Anisirẹrị ana vị aza anị ọnị ọnị nyị e sị ụtọ pe ịrẹyị anị. Ọnị ịnya kẹnẹ ọ vị Ohomorihi nị. Ọnị ọ vị oyinyima ọnịrị ẹzẹtẹ nị.

¹³ Ụvọ anị ộ sị ka ẹhẹ ẹtẹ, dị ọ gana ẹbẹẹba ku nị. Ịrẹyị kẹnẹ ọ kà, dị ịsa ọzọza jẹẹ udi anị nị.

¹⁴ Ẹnẹyịmavara kà a kụ ẹngụ gụ, dị ẹ wụ́ ịrẹyị anị. Áá nyị ọnya ịnị ori nini ana kà a yị wa ọza ọnị ọnị sì ịrẹyị anị, ọnị ọnị nyị ka o va eyi ịraazị ka Ịbabịrọnị? Ọza ọnọọ va mẹ̀ ịsa ọnị ọnị si ka ọ mẹ.

¹⁵ Ọnị aa hị́ Ịsayịrọsị ka ọnị ọ tụ ọ ụtụ nị. Ọnị vaa gụ ọ ụvọ ka o re mẹ.

¹⁶ Ọ kà booro aanị ẹ ka pe ọnị dị ẹ wụ́ ịsị ọnị aa kà a. Hụụnị oyinyima ọnị e yi were ka ịrẹyị anị. Ọnịị̄ mẹ̀ ka avaba ịrẹyị anị ọ sẹ nị.

Eto ọnị Ẹnẹyịmavara nyị yị aza anị.

¹⁷ Ohomorihi ọnịnị Anisirẹrị, Ẹnẹyịmavara ẹnẹdọha awụ nịnị ka, Ọnị ọ vị Ẹnẹyịmavara Ohomorihi ẹnịnị ene si ka ọnị ọ zụ wa ịsa agụvị o zoza yị wa, dị ọnị ọ zụ wa oze ọnị a vọrọ ka ẹẹ zị nị.

¹⁸ Ẹnịnị ẹ̀ẹ wụ́ ịrẹyị anị, ọ yaanị ee ze yị wa anka orosi ẹnẹ ẹ yị mā wụ̀ avọọ. Ẹ yaanị aa nyị ehuna anka ahịị̄ mẹẹ kụ enyi na va ha ụtọ irehu avọọ.

¹⁹ Ezi ẹnịnị vaa rụrụ anka aarẹ avọọ. Ọnị vaa mẹ̀ ka asị a nyị ịsị mẹ̀ wa.

²⁰ Ẹ jịnẹ hụrị ẹtẹ Ịbabịrọnị, ẹẹ na hara kẹnẹ! Ẹ ka enube ayohine; dị avaba aza ẹ wụ́ ọ avaba aha tụra aha ka Ẹnẹyịmavara ọ raà dọ ozi ahụ anị Isirẹrị ha.

²¹ Onyi ọ yị kụ wa ịnị ụnọmị ọnị Ẹnẹyịmavara mẹ kụ wa zị. Ộ sị enyi hụụnị ịda yị wa. Ịda ộ ha ẹẹva, di enyi ee si hụụnị anị jịnẹ nị.

²² Ẹnẹyịmavara kà ọza ọhịmị ẹ yị nyị ẹngwọọrọ.