Ayịsaya 44 - IWE ỌNỊNỊ

Ẹnẹyịmavara ọnịnya ọ vị Ohomorihi nị

¹ Ẹnẹyịmavara kà, “Sị ụtọ pe ẹtẹ booro aanị, ẹwụ Isirẹrị, ozi ahụ amị. Ẹwụ nịnị ezi Ijekọvụ, ọnị mị nyị mẹ aza amị.

² Ẹmị a vị Ẹnẹyịmavara ana tụ́ wụ nịnị nị; hụrẹ ụmẹ ana a sị ma wụ, m maa gụ wụ ụvọ nị. Asị ụ hí angwa; ezi ahụ amị ụ vị nịnị nị, ẹma nyị wụ nịnị mẹ aza amị, dị mị sì ịrẹyị awụ nịnị nị.”

³ Ịzị enyi yaa kụ̀, mị vaa sị enyi wụ nịnị, dị mị mẹ ka okuha oo sì ịnị ẹtẹ ana wụ. Mị vaa mẹ ize yi ezi ewu nịnị.

⁴ Ẹngụ ẹnịnị vee hi ahị anka avị enee re enyi hú ẹtẹẹrẹ avọọ. Ẹnịnị vaa yà anka ọchị ana gụrị okuha enee sì avọọ.

⁵ Aza vaa kà a ikonyi-ikonya ka, “Aza Ẹnẹyịmavara mị vị nị”. Ẹ vaa vẹ dị ẹ va vahura Anisirẹrị nịnị, ọzịnya-ọzịnyara ẹnịnị vaa chẹrẹ ịrẹha Ẹnẹyịmavaraa tụ ịnị ọchụvọ anị, dị ẹyaa hị́ ẹngụ ẹnịnị aza Ohomorihi.

⁶ Ẹnẹyịmavara, Ohinọyị Ísirẹrị ana dọ wa ha, Ẹnẹyịmavara Ochẹtẹẹngụ ka: Ẹma vị ọnịpaapa nị, ẹma rẹ vị ọdịrẹma nị. Ẹmị ịnya ọ vị Ohomorihi nị. Ịrẹma amị, ẹ yị nyị Ohomorihi ọsa.

⁷ Ẹnịnị ẹ̀ kà a daa re, ẹnẹ yà anka m mẹ̀ yà? Ẹnịnị ẹ̀ kà a, mị daa re. Ẹnịnị ẹ̀ vaa kà a ịsị ẹ vaa mẹ hụrẹ ụmọrụmọ ọnị, mị mẹ anẹkụra nịnị ọnịrị ịsa ana vaa mẹ.

⁸ Asị ayị hụrẹ wụ ịnẹ, Asị u hí angwa. Aanị ka mẹ yị vịdị sị ọ kà a wụ nịnị hụrẹ ụmọrụmọ, ịsị ẹ vaa mẹ? Ẹwụ nịnị ọ vị onivenu amị nị. Áá nyị Ohomorihi ọsa? Eyiye! Ẹ yị nyị ịda ọsa-ẹyị nyị ọsa.

⁹ Avaba aza anaa mẹ ori vị aza kẹnẹ-kẹnẹ. Ori ẹnẹ vavọọ sị ụbanyị yị, rẹ vị ịsa kẹnẹ-kẹnẹ. Aza anaa hẹkẹ ori ẹnẹẹ vị ogweyi, dị ẹ̀ yị nyị ịsị ẹ yẹ nị. Ohomorihi vị ana vaa mẹ ụhịị nyị wa.

¹⁰ Ẹ̀nẹ rẹẹ mẹ ori, à vị ka dị ọ̀ sị enyusẹ mẹ ụ̀mọ̀mọ́ ẹnẹ ẹ̀ yị nyị ọyịza ọnị ọ zụ mẹ?

¹¹ Re, avaba aza ana hẹkẹ ẹ vị oni Ohomorihi vaa mẹ ụhịị nyị. Aza anaa mẹ ori ẹnẹnị vị azarẹyịrẹsụ. Jẹẹ ẹnịnị ẹ̀ kwẹẹtẹ dị a zama wa re; angwa vee hí wa, dị a mẹ̀ ụhị nyị wa.

¹² Anịngẹrẹ ẹ̀ẹ sị enyusẹ tụ ịnị ịra, dị ẹ sị ihama tụ́ enyusẹ ọnọọ, dị ẹ mẹ̀ ẹ e mè sì. Ọ́ maa mẹ̀ ụkọrọ ọnọọ, ụngwẹ ọnịrị onyi aa kụ̀ ọ, dị ọ sị ngụ ọ ẹngụ.

¹³ Ịkahunta ọ̀ọ mọ ọchị, dị ọ sị ịchọọkị chẹrẹ ẹ. Ọ̀ọ sị ọ chẹrẹ, dị ọ sị ẹnya ụkọrọ anị bẹ ẹ, dị ọ mẹ̀ ẹ anka ọza avọọ. Dị ọ mẹ̀ ẹ anka ọza ene zoza avọọ, dị ọ sị ọ tụ ini eehi anị.

¹⁴ Ọ zụ na dà ọchị isida, àa vị ọchị ooki, àa vị ọchị ịsayịpụrẹsị hụụnị iruku, dị ọ vavọọ sị bẹ ọza jẹẹ. Ộ hyakụ zụ chire ọchị isida, di ee zí ka orihi ọ̀ zụ hi ọ, dị ọ̀ hụ.

¹⁵ Ọza ọ zụ da hụụnị anị dị ọ sị kà ịra, dị ọ rẹ dà hụụnị anị dị ọ sị bẹ ori jẹẹ. Ọ zụ da a kà ịra, dị aa wà a, dị ọ rẹ yà ịnị anị mẹ̀ ịsa rị. Dị ọ sị ana vọ bẹ ori jẹẹ dị aa hẹkẹ ẹ.

¹⁶ Ọkụ ọnị ọ dà hụụnị ọchị ọnọnị, dị ọ sị kà ịra; òo hù uye ịnị anị, dị ọ rị ọ, dị ayị anị ee hine. Ọ̀ọ wà ịra anị, dị ọ ka, eeva! ẹngụ amị ọ sị ngụ ịra. Ịra ọnọnị ộ da zoza kẹnẹ.

¹⁷ Dị ọ sị ọchị ọnọọ ana vọ, dị ọ sị bẹ ori jẹẹ: Òo ku ẹtẹ yọ, dị aa hẹkẹ ẹ. Òo ne tù ọ, dị aa mẹ̀ aduwaa yọ, dị ọ ka, “Dọ mị tụ, ka ẹwa vị Ohomorihi amị nị”.

¹⁸ Ẹngụ aza ẹnẹẹ vị ọnụra. Ẹnịnị ẹ yị yẹ ịsị ẹyaa mẹ. Ẹnịnị ệ sị eyi ẹnịnị kú oku, agụvị asị ẹnị zụ re ẹtẹ. Ệ sị ịsa kú ayị ẹnịnị agụvị asị ẹnịnị yẹ ịsa a vọrọ ka ẹ yẹ.

¹⁹ Ẹ yị nyị ọza ene ro ịrẹyị, ẹnịnị ẹ yị nyị ịrẹyọyẹ ana a vọrọ ka ọ̀ kà a ka, “Mâ sị ịnị ọchị ọnọnị kà ịra; mâ sị akịna anị mẹ̀ ịsa, mê hù uye ịnị anị dị mị rị ọ nị. Vị́ áa vọrọ ka ma rẹ sị ana vọ bẹ ori jẹẹ nị? Áá vọrọ ka ma naa tanaa tụra ẹtẹẹ yị ọchị ana a bẹ?”

²⁰ Vị́ ọ kụkụ sị mẹẹ anka ọza anaa rị atịtọ avọọ nị. Ịrẹyị ụrụụra ẹnẹẹ ro ọ́ raa mẹ̀ ẹ nyeeyi. Ẹ yị zụ dọ ẹngụ anị tụ. Ẹ yị zụ họ̀ ẹngụ anị ka, “ẹ yị vị evene kẹnẹ ori ọnị mị sị rị ụvọ ụvọrị aanị vị?”

Ohomorihi e yi hí ayị Isirẹrị

²¹ Ẹnẹyịmavara kà, “Tamayị ịsa ẹnịnị nịnị, ẹwụ Ijekọvụ. Ẹwụ nịnị Anisirẹrị, tamayị nịnị ka ẹwụ nịnị ọ vị ezi ahụ amị nị. Ẹma tụ́ wụ nịnị ka wa vị ezi ahụ amị nị. Me yị vee hí ayị awụ nịnị.

²² Ma raa kụ ebira edivi ọnị ụ mẹ nịnị kwooze anka eguhi mẹẹ hụ́ avọọ, dị mị kụ́ ịvị awụ nịnị kwooze anka uruvu anaa dàa hụụnị ịsa mee vu avọọ nị. Varẹma ká mị vẹ nịnị, agụvị ka ẹ ma dọ wụ nịnị ha nị.”

²³ Ẹwụ nịnị ẹbẹẹba, wa jị ahẹ nịnị agụvị ka Ẹnẹyịmavara ọ sị ọ mẹ. Ẹwụ aha ana nyịnẹ ịnị ẹtẹ, we nowu nịnị. Ẹwụ nịnị ataba, wa jị ahẹ nịnị. Ẹwụ nịnị avaba ọchị ene hi ini iruku. Agụvị ka, Ẹnẹyịmavara ọ sị Ijekọvụ dọ ha. Anisirẹrị nịnị vaa sị ụbanyịị yọ.

²⁴ Ẹnẹyịmavara ana dọ wụ nịnị ha ka; ọza ana mẹ wụ nịnị tụ́ ịnị ịnẹ ọnyị awụ nịnị ka, “Ẹma vị Ẹnẹyịmavara ana ma avaba ịsa nị. Ẹmị ịnyara ọ mẹ ẹbẹẹba ịzị ọ gana na za nị. Ẹmị ọnọọ ọ rẹ mẹ ẹhẹ ịzị ọ gana na za nị.

²⁵ Mâ kụ ịrẹyị onireche nịnị hi ireche, dị mị mẹ ka ịrẹyị ana aza ana ka eniī re ẹtẹ ka, ọ vị osusu nị. Mâ kụ ịrẹyị ọyẹrẹyị nịnị ha, dị mị sị zụ wa ka ụ̀rà kẹnẹ ịrẹyọyẹ ẹnịnị vị nị.”

²⁶ Ama ozi ahụ amị ọ̀ọ kà ịrẹyị tịtẹ ka ọ vaa mẹ, ịjị màa tụ ọnụtụ amịị tụ ka ọ̀ na kà a ịsị mị vaa mẹ, Mịị̄ mẹ ka ịrẹyị ẹnẹẹ ẹ̀ mẹ ịzẹyịza. Mâ kà a yị Ijerusarẹmị ka aza vanaa ra ịzọọ, dị mị rẹ kà a yị ẹkụra ene hi Ijuda ka e venee tenyi wa dà nị. Mị ka ẹkụra ẹnẹẹ ana jị eburu aanị vanaa kwẹẹtẹ.

²⁷ Ẹ̀ma mẹ ọda ka òkù ọ̀ wụ nị. Mị vaa mẹ irehu awụ nịnị ẹ̀ wụ.

²⁸ Mâ kà a yị Ịsayịrọsị ka, “Ẹwụ mị vana sịị mẹ ohinọyị nị. Ụ vaa mẹ ịsị mi sì ka wa mẹ. Ụ vaa kà a ka è tenyi Ijerusarẹmị varẹma dà, dị e re tenyi Irehi Ohomorihi kà ẹtẹ.”