Ayịsaya 42 - IWE ỌNỊNỊ

¹ Ẹnẹyịmavara kà; “Ozi ahụ amị yị, Ẹma sị ụkata yọ nị. Ma sị ọ nyị̀, ayị amị ô hine tù ọ. Ma raà sị ụhwẹ amịị yọ; Ọ vaa mẹ̀ ebira ana vọrọọ hi avaba anẹhẹ.

² E yị vee nowu, à vị ka ọ̀ sị ọngwẹ tụ ẹba, ọza ẹ yị vaa wụ́ ọ ịrẹyị.

³ E yi vee che ịkẹ ana da gẹnẹ, e yi re vee mí ịrakotupa enee vee mí. Ọ vaa sị ịzẹyịzaa mẹ̀ ịsa ana vọrọ hi avaba aza.

⁴ Ẹ yị vaa tụ ọ, ẹ yị vee du ọ eyi; Ọ vaa mẹ̀ ka à kụkụụ mẹ̀ ịsa ana vọrọ ịnị ẹhẹ, dị anẹkụra ọsa nịnị kukuu ee zi ka ọ̀ va zụ ẹnị ịsa.”

⁵ Ohomorihi ộ mẹ avaba ịsa ene hi ẹbẹẹba, dị ọ gana wa nị. Ọnị ộ mẹ̀ ẹhẹ ọnịrị avaba ịsa ene hi ịnị anị nị. Ọnị ộ mẹ̀ ka aza ene hi ịnị ẹhẹ ẹ̀ yara, dị ẹẹ tụ́ ụhwẹ nị. Ẹnẹyịmavara, Ohomorihi ọ kà a yị ozi ahụ anị ọyaanị ka;

⁶ “Ẹmị Ẹnẹyịmavara ọ hị́ wụ, dị mị sị ụkata wụ nị, dị me re ka aza aa mẹ̀ ịsa ana vọrọ ịnị ẹhẹ. Oze ịnị ịpa awụ mi vee wo otoo yị avaba aza nị. Oze ịnị ịpa awụ mị vaa zịị sị ẹtohweyi vaa yị anẹhẹ nịnị nị.

⁷ Ụ vaa há ogweyi nịnị eyi, Ụ vaa kụ aza ana yaatẹ ịnị etohozi ịnị ẹngwa hi ẹhẹ.

⁸ Ẹma vị Ẹnẹyịmavara nị, ịrẹha amị ọ rị avọọ nị; Mẹ yị vaa sị igirima amịị yị ọza ẹnẹsa, Mẹ yị vaa sị ụga amị yị ori ọnyọọnyị.

⁹ Re, ịsa ẹnị mị vịdị kà a ka ẹ vaa mẹ, ẹ́ va sị mẹ parahu. Ọyaanị, mị vaa kà ịsa ọwọọwaa tịtẹ dị ẹ̀ va mẹ.”

Ahẹ ana a jị gono Ẹnẹyịmavara

¹⁰ Jị ahẹ ọwọọwa gono Ẹnẹyịmavara nịnị. Jị ahẹ gono o avaba ẹwụ nịnị anẹhẹ. Ẹwụ nịnị anaā zị ụsẹ ini òkū ee gono o. Avaba ịsa ene hi ini òkū ee gama a Dị aza ana ra hị́ aha ẹnẹẹnẹ eni e ree gono o.

¹¹ Avaba ụnọmị ọnịrị ẹkụra ene hi ịzọọ ee gono Ohomorihi. Avaba Anikeda ee gono o. Avaba aza ana ra Isera ẹẹ jị ahẹ ịnị ayohine di ee nowu ịrajẹ ịrẹsụ ataba.

¹² Aza ana ra hi aha ẹnẹẹnẹ ee gono Ẹnẹyịmavara, dị ẹẹ sị igirimaa yọ.

¹³ Ẹnẹyịmavara ộ jịnẹ tụ ẹhẹ na kụ̀ ịrẹkụ anka isoja avọọ; O tenyi ẹngụ tenyi, dị ee zí ịrẹkụ nị. Ô họ̀ ogeeke, dị ịrekụ sụ ịrẹyị wanyị nị. Ộ sị ụkata anị zụ̀ ọnịvị anị nịnị.

Ohomorihi ô wo oto ka ọnị vaa gụ aza anị ụvọ

¹⁴ Ohomorihi kà, “O si kù ọnị ọnị hụrẹ chì iriji. Ọnị ẹ yị tụ́ aza anị ohi. Ama booro aanị, o si tu ka a nyị ịsa ọnị ọnị mẹ. Ọnị vee nowu tụ ẹba anka ọnẹẹ anaa barẹẹ avọọ.

¹⁵ Ọnị vee vú otutu ọnịrị ataba ẹtẹ, dị ọnị mẹ ka avị ọnịrị ọchị nịnị ẹ̀ wụ̀. Ọnị vaa vara okuha nịnị ẹtẹ ọpaapara, dị ọnị mẹ imisi nịnị ka ẹ̀ wụ̀.

¹⁶ Ọ kà, ọnị vaa sị ụvọọ gẹ aza anị ene gù eyi vaa tụra oze ẹnẹ ẹnịnị ẹ̀ yị vịdị zị da. Ọnị vaa vara etohozi ẹnịnị ẹtohweyi. Ọnị vaa swa ẹtẹ ana yà boga-boga yị wa. Ịsa ẹnẹnị ọnị wo oto anị ka ọnị vaa mẹ̀ nị. Ẹ yị nyị ka ọnị ẹ yị mẹ̀ ẹ.

¹⁷ Avaba aza ana sị ayị tụra ọnyọọnọkụmị nịnị, dị ẹ yaa hị́ wa ori ẹnịnị, vị ana a vaa mẹ̀ ụhị nyị, dị ụhị aa nyị wa.”

Anisirẹrị nịnị ẹ yị kọ ịrẹyọyẹ

¹⁸ Ẹnẹyịmavara kà, “Sị ụtọ pe ẹtẹ, ẹwụ nịnị ogutọ, Sị eyi pe ẹtẹ, ẹwụ nịnị ogweyi.

¹⁹ Áá nyị ọza ene gu eyi anka ozi ahụ amị? Áá nyị ọza ene gu ụtọ anka ọnụtụ ọnị mịị̄ tụ́ ụtụ?

²⁰ Ẹwụ Anisirẹrị wê re ẹtẹ ọrụrụ-ọrụrụ, ama sị́ ẹtẹ ọnị ụ re va vị yị wụ nịnị? Waa ha ụtọ awụ nịnị ha, ama sị́ ụ daka va wụ́ nịnị?”

²¹ Ayị Ẹnẹyịmavara ô hine, agụvị ịsa ana vọrọ ọnị ọọ̄ mẹ̀. Ộ sị ụbanyị yị ọda anị, dị ọ mẹ ka ọ nyị igirima nị.

²² Ama booro aanị aza anị vị ana a kụ́ ẹnya, di gu oze hi wa tụ ịnị ụsị, dị a kụ́ wa tẹ hi ịnị ẹngwa nị. Â mẹ̀ àko yị wa, dị a kụ wa ẹnya, dị ẹ̀ yị nyị ọza ana gụ wa ụvọ nị.

²³ Áá nyị ọza ịnị awụ nịnị ana vaa sị ụtọọ pe ọsọnị? Ẹnẹ vaa sị ụtọ pe ẹtẹ hụrẹ ụmẹ ọnọnị na?

²⁴ Ẹnẹ hụrẹ Ijekọvụ ụvọ yị aza ana kụ́ wa ẹnya? Ẹnẹ hụrẹ Isirẹrị ụvọ yị anako nịnị? Ẹnẹyịmavara ụvọta, ọnị ị mẹ̀ ebira odivi hii yọ nị. Yẹ̀ yị zẹẹ ka ya ra anka o mè sì, dị yẹ̀ yị zẹẹ ka ya saasa ọda anị nị.

²⁵ Agụvị avọọ, ộ sị ọyịkụ anị zụ yị, dị ọ mẹ̀ ka à kụ́ ịrẹkụ tu yi, dị ya rị ụya nị. Dị ọyịkụ anị rị avaba ẹtẹ Isirẹrị anka ịra mẹẹ rị avọọ. Ama yẹ yị yẹ ịsaa mẹ̀, yẹ yị va kọ ọsẹ ịsa ọnyọọnyị hụụnị anị.