Ayịsaya 41 - IWE ỌNỊNỊ

Ohomorihi ka ọnị vaa gụ Isirẹrị ụvọ

¹ Ohomorihi kà: Avaba ẹwụnị anẹkụra ene enyi kara, jẹẹ sii, dị wa wụ́ ịrẹyị amị nịnị, Tenyi ẹngụ dị wa sị ịrẹyị awụ nịnị tụ ọvịdị ikootu; Ụ vaa nyị ụmẹ ọyị kụ irenu awụ nịnị. Vẹ ya gẹ nịnị, dị ya kà a ọza ana mẹ̀ ịsa ana vọrọ.

² Ẹnẹ sị ohinọyị hụrẹ eyi ịzị ọyịị̄ hụrẹ vẹ? Ẹnẹ sị ụkata yọ anaa sịị nyị ehuna aha tụra aha ọnị ọọ nọ? Ẹnẹ hụrẹ ẹkụra nịnị ọnịrị Ohinọyị ẹnịnị chire e ụvọ? Ộ sị ụhwọ anị wù wa va ha anka ọza o rere banyị edudu ha avọọ. Ọpa anị vị ana gara wa ha anka ahị mẹẹ̄ kụ azịzẹ avọọ.

³ Ọ maa dụ wa, ahụ anị ẹ yị hyakụ da ẹtẹ ọ mẹ rẹ. Ệ yị nyị ịsị ẹ mẹ̀ ẹẹ.

⁴ Ẹnẹ maanị mẹ̀ ẹ? Ẹnẹ nyị ọda tụ ịrẹsụ avaba ịsa anaā mẹ̀ ịnị ẹhẹ? Ẹnẹyịmavara ka Ọnị ana ya ịzọọ hụụnị oyinyima, ana rẹ vaa ya ịzọọ pooro na ngụ ẹhị yọ nị.

⁵ Ẹkụra ọnị enyi kara nịnị me reè re ịsa ọnị ọnị Ẹnẹyịmavara mẹ̀, dị ívoovo za wa, dị ẹ yaa banyị papapa angwa mee hi wa nị. Agụvị avọọ, dị ẹ kụ ẹngụ gụ dị ẹ vẹ nị.

⁶ Dị ẹnịnị aa tụ́ ẹngụ ọtụtụrụma, dị ẹ ka ọzọza ọ jẹẹ geri-geri nị.

⁷ Dị ọza ana aā bẹ ọchị ọnịrị ọza eneē tu igooru ne beri anịngẹrẹ nịnị eneē tu ọnyịnọkụmị aa tụ ẹngụ ọtụtụrụma, dị ẹ yaa kụ ẹngụ akọrọ nị. Ẹ kà ọyị sị oje kụ ọnyịnọkụmị gẹ o zoza, dị ẹẹ sị iso za a vakẹtẹ agụvị asị ọ hyẹdụ.

⁸ Ama ẹwụ Isirẹrị ozi ahụ amị, ẹwụnị ezi Ijekọvụ ọnị Ẹnẹyịmavara nyị̀, ana vị evere Abụrahamị ọta amị.

⁹ Ẹnẹyịmavara kà ọnị ộ kụ wụ nịnị hụrị avaba ẹhẹ, dị ọnị hị́ wụ nịnị hụrị aha onoze nị, dị ọnị kà a yị wụ ka ezi ahụ anị ụ vị nị. Ọnị ọ nyị̀ wa nị. Ọnị ẹ yị hụrẹ wa ụvọ.

¹⁰ Asị ụ hi angwa ka ọnị ya pe wụ nịnị! Ọnị ọ vị Ohomorihi awụ nịnị, asị ụ hi angwa. Ọnị vaa sị ụkata yị wụ nịnị, dị ọnị gụ wụ nịnị ụvọ, Ọnị vee sere wụ, dị ọnị dọ wụ ha.

¹¹ Aza anaa kụ́ ayị hi wu nini vị ọnị ụhị vaa nyị. Aza ana va eyi ịrazị ka wụ nịnị vị ene vee vu ẹtẹ

¹² dị ẹ ta hụụnị ẹhẹ.

¹³ Ẹnẹyịmavara kà ọnị ọ vị Ohomorihi awụ nịnị nị; Ọnị vaa sị ụkata yị wụ. Asị wụ hí angwa ka ọnị vaa gụ wụ ụvọ.

¹⁴ Ẹnẹyịmavara kà; Isirẹrị ọ̀ọ daka weyi, dị ọ vị ọkụmị nị, asị ọ hụrẹ ayịnẹ ka ọnị vaa gụ ọ ụvọ. Ọnị ana vị Ohomorihi ọnịnị Isirẹrị ọ vaa dọ ọ ha nị.

¹⁵ Ẹnẹyịmavara kà ọnị vaa mẹ̀ ẹ anka arubebe ọwọọwa eneē sii tu ayị avọọ. Avaba ataba vị ọnị ọ vaa kwọrọ zẹtẹ, di o du ọ ha; otutu vị ọnị ọ vaa kwọ, dị ọ vara a edudu;

¹⁶ di o hira a hi ịnị ahị, dị ahị kụ ọ ne hu, di opomi gara a hi ozi. Ịjọnọọ ayị ẹnịnị vee hine agụvị ka ọnị ọ vị Ohomorihi ẹnịnị nị. Ẹnịnị vaa ga ọnị, Ẹnẹyịmavara Ohomorihi ọnịnị Anisirẹrị.

¹⁷ Ụmẹ ọnị onosiye ọnịrị ọnụzọngwa ee si enyi, di e yi re, dị ọrọkọ ẹnịnị sị wara, Ọnị Ẹnẹyịmavara vee tụ́ wa ohi. Ohomorihi Anisirẹrị ẹ yị vaa hụrẹ wa ụvọ.

¹⁸ Ọnị vaa mẹ̀ ka okuha oo si hụrẹ ịrẹsụ otutu nịnị ana sị wụ̀, di enyi ee si ịnị ozi, di enyi hi ụnọmị ana vịdị wụ̀ anka imisi avọọ, dị enyi ee si ịnị ẹtẹ ana vịdị wụ̀ korowu.

¹⁹ Ẹnẹyịmavara kà ọnị vaa mẹ̀ ka ọchị Isida, ọnịrị akasiya beri Imatiri ọnịrị orivi ẹ hụ ịnị ụnọmị. Ẹtẹ ana wụ̀ vaa vara iruku ịpayịnị ọnịrị ijunipa beri isipirẹsị.

²⁰ Aza vee re ịsa ẹnẹnị, dị ẹ yẹ ka ọnị Ẹnẹyịmavara ộ mẹ̀ ẹ nị. Ẹ vaa yẹ ka Ohomorihi ọnịnị Anisirẹrị ộ vavọọ mẹ̀ ẹ nị.

Ẹnẹyịmavara ô hị́ ori nịnị ịrẹkụ

²¹ Ịsị Ẹnẹyịmavara ana vị ohinọyị Anisirẹrị kà a yị: Ẹwụnị ori anẹkụra nịnị va kụ irenu awụ nịnị. Sị ohi awụ nịnị ene hu kere-kere vẹ.

²² Ka vẹ, dị wa kà a ịsa ana vaa mẹ̀, agụvị ya yẹ ụmẹ ọnị ọ̀ọ vaa sịị mẹ̀. Kà a yị ikootu ịsa ana vịdị mẹ̀ ọnịrị ịsị ẹ vị iruvo anị.

²³ Kà a yị yị ịsị ẹ vaa mẹ̀ ụhwọọ agụvị ya yẹ ka ori ụ vị nị. Mẹ̀ kà etore awụ nịnị ọ sẹ. Mẹ̀ ịsa ọyịza, a vị ịsa odivi ọnya ene ve chire ọza angwa.

²⁴ Ẹ yị nyị ịsị wụ vị. Wẹ yị nyị ụkata ọnyọọnyị. Aza ana hẹkẹ wa vi ene du ha.

²⁵ Ẹnẹyịmavara kà ọnị ọ raà nyị̀ ọdọvịdị hụrẹ eyi ẹbẹẹba ọnịrị eyi ịzị ọyịị̄ hụrẹ vẹ ka o vị eyi ịraazị ka anẹkụra nịnị. Ọnị vaa sị ọ nyị ẹbẹẹba ohinọyị nịnị anka ọjụnọkọ nịnị mẹẹ sị ahụ pịrị ụmọpa avọọ.

²⁶ Àa nyị ori ana ka ịrẹyị ana sẹ? Àa nyị ori ana ka ịrẹyị ana gẹẹ? Ẹ yị nyị ọza awụ nịnị ana ka ịrẹyị ni ịnị anị, dị ẹ yị nyị ọza ana wụ́ ịsa ọnyọọnyị hụụnị ụvọ ori nị.

²⁷ Ẹnẹyịmavara kà ọnị ọ vị ọnịpaapa ana ka enube yị Ịzayọnị nị; Ọnị ọ tụ ọnụtụ hi Ijerusarẹmị ka aza ẹnịnị va vaa vẹ eehi nị.

²⁸ Ịjị ọnị kana eyi, ẹ yị nyị ọnya ịnị ori ẹnẹnị ana nyị ịrẹyị ọyị kà. Ẹ yị nyị ana nyị ohi tụ ịnị ịrẹyị ọnị ọnị họ̀ use anị.

²⁹ Ẹ yị nyị ịsị avaba ori ẹnẹnị vị. Ẹ yị nyị ịsa ọnị ẹ zụ mẹ. Ẹnịnị ẹ yị nyị ụkata, ọkụmị ẹ vị nị.