Ayịsaya 39 - IWE ỌNỊNỊ

Ọnụtụ ana hụrẹ Ịbabịrọnị vẹ

¹ Ịnị ụmẹ ọnọnị gẹdẹ-gẹdẹ Imerodachị-Ibaradanị, ozi Ibaradanị ana vị ohinọyị Ịbabịrọnị sị wụ́ ka ẹngụ aa zị Ihezekaya nị. Agụvị avọọ ộ chẹrẹ iwe, dị ọ sị ẹyịza beri ọ tụ́ hi Ihezekaya nị.

² Ihezekaya ộ sì ọnụtụ ẹnẹẹ ọzọga, dị ọ sị ogu ọnị ọ nyị zụ wa nị. Ộ sị igooru, isiriva, eturare, ohuru-ohuru ọnịrị enyinyi ne beri ẹnya ịrẹkụ isoja anị zụ wa. Ẹ yị rẹ va nyị ịsa anị ene hi ịnị aku anaā sịị ịsa tẹ̀ aha tụra aha ini ẹtẹ anị ọnị Ihezekaya ọ yị sị zụ́ wa.

³ Dị ọnịsẹ Ayịsaya ne tụ ohinọyị Ihezekaya, dị ọ họ̀ ọ ka ịzị aza ẹnẹẹ hụrẹ vẹ? Ịsị ẹ ka yọ? Dị Ihezekaya kà Ịbabịrọnị, aha ene noze ẹ hụrẹ vẹ nị.

⁴ Dị Ayịsaya rẹ họ̀ ohinọyị ka ịsa o re ini irehi anị nị? Dị Ihezekaya va ohi yị ọ ka avaba ogu ọnị ọnị nyị. Ẹ yị nyị ịsa ẹ vọ tụ́ ịnị aku ana kú ẹnya hi ọnị ẹnịnị e yi re.

⁵ Ayịsaya kà yị ohinọyị Ihezekaya ka Ẹnẹyịmavara Ochẹtẹẹngụ ka,

⁶ Ẹkụhị aa vẹ a vaa kụ́ avaba ịsa ene hi ịnị irehi anị, ọnịrị avaba ịsa ọnị ohiku ẹnịnị raà kụ́ tẹ̀ va ngụ ụmẹ ọnọọ nọ Ịbabịrọnị, Ẹnẹyịmavara kà ẹ yị nyị ịsa ana vaa vọ.

⁷ Ezi ẹnịnị ẹnyị ana a vaa mà vị ana vaa za ọrịhị nọ ẹkụra ọsa, dị a mẹ̀ wa osuretu tu ịnị eehi ohinọyị Ịbabịrọnị.

⁸ Dị Ihezekaya tụ́ Ayịsaya ohi ka ịrẹyị ọnị Ẹnẹyịmavara kà o zoza. Ama ọnị ô ro o, Áa vaa nyị ẹngwọọrọ ọnịrị ọyịtụreyi ịnị ụmẹ anị?