Ayịsaya 38 - IWE ỌNỊNỊ

Ẹngwọzị Ihezekaya

¹ Â nyị ụmẹ ọnya aanị ọnị ẹngụ sị zị Ihezekaya, dị ọ sị vọ chee di o su. Ọnịsẹ Ayịsaya ana vị ozi Amozi ô ne tu ọ dị ọ kà, Ẹnẹyịmavara kà o tenyi irehi anị agụvị ka ẹ yị vaa zụ rị ụkụ anị ọnọnị, ee su nị.

² Di Ihezekaya va eyi ka ugene, dị ộ mẹ̀ aduwa hi Ẹnẹyịmavara nị.

³ Ọ kà, Ẹnẹyịmavara ọ tamayị ka ọnị ọ raà sị avaba ayị mẹ ịzẹyịza, dị ọnị rẹ mẹ̀ ịsa ana vọrọ eyi anị nị. Dị ọ nyayịnẹ jị òrèrè ẹtẹẹtẹrẹ nị.

⁴ Ịjọnọọ, dị Ẹnẹyịmavara pè Ayịsaya kà ịrẹyị nị.

⁵ Ọ kà ọ na ka yị Ihezekaya ka, Ẹnẹyịmavara Ohomorihi ada anị Idevidi ka ọnị ọ raà wụ́ aduwa anị, di oni reè re orere anị nị. Ọnị vaa da ịrayị ẹwụrẹhị tụ́ ịnị ẹhẹ anị yọ.

⁶ Ọnị rẹ vaa dọ ọnịrị ẹkụra ọnọọ ha hụụnị ụvọ ohinọyị Anasiriya. Ọnị vaa vụ ịrẹvụ yị ẹkụra ọnọọ nị.

⁷ Dị Ayịsaya ka apọtẹrẹwa ọnị Ẹnẹyịmavara vaa sị zụ ka ọnị vaa mẹ ịsị ọnị ka yị:

⁸ Ụmọmọ vaa nọ ọvịdị ahụ ẹẹwụ, dị ọ rẹ va nọ ịrẹma ahụ ẹẹwụ.

⁹ Ẹngụ ana zị Ihezekaya ohinọyị Ijuda mẹ ta, ahẹ ọnị ọ́ chẹrẹ yị.

¹⁰ Me roo ka ịnị ẹnẹnẹ viri-viri ẹhẹ anị, ị mee vee su hụrẹ ẹhẹ aanị nọọ Dị ẹhẹ amị kara ụpa

¹¹ Me roo ka ịnị ẹhẹ ọnọnị ọnị ẹyị ọza va ra aanị mẹ yị kụkụ vene re Ẹnẹyịmavara Ẹ yị nyị anẹhẹ ọnị mị venee re.

¹² Ẹhẹ amị vị ana da ẹjịjị, dị ọ ta anka ajẹngụ oseratẹmẹ ene wú avọọ. Ma raà kara ụvẹnẹ ẹhẹ amị kwooze anka ọza eneē hí ịta, mẹẹ̄ jị ọ avọọ. Ohomorihi vị ene ee tura orupa ụhwẹ ọọdụ ọnịrị ịrahụ

¹³ Avaba ịrahụ vị ọnị mẹ sị jị òrèrè pooro dị eyi aa nị, O che ẹchụkụ amị hi mi ẹngụ anka idu avọọ nị. Ohomorihi vị ene ee tura orupa ụhwẹ ọọdụ ọnịrị ịrahụ

¹⁴ Mị vụrị ee nowu anka inomi ịnị avị, di mee tii anka arivadi avọọ nị Eyi anị ọ sị kata mm mẹ kụ eyi hi ẹbẹẹba ee zi Ananyị mị va gụ mị ụvọ hụụnị akanya amị.

¹⁵ Ama sị mị vị ana zụ ka? Ẹnẹyịmavara ộ mẹ̀ ịsa ọnọnị nị. Ayị amị o si du chuku-chuku, mẹ yị nyẹngụ sụ ara.

¹⁶ Ananyị yị ẹwụ kẹnẹ mị vaa ra yị nị, ẹwụ kẹnẹ ọ vị ẹhẹ amị nị. Navọ wa mẹ mị ụkụ, dị wa navọ ka ma yara.

¹⁷ Ayodu amị ọ vara ẹngwọọrọ. Dọ ụhwẹ amị ha hụụnị usu. Jị eyi vee hụụnị ịnị avaba ebira odivi ọnị mẹ mẹ̀.

¹⁸ Oku ẹ yị kụ wụ avọ, avị ka ọ zụ ha va ga wụ. Ọza ene su ọ yị zụ sị ayị tụra ịzẹyịza awụ.

¹⁹ Ọza ana yara ọ zụ ga wụ anka mm ma mẹ ajịnị aanị. Aza ana ma ezi ẹ̀ ka yị wa ẹwụ Ohomorihi mẹmẹ nyị ịzẹyịza nị.

²⁰ Ẹnẹyịmavara vaa dọ mị tụ̀. Ị vaa jị ahẹ di yee hụ́ ịsa ga a ịnị avaba ẹhẹ ayị ịnị irehi Ẹnẹyịmavara.

Ajiwe ọnị Ayịsaya sị yị Ihezekaya

²¹ Ayịsaya ộ ka yị ohinọyị ka a kwọ avị ihwigi tụra ịtahụ anị ka ọ vaa vị.

²² Ihezekaya ô họ̀ use ka ịsị ẹ vaa apọtẹrẹwa ka ọnị vaa zụ hịrẹ nọ ịnị irehi Ohomorihi?