Ayịsaya 37 - IWE ỌNỊNỊ

Ihezekaya ô họ̀ use ajuwe hụụnị ụvọ Ayịsaya.

¹ Ịjị Ihezekaya ohinọyị wụ́ enube ẹnịnị kẹnẹ, dị ộ na awuru anị, dị ọ sị achị anaā sịị zị ẹngụ chẹrẹ, dị ộ nọ irehi Ẹnẹyịmavara Ohomorihi nị.

² Ịzọọ ọ ya dị ọ tụ́ Eriyakimi ene si eyi pe irehi ohinọyị ọnịrị Ịsẹbina ọchẹrịsa ikootu, ne beri ohirẹsụ ọbanyị irehi Ohomorihi ne tù Ayịsaya ozi Amozi nị.

³ Ihezekaya kà a kà a yọ ka ịhị ọnọọ ọ vị ẹkụhị ayodu, ụyọrị ọnịrị ụhị yị ẹnị nị. Ọ kà ẹnị sị mẹẹ anka ọnyẹnẹẹ ana ba ịrẹẹ, dị ẹ yị nyị ụkata ma a avọọ nị.

⁴ Ẹyịyara Ẹnẹyịmavara Ohomorihi anị ộ wụ́ ịrẹyị isiya ọnị ohinọyị Anasiriya mẹ tụ ozi ahụ anị Irabisake hi Ohomorihi ẹnịnị ana yara. Agụvị avọọ, Ayịsaya ọ kwẹẹtẹ o mẹ̀ aduwa yị aza ẹnịnị ana vọ.

⁵ Ayịsaya mẹ wụ́ enube Ihezekaya ohinọyị kẹnẹ,

⁶ Ô sị ohi na yọ nị. Ọ kà a kà a yọ ka Ẹnẹyịmavara kà asị o hí angwa ka ohinọyị Anasiriya ộ kà a ka ọnị ẹ yị zụ dọ ọ ha.

⁷ Ẹnẹyịmavara vaa mẹ ka ohinọyị Ásiriya ọ̀ wụ́ ihuhu, ana vaa mẹ ka ọ̀ varẹma ọọ nọ ẹkụra anị ịzị a vaa sị ụ̀hwọ̀ wụ̀ ọ.

Anasiriya nịnị ê re ve wo hi Ijerusarẹmị

⁸ Ọdọvịdị Anasiriya ộ wụ ka ohinọyị ẹnịnị ọ raà hụrị Irakisi. Ộ wụ ka ọnịrị anẹkụra ana gụrị wa ana aā hị́ Iribina aa kụ̀ ịrẹkụ, dị ọ nọ ịzọọ ne pe e ka ịrẹyị nị.

⁹ Anasiriya nịnị ệ wụ ọ ka Itirihaka, ohinọyị Etiyopiya ana raa hị́ Ikusi, ọ́ raà kụ isoja Anijipiti ee vee pe ẹnịị kụ̀ ịrẹkụ. Ịjị ohinọyị Asiriya maanị wụ, ộ sị iwe tụ hi Ihezekaya, ohinọyị Ijuda.

¹⁰ Ộ kà a yọ ka: Ori ọnị ọ́ sị ayị tụra ọ́ raà kà a yọ ka ụvọ anị ẹ yị vaa kara a. Ama à sị ọ zẹẹ ka ịrẹyị ọnọọ ò vene ọnị o.

¹¹ Ọ kà Ihezekaya ộ wụ ịsa oni ohinọyị Asiriyaā mẹ ẹkụra ọnị ộ raà kà a ka oni ee vu ẹtẹ. Vi Ihezekaya wéé roo ka ọnị vaa ha nị?

¹² Ọ kà ohiku anị nịnị ê vu ẹkụra ana aā hị́ Igozanị, Ịharanị, ọnịrị Ịrẹzẹhwị ẹtẹ. Ẹnịnị ệ wụ Anedẹnị nini ana ra hi ịzị aā hị́ Iterasa, ẹ yị nyị ori ẹnịnị ana va zụ dọ wụ tụ.

¹³ Ọ kà ịzị ohinọyị ẹkụra ana aā hị́ Ihamati, Aripadi, Isehwaveyimi, Ihena, ọnịrị ohinọyị Iva nini hi?

¹⁴ Ihezekaya ộ dọ iwe ọnọọ hụụnị ụvọ ọnụtụ ẹnẹẹ, dị ọ kà a nị. Ọ sị ọ ka, dị ọ nọ ini Irehi Ẹnẹyịmavara, dị ọ sị tụ ọvịdị Ẹnẹyịmavara nị.

¹⁵ Ộ mẹ̀ aduwa, dị ọ ka:

¹⁶ Ẹwụ Ẹnẹyịmavara, Ohomorihi Anisirẹrị nịnị, ohinọyị ana ya ẹbẹẹba anggẹẹrị nịnị, ẹwụ ịnyara ọ vị̀ Ohomorihi nị. Ẹ wa vị ohinọyị avaba ẹhẹ nị. Ẹwụ tụ ẹtẹ ọnịrị ihinẹba nị.

¹⁷ Ẹnẹyịmavara, re ịsị aa mẹẹ tu yị booro aanị, wụ̀ avaba ụhụ ọnị Isenakeribi aa kụ̀ ẹwụ Ohomorihi ana yara aanị.

¹⁸ Ihezekaya ka: Ẹnẹyịmavara, Ịzẹyịza yaa yẹ ka ohinọyị Asiriya nịnị vu anẹkụra ọrụrụ-ọrụrụ ẹtẹ, dị ọ tụ ẹtẹ ẹnịnị osusu nị.

¹⁹ Ộ rị avaba ori ẹnịnị ịra va ha. Ẹ yị nyị ịsị ori anẹkụra ẹnẹẹ vị. Uyi ana aza sị ọchị ọnịrị ịrẹta mẹ̀ ẹ vị nị.

²⁰ Ọ kà, Ẹnẹyịmavara, Ohomorihi ẹnịnị ọ̀ dọ ẹnị ha booro aanị hụụnị ụvọ Anasiriya nịnị; agụvị dị avaba anẹkụra ene hi ẹhẹ ẹ̀ yẹ ẹwụ ịnyara, Ẹnẹyịmavara ọ vị Ohomorihi nị.

Enube ọnị Ayịsaya kà yị Ohinọyị

²¹ Ayịsaya ộ tụ́ ụtụ ne tu ohinọyị Ihezekaya ka, agụvị aduwa ọnị ọ mẹ,

²² Ẹnẹyịmavara kà, Anijerusarẹmị vee nyí wu unyi, ẹwụ Isenakeribi, dị ẹẹ sị wụ mẹ ịyẹyẹ.

²³ Eni u ro ka ụ maanị aa kụ̀ ụhụ, dị waa sị ọ me enyinyị? Wẹ́ yị sị ụbanyị yị ẹmị Ohomorihi Anisirẹrị ẹnẹ ẹ̀ yị nyị ẹngụ anị.

²⁴ Wâ tụ́ ọnụtụ awụ nịnị ka è vee wo oto hi mi ka wâ kụ aza awụ anaā sịị ịkẹkẹ kụ̀ ịrẹkụ, dị ụ kụ ịrẹkụ na rị ataba Ịrẹbanọnị ana nẹba hu nị. Wâ nyị irenu ka ọchị isida ana gọdọ hu keekere, ọnịrị ọchị Ịsayịpụrẹsị ene zoza hu keekere vị ọnị ụ má va hi ẹtẹ. Ụ ka aha ene noze hu ini iruku vị ọnị ụ ngụ.

²⁵ Ẹnẹyịmavara kà ẹwụ Isenakeribi ộ nyị irenu ka, wa chị́ ịkangga tụ ẹkụra aza ẹnẹsa, di u hú enyi anị nị, ụ ka isoja awụ ệ kụ́ ahụ hi Irehu Ịnayịrị para hu, dị ọ wụ nị.

²⁶ Ọ kà, aanị ka wẹ́ yị wụ ọ ka, o si ku ọnị ọnị hụrẹ mẹ eto avaba ọsọnị tịtẹ? Ọnị ọ va sị ọ mẹ booro aanị. Ọnị ộ sị ụkata yị wụ ka wa jị ẹkụra ana jị ọvọ kara eburu.

²⁷ Aza ana ra hi ẹkụra ẹnẹẹ ẹ yị nyị ụkata vụrụ-vụrụ. Angwa ộ hí wa, dị ẹnịnị vazi nị. Ẹnịnị vị ana sị mẹẹ avị ana chị́ hi ịnị aarẹ, à vị avị ana chị́ tụ ịrẹsụ irehi avọọ, dị ahị ịrịịra tụ́ hụrẹ eyi ọnị ọyịị̄ zịị vẹ, dị ọ va kụ wa kwooze nị.

²⁸ Ẹnẹyịmavara kà, ama oni ộ yẹ avaba ịrẹyị awụ. Ọnị ộ yẹ ịsị ụụ̄ mẹ, ọnịrị ịzị ụụ̄ nọ, ọnị ộ yẹ ụ mẹmẹ aa kụ́ ayịị hi ọnị.

²⁹ Ọnị ọ raà wụ enube ọyịkụ awụ ọnịrị ụ mẹmẹ aa sị ẹngụụ tụ ẹba. Booro aanị, ọnị vaa jị arịị chire wu aahị, dị ọnị ka enyusẹ ngụ wụ irenu, ọnị vaa sị wụụ zi oze ọnị ụ zị vẹ gẹdẹ-gẹdẹ avọọ varẹma.

³⁰ Dị Ayịsaya va kà a yị ohinọyị Ihezekaya ka: Apọtẹrẹwa ịsị ẹ vaa mẹ yị: Ayịrọnị ọnịrị ụpọsa, apaapa ana chị́ hi ịnị avị kẹnẹ ụ vaa rị nịnị nị. Ama ịrayị anaa vaa tụra a vẹ u ve zuu chire apaapa awụ, dị ụ ha a. Ụ vee chire ụbazị ịvayịnị, dị ụ ha ẹtụtụ anị.

³¹ Aza ana vọ hi Ijuda vị oni o vee zee yi, dị ẹẹ sị mẹẹ anka ọchị ẹnẹ ẹpa anị ngụ ẹtẹ ẹtẹẹtẹrẹ, dị aa tụ́ ẹtụtụ.

³² Aza vaa vọọ hi Ijerusarẹmị ọnịrị ataba Ịzayọnị, agụvị ka Ẹnẹyịmavara ọ sị ẹngụ tenyi ka ọnị vaa maanịị mẹ̀ ẹ.

³³ Aanị Ẹnẹyịmavara mẹ̀ kà ịnị ịpa ohinọyị Ásiriya nị: Ọ kà, ẹ́ yị vaa ngụ Ijerusarẹmị E yi vee ne ọpa ikonyaa hi ọ. Ẹ yị nyị isoja ana kụ ogonto rị ụvọ ana vaa kà a gụrị ẹkụra ọnọnị. Ọza ẹ yị vaa kụ́ ezii na hịrẹ ọvọ anị.

³⁴ Ọnị Ẹnẹyịmavara ọ sị ọ ka, ka; oze ọnị ọ́ zị vẹ, ọ́ va zịị varẹma nị. Ẹ yị vaa jị ahụụ ngụ ẹtẹ Ijerusarẹmị.

³⁵ Ọnị vee sere ẹkụra ọnọnị, dị ọnị ẹ yị zẹẹ ka à nyị ịsị ẹ mẹ̀ ẹ agụvị ụbanyị ọnị ọnị sị yị ịrẹha anị, ọnịrị agụvị oto oni ọnị wo yị Idevidi ozi ahụ anị.

³⁶ Ịrahụ ịhị ọnọọ anggẹẹrị Ẹnẹyịmavara ọnya, ộ nọ udi Anasiriya nịnị, dị ọ wụ̀ isoja akawụ-akawụ oze ẹnarẹwụ tụra ẹẹva beri akahị (185,000) nị. Etumeyọnị eyinẹhẹ anị, dị avaba ẹnịnị vavọọ su vẹẹrẹ hi ẹtẹ nị.

³⁷ Di Isenakeribi ohinọyị Ásiriya và hụụ ịzọọ varẹma nọ Ininivẹ nị.

³⁸ Ẹkụhị ọnya, ộ yà ini irehi ori anị ana aā hị́ Inisirochi aa mẹ ahẹkẹ. Â nyị ẹẹva ini ezi anị ana aā hị́ Adiramẹrẹkị, ọnịrị Ịsarẹzẹrị. Ẹnịnị ệ tụ̀ ụhwọ, dị ẹ wụ̀ ọ nị. Ẹ sị ọ wụ, di e zwe ne hi ẹtẹ Ararati nị. Dị ozi anị ọsa ana aā hị́ Esahadoni rị ohinọyị dọ ọ ịrẹsụ nị.