Ayịsaya 36 - IWE ỌNỊNỊ

Anasiriya ê chire Anijerusarẹmị angwa

¹ Ịnị ịrayị ana tụ́ ọ ịrayị ẹwụrẹna ọnị Ihezekaya vị ohinọyị Ijuda, Isenakeribi ohinọyị Isiriya sị kụ́ ịrẹkụ ngụ ẹtẹ Ijuda, dị ọ rị avaba ẹkụra ana jị ọvọ kara ene hi ịnị anị nị.

² Di Ohinọyị Isiriya tụ́ Irabiseki ọga isoja anị beri ọkọnị isoja hụrẹ Irakisi ne tù Ihezekaya Íjerusarẹmị nị. Ọga isoja ọnọọ ô tù oze enyi ana yà akẹbẹẹba adagu ana yà oze ịnị ẹtẹ ọnyịnịsa.

³ Di Eriyakimi ozi Ihirikaya ana sị eyi pè ohweje ohinọyị ọnịrị Ịsẹbina ana vị ọchẹrịsa ne beri Ijowa ozi Asahwi ana sị eyi pè iwe ene hi ini ịda ohinọyị jịnẹ, dị ẹ na gẹrị ọga isoja ọnọọ nị.

⁴ Dị ọga isoja ọnọọ kà a yị wa dị ọ ka ọ̀ kà a yi Ihezekaya ka ohinọyị ọbanyị ọbanyị ana vị ohinọyị Anasiriya ọ tụ́ ọnị vẹ nị. Ọ kà ohinọyị Anasiriya ka à họ̀ wa ka sị ẹ sị ayị tụra dị ẹ maanị nyị ọtụtụrụma?

⁵ Ọ kà èe ro ka isoja ẹnịnị ộ nyị ụkata dị ẹnị rẹ yẹ eyi ịrẹkụ nị, irenu kẹnẹ ẹ yaa kụ́ nị. Ọ kà sị ẹ sị eyi kà, dị ẹ yaa kụ̀ụ hịrẹ ohinọyị Anasiriya.

⁶ Dị ọga isoja ọnọọ rẹ ka ohinọyị Asiriya ka à họ̀ wa ka a vi Anijipiti ẹ sị eyi kà a? Ọ kà Anijipiti vi okutẹ ẹpọmọ, ọza òo che ayị za a, di o che, dị ọ varẹma há kụ́ ọ ụvọ. Ọ kà avọọ Íhwarawo ana vị ohinọyị Anijipiti mẹ̀ vaa tẹ avaba aza ana sị ayị tụra a nị.

⁷ Dị ọga isoja Anasiriya rẹ ka vi Anijuda wáá ka Ẹnẹyịmavara ana vị Ohomorihi ẹnịnị ẹnị sị ayị tụra nị? Ọ kà àa vị avọọ yọ, ẹ́ẹ́ yẹ ka Ihezekaya o reè wu avaba ịzị a yàa hẹkẹ ẹ, dị ọ ka Anijerusarẹmị ọnịrị Anijuda ẹ kụkụụ hẹkẹ ẹ aha ọnya nị?

⁸ Di isoja ọnọọ rẹ ka ẹ̀ vẹ dị ọnị ọ̀ sị ụkata ọga anị dị ọnịrị wa ò si gẹ eyi nị. Ọ kà ọnị aa kụ́ umaata akawụ yị wa, èe zụ re ọza ana vaa tụra wa.

⁹ Ọ rẹ ka isoja Anisirẹrị ọnịrị isoja Anasiriya ene weyi hu keekere ẹ yị hyakụ vị ọpa. Ọ kà ẹ̀ẹ daka si eyi tụra Anijipiti ka ẹ̀ kụ́ umaata ọnịrị isoja vẹ ẹ yị yị nyẹngụ dụ isoja Anasiriya ikonya varẹma.

¹⁰ Dị ọga isoja Anasiriya rẹ ka Ẹnẹyịmavara ọnị ụvọta ọ kà a ka ọnị ọ̀ kụ isoja vẹ, dị ọnị ọ̀ sị va wụ anẹkụra ẹnẹnị nị.

¹¹ Di Eriyakimi ọnịrị Ịsẹbina ne beri Ijowa ve tụ́ ọga isoja Anasiriya ọnọọ ohi dị ọ ka Aarịhịnị de, ọ̀ọ kà ẹkụra Aramayikii yị ẹnị ka ẹnị ệ wụ́. Ẹ ka asị isoja ọnọọ rẹ ka ẹkụra Ihiburu ka aza eni hi ịrẹsụ ọvọ va sị wụ́.

¹² Dị ọga isoja Anasiriya ọnọọ ka, “Aanị ka ẹwụrị ọga awụ nịnị ịnya kẹnẹ a tụ́ mi hi ka ma kà ịrẹyị ẹnẹnịị yị nị? Aza ene hi ịrẹsụ ọvọ avọọ vi ana a ka ma rẹ kị kà a yị bẹẹ. Ịrẹyị ọnya o vee tù wu nịnị nị, dị waa dà ịhyẹrẹ awụ nịnị rị, di u ree hú eehenyi awụ nịnị.”

¹³ Dị ọga isoja Anasiriya kụkụ kwẹẹtẹ dị aa si Ihiburuu kà ịrẹyị baaba dị ọ ka, Ọzọza ò batọ oo, dị ọ̀ wụ́ ịrẹyị oni ohinọyị ọbanyị Anasiriya kà.

¹⁴ Ọ kà ma kà a wụ nịnị ka asị ụ zẹẹ ka Ihezekaya ò vene wu nịnị. Ọ kà Ihezekaya ọ yị va zụụ dọ wụ nịnịị̄ tụ́ oo!

¹⁵ Ọ kà Ihezekaya àa kà a wụ nịnị ka Ẹnẹyịmavara vaa dọ ẹkụra ọnọnịị tụ́ dị asị ịrẹkụ Anasiriya rị ọ, asị u tụ́ o ohi nịnị.

¹⁶ Asị ụ sị ụtọ tụ́ ịnị ịrẹyị oni Ihezekaya aa kà nịnị. Ohinọyị Anasiriya ka wa jịnẹ hi ẹhẹ dị wa kà a ka wâ dọ ka oni o huna wụ nịnị nị. Ọ kà wàa vavọọ mẹ nịnị, ẹ yị kụkụ vaa nyị ịrẹyị. Dị ọzọza aa rị ịsa ọnị ọ kụ́ tụ́ ịnị aarẹ, di o ree hú enyi ịnị ịkangga anị.

¹⁷ Ohinọyị ka ọ̀ọ dà mẹ dị ọnị tụ́ va kụ́ wụ nịnị ne hi ịnị ẹtẹ ana rẹ yà anka ẹtẹ awụ nịnị avọọ. Ọ kà ẹtẹ ọnọọ̄ mẹ̀ ịsa, ịsọyịrị vị ana gụ ịnị anị.

¹⁸ Ohinọyị Anasiriya ka Ihezekaya àa kà a ka Ẹnẹyịmavara vaa dọ wụ nịnịị tụ́, asị ẹwụ nịnị tụ́ o ohi oo! Ọ kà ẹwụ nịnị ọ́ọ́ wụ́ ọ da ka â nyị ori anẹkụra ọnyọọnyị ana zụ dọ aza anị hụrẹ ụvọ ohinọyị Anasiriya?

¹⁹ Ọ kà ẹwụ nịnị ọ́ọ́ tamayị ori Ihamati ọnịrị Aripadi ne beri ori Isehwaveyimi? Ori ẹnẹẹ ẹ́ẹ́ va zụ dọ Anịsamarịya tụ́ hụụnị ụvọ ohinọyị Anasiriya?

²⁰ Ori ẹnẹnị ẹ̀ yị rẹ vaa zụụ dọ aza ẹnịnị tụ́, wéé ro ka Ẹnẹyịmavara ọ kụkụ va zụụ dọ Anijerusarẹmị tụ́ hụụnị ụvọ ohinọyị Anasiriya nị?

²¹ Ihezekaya ohinọyị Anijuda ộ vịdị sị ọ ka yị aza anị ka asị e tụ́ ohi ịrẹyị ọnyọọnyị, agụvị avọọ isoja Anasiriya mẹ̀ maanị kà pooro, ẹnịnị ẹ yị jị atẹ tịtẹ.

²² Di Eriyakimi ozi Ihirikaya ana si eyi pè ohweje Ijowa ohinọyị ọnịrị Ịsẹbina ana vị ọchẹrịsa ne beri Ijowa ozi Asahwi ana si eyi pè iwe ịdị ohinọyị za awuru ẹnịnị dị ẹ na a áyị ẹnịnị mẹ̀ du, di e si hu aa nọ ịda ohinọyị nị. Ẹ́ mẹ̀ vavọọ tù ịzọọ, dị ẹ kà a yị ohinọyị avaba ịrẹyị ọnị ọga isoja Anasiriya va kà nị.