Ayịsaya 34 - IWE ỌNỊNỊ

Ohomorihi vaa sị ụyaa rị ọnịvị anị

¹ Ẹwụ nịnị avaba anẹhẹ, vẹ dị wa va wụ́ ịrẹyị nịnị. Avaba ẹhẹ ọnịrị avaba ịsị e hi ịnị anị ẹ̀ batọ dị ẹ̀ wụ́ ịrẹyị.

² Ẹnẹyịmavara aa kụ́ ayịị hi avaba anẹhẹ ọnịrị avaba isoja ẹnịnị. Avaba ẹnịnị vị ọnị ọ vaa mẹ ka à wụ và ha saka-saka.

³ Oku ẹnịnị vi eni e vee nee vàa hi ẹhẹ, dị ẹ yaa dà agụ tútútú. Ẹ yị nyị ataba ana ẹnịnị è yi vee chee kú.

⁴ Ọyị, ụhwẹ ọnịrị ụzọmị nịnị vaa sùu vaa hi ẹtẹ, dị a maanị kara ẹbẹẹba anka a mẹ̀ẹ kara ụvẹnẹ avọọ. Ụzọmị vi ana vaa sùu hi ẹtẹ anka avị ọchị ịvayịnị ọnịrị avị ọchị ihwigi ana kụ́ wụ avọọ.

⁵ Ẹnẹyịmavara ọ sị ụhwọ anị ne rị ụvọ tụ́ ẹbẹẹba. Ọnị ọ vaa sị wụ̀ Anedomii vaa ha nị. Ộ vịdị raà mẹ̀ ọkarẹyị ẹnịnị ka à wụ̀ wa và ha.

⁶ Ụhwọ Ẹnẹyịmavara vị ana vaa vị anyaanya, dị ụhị maanị para a. Vị ọ va sị mẹẹ anka ụhwọ ana a sị na vọ uye ịsọvọ ọnị ịdẹba ọnịrị ẹvụ ne beri ụhị ẹnịnị para hi hi ẹtẹ nị. Anẹkụra Ịbọrịza ọnịrị Edomi ọ vavọọ vaa sị mẹ̀ ịsọvọ ọnọọ nị.

⁷ Aza ẹnẹẹ vị ana a vaa wụ̀ anka ụnọ ọnịrị ẹya avọọ. Di a vavọọ jị wa và hi ẹtẹ, dị ọnịrị ụhị ẹnịnị vavọọ chaka hi ẹtẹ ini eteesu.

⁸ Ịhị ọnọọ Ẹnẹyịmavara vee si atọ ịsa ana a mẹ Anịzayọnị, dị ọ dọ Anịzayọnị há nị.

⁹ Okuha Anedomi vaa vara ọ̀dà, dị eteesu anị aa rị ịra anka ohuru avọọ. Ẹtẹ anị vị ana vaa vara ọ̀dà ịrịịra

¹⁰ Ịra ọnọọ vị ana vaa za pooro ọọdụ ọnịrị ịrahụ, dị areyi anị aa dàa vàa hịrẹ. O yi vee mi pooro. Ẹtẹ ọnọọ vị ana vanaa tụ́ osusu pooro zịna-zịna, ọza ọ mā vana zi oze avọọ para hu.

¹¹ Inomi edivi irenyi-irenyi e venee hi ịzọọ nị. Ohomorihi vị ana vaa vara ẹtẹ Anedomi ẹtẹ ọpaapara ana ahịka ẹ yị nyị ịsị ọ zụ mẹ.

¹² Avaba aza ẹbanyị anị vi ene vee súu vàa ha, kụkụ nyị ịsị a vaa hị́ ohinọyị ịzọọ.

¹³ Avị edivi ọnịrị ikeyi e venee nyii hi ịzị irehi ẹbanyị-ẹbanyị ọnịrị irehi ana aza naa tẹ ẹnị vịdị hi nị. Uye edivi ọnịrị inomi nịnị e venee hi ịzọọ nị.

¹⁴ Uye ịnị ụnọmị ọnịrị ọdụmị nịnị vaa gẹ ịzọọ. Dị akọnọ eni ee nowu ngụ ịzọọ zị. Dị avaba uye ana aā zị ịrahụ kuku sì aha, dị ẹ yaa tụ́ ụhwọ ịzọọ.

¹⁵ Ogugu nịnị vaa mẹ ịrẹngwẹ hi ịzọọ, dị ẹ tụ́ ajẹ, dị ẹ chị ozi ẹnịnị dị ẹ pa wa. Avọọ ụba nịnị ẹnị mẹ̀ rẹ vaa gẹ ịzọọ nị.

¹⁶ Na ka iwe Ẹnẹyịmavara di wee re ịsa ọnị ọ̀ vaa mẹ. Ẹ yị nyị inomi ọnịrị uye ene vee vu, ẹ yị ọnị ẹyị vaa nyị ọnọhụva. Ẹnẹyịmavara o reè wo oto anị. Ọnị ụvọta vaa sị ọ sị.

¹⁷ Ẹnẹyịmavara ò reè re ẹtẹ ne hu, dị ọ ga a, dị ọ sị ẹhwị ẹtẹ ọzọza yọ nị. Ẹnị ẹ vaa nyị ẹtẹ ọnọọ pooro zịna-zịna, hụrẹ ụmẹ ọnyị na ngụ ọsa.