Ayịsaya 33 - IWE ỌNỊNỊ

Ọnịvị Anisirẹrị ẹ sị da

¹ Wa sị dà, ẹwụ nịnị ana maanị aa wụ̀ aza, dị à yị nyị ọza ana aa wụ nịnị. Mị ka wa sị da, ẹwụ nịnị onireche ene ee vene ọza dị ọza ò yi vene ẹwụ nịnị. Ụ màa wụ̀ ọza nịnị aanị, ịjị ụmẹ awụ nịnị ọ̀ọ ta, a rẹ vaa wụ̀ ẹwụ nịnị. Ịjị wè yi rè kuku vene ọza nịnị, ụmẹ ọnọọ e vee vene wu nịnị nị.

² Ẹnẹyịmavara, navọ kwogwo wa vayị ayị. Ẹwụ ị sị ayị tụra nị. Navọ weē sere eyi eyinị-eyinị, dị wa dọ yị tụ́ ịhị ẹngụkata òo tù yị.

³ Anẹkụra nịnị mè re ka wâ kwẹẹtẹ di u nowu ịrẹsụ, ẹnịnị e kú zwe, ẹ sị gara hi.

⁴ Ẹwụ nịnị anẹkụra aza vị ana vaa sùu kú ogu awụ nịnị dị ẹ kụ́ ọ anka akụvarịva mèe sùu kú avị avọọ.

⁵ Ẹnẹyịmavara ộ dà nyị ụbanyị kẹnẹ Ọnị ọ vị ohinọyị avaba ịsa nị. Ọ vaa mẹ ka avaba aza ene hi ẹ̀ẹ mẹ ịzẹyịza ọnịrị ebira ana vọrọ.

⁶ Ẹngụ avaba aza vaa vọ di o hunẹnẹ ịnị ụmẹ awụ. Wàa sị ụbanyị yị Ẹnẹyịmavara, ọ vaa mẹ ka ọ̀ dọ wụ há, dị ọ rẹ mẹ ka wa yẹ ịrẹyị nịnị ẹtẹẹtẹrẹ. Ogu avaba ẹnẹẹ vaa vịị yị wụ nị.

⁷ Ọdọvịdị ẹkụra nịnị ee nowu ka à gụ ẹnị ụvọ. Aza ana anẹkụra tụ́ ka è ne jii ịrazị ẹnị aa tụ́ orere booboro.

⁸ Oze ọbanyị ọ sị jị ẹngwa hyó, ẹ yị nyị ọza ana nyayịnẹ và tụra oze. Ọkarẹyị ana a vịdị mẹ dị a ka â dọ, ọ rẹ sị gara. Aza ẹnyị ẹ yị kụkụ sị ụbanyị yị ọsa.

⁹ Ẹtẹ ọnọọ kụkụ vi osusu tịtẹ kẹnẹ, ẹ yị kụkụ nyị ọza ịnị anị. Avaba ọchị ene hi ini iriku Ịrẹbanọnị ẹ kụ́ wọrọ. Ini ozi Ịsarọnị ana vịdị maanị zoza ọ kụkụ sị vara ọpaapara. Ọchị ene hi ịnị ataba Ịbasanị ọnịrị Ịkamẹrị ẹ kụ́ wọrọ avị.

Ọnịvị Ẹnẹyịmavara ẹ sị dà

¹⁰ Ẹnẹyịmavara kà ọnị vaa kwẹẹtẹ booro aanị dị ọnị ọ̀ mẹ ụkata anị zụ̀ anẹkụra.

¹¹ Ọ kà eyi ana aza ẹnẹẹ aa gẹ vi osusu kẹnẹ. Ọ rẹ ka avaba ịsa ẹnị ẹ̀ẹ mẹẹ vị ana vaa tụ́ osusu. Ọ kà ịsa ẹnị ẹ yaa mẹ ọ vị ịra ana vaa rị wa nị.

¹² Ẹnẹyịmavara kà aza ẹnẹẹ vị ana vaa rị ịra dị ẹ sụ atịtọ. Ọ kà ẹnịnị vị ana vaa rị ịraa vàa ha anka avị ana a sẹ hi ẹtẹ avọọ.

¹³ Ọ kà avaba aza ene hi ẹnẹẹnẹ ọnịrị ẹngụ eehi ẹ̀ wụ ịsa ọnị mẹ, di è re re ụkata anị.

¹⁴ Aza edivi ana aa mẹ̀ ebira odivi ene hi aa banyị ángwa mèe hi wa. Ẹ ka ẹnị ẹ rị ẹnị ana zụ sị ẹngụ dọ ọkarẹyị Ohomorihi ana aā rị ọza anka ịra pooro aanị.

¹⁵ Ẹngụ aza ana vaa jẹẹ ẹ vị aza ana ahịka ẹẹ̄ mẹ̀ ebira ana vọrọ, dị ẹ rẹẹ̄ kà ịrẹyị ana vọrọ nị. Ẹngụ aza ẹnẹẹ ẹ ma bẹ ụvọ tụ́ ịnị ịsa ana a sị ụkata-ụkata dọ ọza. Ẹnịnị ẹ mā rẹ dọ ochirerenu. Aza àa gẹ eyi ka à na wụ̀ ọza, ẹ mā rẹ bẹ ụvọ tụ́ ọ. Ẹnịnị ẹ mā bẹ tụ́ ịnị ịsa odivi ọnyọọnyị.

¹⁶ Ẹngụ aza ẹnẹnị ẹ va zụụ há nị. Vị ẹ vaa sị mẹ anka ọza ana na vaka tụ́ aha ịzị ẹ̀ yị nyị ịsị ẹ zụ kanyị ọ avọọ nị. E vee re ịsaa rị, e re vee re enyi hú.

Ụmẹ ozoza ana aa vẹ

¹⁷ Ẹkụhị ọnya aa vẹ, ịhị ọnọọ u vee re ohinọyị ana nyị ụbanyị ka a mẹ ohinọyịị tụra ẹkụra ana kara a.

¹⁸ Ịnị ụmẹ ọnọọ ẹ yị kụkụ vaa nyị ka wee hí angwa azọga ana aa mẹ ehunaa wụ, dị ẹ yaa dọ wụ nịnị ẹkẹhịrehi. We yi re kuku vee hí angwa ẹnị ene eē yi ẹtẹ awụ nịnị re.

¹⁹ Ụ vanaa sị pa ịta nịnị nị ka â vịdị nyị azọga ọnị wẹ̀ yị wụ́ ẹkụra anị ene ee wuu hi wu nịnị.

²⁰ Kana eyi di we re nịnị. Ịzọọ ọ vị ẹkụra ịzị ị yàa rị eche ahẹkẹ ayị nị. Wéē re Ijerusarẹmị ẹkụra ana aza ra hi ịnị anị ịnị ẹngwọọrọ. Vị ọ sị mẹẹ ajẹngụ ana ahịka ọza ọ yị vaa kụ́ụ hụrẹ udi anị avọọ nị. Ọza ọ yị vaa tụ̀ ẹka ana a sị kanyị ọ. Ọza ọ yị rẹ vaa yẹrẹ obo anị.

²¹ Ẹnẹyịmavara vaa mẹ ka à yẹ ụkata anị ịzọọ. Vị ọ vaa sị mẹẹ anka okuha ana gana avọọ nị. Ama ẹ yị nyị ẹpa ịrẹkụ ọnyọọnyị ana vaa zi oze avọọ.

^22-23 Avaba ẹnya ana aā kụ́ụ hi ini ẹpa ẹnẹẹ vị ana vaa vi osusu. Ọchị ọgọdọ ana a mẹ jẹẹ ịnị ẹpa vị ana vaa ma. Ọza ọ yị rẹ vaa gana ịta ana a sịị dọ ahị. Ogu ọnịvị ayị vị ọnị ị vaa kụ́. Ogu vaa gwẹtẹ, di oswahụ nịnị ẹnị re re kụ́ bẹẹ. Ọ vavọọ vaa yà agụvị ka Ẹnẹyịmavara ọnị ụvọta ọ vaa vị ohinọyị ayị, dị aa mẹ ịjọvaa tụra yị nị. Ọnị aa sị ọdaa yị nị ọnị ọ rẹ vaa dọ yịị há nị.

²⁴ Nyị ọza ana ra ẹnị ẹngụ kụkụụ vanaa zị. Ebira odivi ana aza ana ra hi ịzọọ ẹ̀ẹ mẹ vị ọnị Ohomorihi vaa vagu wa ịnị anị.