Ayịsaya 32 - IWE ỌNỊNỊ

Ohinọyị ana vaa mẹ̀ ịsa ana vọrọ

¹ Ẹkụhị aa vẹ ọnị ohinọyị ana vaa rị vaa mẹ̀ ebira ana vọrọ ka aa mẹ. Ịnị ụmẹ ọnọọ, avaba aza ana yà ịnị ịjọva vị ana vaa mẹ ịzẹyịza.

² Aza vi ene vee zwe naa vaka aza ene hi ini ịjọva anka aza mèe zwe nee sì aha vaka ini ụmẹ oni orihi àa zụ̀, di opomi aa tụ́ avọọ. Ẹ rẹ vaa mẹ kà ẹngụ aza è hunẹnẹ anka okuha ana yà ịnị ụnọmị ọnịrị anka ihuhu ịrẹta ọbanyị ana yà ịzị ọchị è yi hi avọọ.

³ Ẹnịnị vee re dị ẹ rẹ wụ́ ịsa ana àa vị ẹngụkata yị aza.

⁴ Ẹnịnị rẹ vaa nyị isuuru, dị ẹ yaa sị ịrẹyọyẹẹ mẹ̀ ụkọrọ. Ẹnịnị ẹ yị kụkụ vaa kụ́ ịrarẹ ẹẹva.

⁵ Aza ẹ yị kụkụ vaa kà a ka ọnụra nịnị ẹ vị ọyẹrẹyị, di aza edivi nịnị vi ọza obooro nị.

⁶ Ọnụra vi ana aā kà ebira ụra, di ee ro ebira odivi ọnị ọ vaa mẹ. Ebira ẹnị Ẹnẹyịmavara ò yi sì ọọ̄ mẹ nị, dị aa tụ́ aza ịrẹyị ka asị ẹ kụkụ sị ayị yị ẹnẹ ẹ̀ yị mā vara. Aza ọnị ụngwẹ àaa kụ̀, ẹ mā dà ịsa yọ, ẹ ma rẹ ká enyi yi aza oni onyi aa kụ̀.

⁷ Aza edivi vị ana aā mẹ̀ ebira odivi. Òo zee eyi asị a nyị ịsị onosiye mẹ, di e gẹ eyi, di e cheeche kú ọ ka ẹnị ẹ̀ wụ ọ.

⁸ Ama aza obooro ẹnị vị ana aā gẹ eyi ịsị e zoza. Ịrẹyị ana vọrọ ẹ ẹẹ̄ jẹẹ pè nị.

Ọkarẹyị ọnịrị ayamva Ohomorihi

⁹ Ẹwụ nịnị anyẹnẹẹ ene hi ẹtẹ aa mẹ ẹngwọọrọ, di u ro ka ẹ yị nyị ịrẹyị, kwẹẹtẹ wa wụ́ ịrẹyị amị nịnị.

¹⁰ Ẹwụ nịnị ene ro ka ẹ yị nyị ịrẹyị booro aanị ẹngụ awụ nịnị vee zizi ọ̀ọ naa mẹ ịrayị ọnya tụra chee. Ọchị ịvayịnị ọnịrị ọchị ana vọ ene hi ịnị aarẹ ẹ yị kụkụ vaa tụ́.

¹¹ Ẹwụ nịnị anẹẹ ene ro ka ẹ yị nyị ịrẹyị aanị, â nyị ka angwa òo hi wu, dị waa dá ẹgahị nịnị, o! Ngwa ịta ọvị awụ nịnị hị́ ẹtẹ dị wa sị ịta orere vụ́ nịnị.

¹² Tụ̀ ụvọ kú ịrẹsụ di wee sụ ùnè nịnị agụvị ka a kụ́ aarẹ ozoza-ozoza ọnịrị ụbazị du và ha.

¹³ Ikeyi ọnịrị avị edivi ẹ kuku hi hi ịnị ẹtẹ aza amị nị. Mị ka wee sụ ùnè nịnị agụvị ẹkụra ọnọnị ana aza vịdị hi ịnị anị dị ẹ yaa mẹrị, dị ẹ yaa jẹ.

¹⁴ Aza vee zwee hụrẹ ịzị ẹ vịdị naa vakaa tụ́, dị avaba aza zwe hụụnị ẹkụra dị ẹ kụ̀rà kụkụ tịtẹ hyó. Irehi ọgọdọ ịzị oserẹtẹ nịnị vịdịị yà vaa vara eburu, dị ịkẹrịkẹtẹ ọnịrị ịsụpa nịnị kụkụ aa ngụ ịzọọ zị.

¹⁵ Avọọ ọ mẹ̀ vaa yà pooro di Ohomorihi ọ̀ tụ́ ụhwẹ anị hụrẹ ẹbẹẹba vẹ dị ọ̀ va mẹ ka ẹtẹ ana vịdị tịtẹ paapara ọ̀ vara ẹtẹ ozoza. Ọ hyakụ vee zozaa huna ẹtẹ ene ozoza ẹtẹẹtẹrẹ dị ọọ̄ mẹ̀ ịsa.

¹⁶ Avaba aha vị ana a kụkụ vaa yàa mẹ ịzẹyịza ịnị ẹtẹ ọnọọ.

¹⁷ Ẹngụ ọzọza vị ana vaa rọ pooro dị ẹ yị kụkụ nyị ayịhụrịnẹ, agụvị ka avaba aza aa mẹ ịzẹyịza avaba aha.

¹⁸ Aza Ohomorihi ẹ yị kụkụ vaa hụrẹ ayị ịnẹ. Ẹngwọọrọ vaa yà ini eehi ẹnịnị, dị ayị ẹnịnị nẹtẹ.

¹⁹ Ata ihinẹba vaa zụ̀ụ hi iruku, dị a gara ẹkụra ha.

²⁰ Ama ẹwa nyarị ịrẹsụ ọyịza, agụvị ka ẹwụ nịnị vee re orihii chire ịsa dị ịkẹrịkẹtẹ ọnịrị ịsụpa awụ nịnị aa rị avị ó mè zee wa eyi.