Ayịsaya 25 - IWE ỌNỊNỊ

Ahẹ ana a jị gono Ohomorihi

¹ Ẹnẹyịmavara, ẹwa vị Ohomorihi amị nọ; Mị vaa sị ụbanyịị yị wụ ẹtẹẹtẹrẹ. Wâ dà nyị ịzẹyịza kẹnẹ. Wa raà mẹ̀ ịsa ohyozirenu ẹbanyị-ẹbanyị; ọnị ụ ka ụ vaa mẹ̀ hụrẹ ụmọrụmọ, avọọ ụ mẹ̀ yị va mẹ̀ ẹ nị.

² Wâ za ẹkụra ọnọọ wa sị ọ jị eburu. Wê wu ọvọ ana jị kara ẹkụra hi ẹtẹ. Ẹkụra azọga ana vịdị nyị ụkata ệ ta. Ọza ọ mā vana tenyi ọ dà.

³ Ọsọnị vaa mẹ ka anẹkụra ana nyị ụkata ẹ sị ụbanyịị yị wụ Avaba anẹkụra ẹnẹ ẹ̀ yị mā vayị ọza è hí angwa awụ dị.

⁴ Onosiye ọnịrị ọnụya nịnị ê zwe vẹ ịda awụ dị ụ dọ wa tụ́ ịnị ụmẹ ẹngụkata ẹnịnị nị. Wâ vi ihuhu gu wa ka asị anayịchama re oze sị ụya rị wa. Ịrẹyị anayịchama vị ana sị mẹẹ anka opomi ana aa tụ́ kù ugene. Aza edivi vị ana kụ ọ hana wa anka opomi avọ.

⁵ Ịrẹyị anị ộ ngụra anka ọyị ana aa ha ngaa-ngaa. Ama ẹwụ ẹnẹyịmavara ẹwa za wa ụvọ chire enyi nị. Éguhi mẹẹ dàa kú ọyị, avọọ ụ mẹ dà kú aza edivi Ịjị ẹ kwẹẹtẹ ee nowu nị.

Ohomorihi ộ mẹ̀ ịsa hi ẹtẹ yị ọza anị

⁶ Ẹnẹyịmavara Ochẹtẹẹngụ vaa mẹ̀ ịsa ozoza gụ ẹtẹ ịrẹsụ ataba dị ọ ka ọzọza ẹ̀ va rị. Ịsa ọnọọ ộ nyị eche ene zoza ẹtẹẹtẹrẹ ne beri uye ene zoza.

⁷ Ịrẹsụ ataba ịzọọ Óhomorihi vaa yà dị ọ kụ́ ayodu kwooze yị avaba aza nị.

⁸ Ọ mā vana zẹẹ ka ọza ò sú paa Ẹnẹyịmavara ana vi ohinọyị ọ yị kụkụ vaa zẹẹ ka ọza ò re ịrẹyị orere. Ọ yị rẹ kụkụ vaa zẹẹ ka ụhị ọ̀ vana nyị aza anị ịnị ẹhẹ. Ẹnẹyịmavara kà ọnị ọ kà avọọ nị.

⁹ Ịjị ụmẹ ọnọọ ọ̀ọ vẹ, avaba aza vaa kà a ka Ohomorihi ayị yọ. Yâ sị ayị tụra a, dị ọ dọ yị tụ́ nị. Ọnị ọ vị Ẹnẹyịmavara nị, ọnị ị sị ayị tụra nị. Ọ sị yị dọ ha; agụvị avọọ à vẹ vị yaa jẹ ịrajẹ.

Ohomorihi vaa sị ụyaa rị Animowabi

¹⁰ Ẹnẹyịmavara vee sere ataba Ịzayọnị. Ama Imowabi vị ọnị ọ vaa kụ́ ahụụ hii za ẹtẹ, dị ọ mẹ̀ ụhị nyị ọ ẹtẹẹtẹrẹ.

¹¹ Animowabi vaa gana ụvọ anka ọza ana aa mẹrị enyi avọọ. Ama Ohomorihi vaa tẹ wa tụ́ ịrẹsụ avaba ịsị e ro ka ẹnị ẹ zụ mẹ.

¹² Avaba ẹkụra ẹnịnị ẹnị ẹ jị ọvọ kara vi oni Ohomorihi vee wuu hi ẹtẹ saka-saka, dị ọ vara a eteesu nẹrẹ-nẹrẹ.