Ayịsaya 22 - IWE ỌNỊNỊ

Ịrẹyị ene vee tù Anijerusarẹmị

¹ Ịrẹyị ene vee tù aza ana ra hi ini osusuu ịzị Ohomorihi yàa mẹ ka aza anị è re ẹtẹ yị. U mè re nịnị? Si u ne hi ịrẹsụ irehi aa jẹ ịrajẹ anị nịnị?

² Avaba ẹkụra aa sụ́rẹyị, aza aa kụ́ ịrẹka ẹ màa jẹ ịrajẹ. Aza awụ nịnị vee sú ịnị ịrẹkụ, ama ẹ yị vị ụhwọ a vaa sị wụ̀ wa, hyakụ vị ọvịdị ịrẹkụ ẹ vaa yàa sú.

³ Avaba ọdọvịdị awụ nịnị vi ene zwe. Ọza o yi ne ọpa ikonya dị a za wa. Avaba ẹwụ nịnị ene zwe ọnịvị vị màa vẹ ẹ́nẹẹnẹ vị ana a za vabẹ.

⁴ Navọ mị maa jị òrèrè aza amị ana a wụ. Asị ụ kà mị ka me kú irenu.

⁵ Ẹnẹyịmavara Ananyị yị Ochẹtẹngụ ọ sị ẹkụhị ọnya jị. Ịhị ọnọọ aza ana re hi ini osusuu ịzị Ohomorihiī yàa mẹ ka aza anị è re ẹtẹ vee hí angwa. Ọnịvị ẹnịnị vee huna wa, dị ẹnịnị ẹ yị kụkụ yẹ ịsị ẹ yaa mẹ. E vee wu ọvọ ana kara ẹkụraa vaa hi ẹtẹ, aza vee nowu dị ataba aa dọ wa ọngwẹ.

⁶ Anerami ẹ raà kụ́ ahaba ẹnịnị, ệ tụra umaata aa vẹ. Dị Anikiri ẹnị re tenyi ogonto ẹnịnị nị.

⁷ Ẹtẹ ini ozi awụ ene zoza vi oni isoja gụ hi ịnị anị. Dị a kụ́ isoja ana tụra umaata ka ẹ̀ na jẹẹ ózee ana na ngụ ịnị ẹkụra nị.

⁸ Ohomorihi ọ̀ raà kụ́ ịsị a vọrọ ka Anijuda ẹ̀ yaanị sị dọ ẹngụ ẹnịnị tụ́. Ịhị ọnọọ, ayị awụ ộ nọ ịzị ụ kụ́ ẹnya ịrẹkụ hi ini eehi ohinọyị ana yà ini īriku.

⁹ Wâ zama ọvọ ana kara Ijerusarẹmị, di u re ịzị avọrọ ka we tenyi nị. Wê tenyi enyi tịtẹ ini okuha ana yà ụvẹtẹ.

¹⁰ Wa rẹ za irehi ana yà Ijerusarẹmị ịrịka, di u wú enyi hi ẹtẹ ka wa kụ́ ịrẹta anị tenyi ọvọ ana kara ẹkụra nị.

¹¹ Wê tenyi aha enyi tụ́ ịnị ẹkụra ka enyi ene ee sìi hụụnị imisi ọkụkụ òo si naa vàa hị́ ọ. Ama wẹ rẹ vaa sị ayịị nọ ịda Ohomorihi ana mẹ enyi ọnọọ hụrẹ ụmọrụmọ, ẹ yị hyakụ nyị ịzị ịrẹyị anị gẹ wụ.

¹² Ịhị ọnọọ Ẹnẹyịmavara Ananyị yị Ochẹtẹngụ Ộ hị́ wụ. Ọ kà wa jị òrèrè, dị wa kụ́ ịrẹsụ awụ, dị wa rẹ sị ịta arụwẹ kú ẹngụ.

¹³ Ama di u yi, di waa jẹ ịrajẹ dị waa mẹrị sadaa nị. Wâ wụ imaaru ọnịrị atẹmẹ, dị waa rị, di wee hú eche o mè zee wu eyi nị. Ụ ka, “sị ọ vị, à vẹ ya rị dị ye hú ajịnị ka ụhwọ i wusu.”

¹⁴ Ẹnẹyịmavara Ochẹtẹẹngụ ọ sị ọ kà a mị, ọ ka pooro di we sú, ọnị ọ yị vaa vagu wu agụvị ebira odivi ọnị ụ maanị mẹ aanị.

¹⁵ Ẹnẹyịmavara Ochẹtẹẹngụ Ananyịwa kà ọnị ọ tụ́ mị nọ ịda Ịsẹbina ana vị ọchẹrịsa ana yà ịda ohinọyị nị.

¹⁶ Ọ kà ma na họ̀ ọ ka sị aa mẹ ịzọọ? Ọ kà ma họ̀ ọ ka ẹnẹ sị oze yọ ka ọ̀ chị ikuta anị tịtẹ tụ́ ịzọọ? Ọ kà ma kà a ka sị ẹ vẹ dị ọ chị ikuta anị tụ́ ịnị ịrẹta aha ana nẹba ka è ne ọnị tụ́ ịzọọ?

¹⁷ Ẹnẹyịmavara kà ma kà a yọ ka ô ro ka â nyị ịsị ọnị vị. Ama Ohomorihi vaa za a, dị ọ sị ọ, dị ọ tụ̀ ọ òkòkó nọ aha ene noze huu.

¹⁸ Ohomorihi ka ọnị vaa sị ọ, dị ọnị kara a bịịbịrị anka ódoodò avọọ, dị ọnị tụ̀ ọ òkòkó nọ ẹkụra ọbanyị ọnya. Ọ kà ịzọọ ọ vaa yà, di o sú pè umaata ịrẹkụ ọnị ọ vavọọ aa sịị mẹ eyi nị. Ọ kà ọ raà mẹ̀ ụhị nyị ọga anị.

¹⁹ Ẹnẹyịmavara kà ọnị vaa sị ọ, dị ọnị jị ọ hụrẹ udi anị.

²⁰ Dị ọnị sị ozi ahụ anị ana aā hị́ Eriyakimi ana vị ozi Ihirikaya

²¹ dị ọnị sị awuru Isobina chire e. Ọnị rẹ vaa kụ́ adava anịị hị́ ọ ahụ dị ọnị sị ọda ọnị Ịsẹbina vịdị aa mẹ, dị ọnị sị yị Eriyakimi, Ọ kà Eriyakimi ọ kụkụ vaa vị adaa yị aza ana ra hi Ijerusarẹmị ọnịrị Ijuda nị.

²² Ọ kà ọnị vaa sị ọdaa chire e ụvọ ịjị anovwoovu Idevidi ọ̀ọ rị ohinọyị. Ịrẹyị ọnị ọnị ọ̀ọ ka ẹ yị nyị ọza ana va zụụ vara a.

²³ Ọ rẹ ka ọnị vaa sị ọ jẹẹ dị ọnị dà ezi za a ahụ. Ẹnẹyịmavara rẹ ka udi ụbanyị ọ vaa yà ịda anị nị,

²⁴ dị a hịka ọnị ọ kụ́ avaba aneehi ada anị gẹ ẹngụ nị. Vị ọ vaa za ẹnya ẹnịnị anka ẹpahị mẹ̀ẹ za avaba ẹnya avọọ nị.

²⁵ Ẹnẹyịmavara Ochẹtẹẹngụ ka ama ụmẹ ọnya aa vẹ. Ọ kà ịhị ọnọọ ọnị vaa kụ́ ezii hụrẹ Eriyakimi ahụ dị ọ hyẹdụ. Ọ kà avaba ẹnya ọnị ọ za vaa garaa ha.