Ayịsaya 21 - IWE ỌNỊNỊ

Ịrẹyị ene ve tù Anibabironi

¹ Ịrẹyị ene vee tù anẹkụra ene hi ịnị ụnọmị ózee eyi oku yị: Wáā yẹ opomi mẹ̀ẹ tụ́ ịnị ụnọmị di ee hì avaba ẹchịchị naa parahu avọọ, avọọ a mẹ̀ vaa kụ́ ịrẹyị odivi ve tù Anibabironi nị. Anẹkụra ana kụ́ ẹngụkata ọnọọ aa vẹ vị ana angwa ẹnịnịị hi ọza.

² Ohomorihi ộ mẹ̀ ka me re ẹtẹ ka ịrẹyị ana vaa mẹ ô divi ẹtẹẹtẹrẹ. Mê re ka onireche e ne reè cheeche yị ọnịvị nịnị ana mẹ ka è re oze wụ̀ aza va ha ẹtẹẹtẹrẹ. Dị aza nịnị nyayịnẹ hara ogu nị. Ẹwụ nịnị isoja Erami ọnịrị isoja Animediya kwẹẹtẹ wa kụ́ ịrẹkụ ne tù anẹkụra ẹnẹẹ nịnị. Ohomorihi ọ yị kụkụ vaa zẹẹ ka Anibabironi ẹ̀ sịị sị ụyaa rị aza.

³ Ịrẹyị ọnị mị wụ́ m mẹ̀ vavọọ re ẹtẹ ọnọọ ộ mẹ̀ ka avaba ẹngụ ọ̀ọ zị mị. Ộ kata mị ẹngụ anka ọnẹẹ ana aa barẹẹ avọọ. Ịsị mị wụ́ ọnịrị ịsị mi re ô chire mi angwa.

⁴ Angwahi ọ sị ngụ mị ẹngụ, ẹngụ amị aa dá ẹgahị. Mê ro ka oruva ọ̀ọ vẹ mị daba vaa nyị ẹngwọọrọ, ama ayịhụrịnẹ kẹnẹ ọ kụ́ ve tù mi nị.

⁵ Ịnị ẹtẹ ọnị mị vavọọ re, mê re ka a kụ́ ịsọyịrị tenyi hi ẹtẹ. A rẹ kụ́ aha ana aza vaa yàa tenyi hi ẹtẹ. Dị aza nyima dị ẹ yaa rị di e re yèe hú nị. Dị mị vana wụ́ ka ê nowu ka, “Ẹwụ nịnị isoja, tenyi ogonto awụ nịnị!”

⁶ Dị Ananyị yị hị́ mị dị ọ ka ma na kà a yị oserẹtẹ ka ọ na jẹẹ ịzị a yàa sere ẹtẹ. Ọ kà ma kà a yọ ka ịsị òo re ọ̀ va kà a.

⁷ Ọ kà ma kà a ka òo re ka aza ệ tụra umaata aa vẹ dị ẹ vị ẹvẹẹva nị, dị aza ẹnyị tụra ịkẹrịkẹtẹ, dị ọsa rẹ tụra ịnyaakụmị nị, ọ̀ nyayịnẹ sị eyi pè wa di ò re ụsẹ ẹnị ẹ yaa zị.

⁸ Di oserẹtẹ ọnọọ ka ooho nị. Dị ọ ka avọọ ọnị mèe sere ẹtẹ pooro nị.

⁹ Ụmẹ ọnya kẹnẹ di o vene nowu dị ọ ka, “Aza ẹnẹẹ aa vẹ avọọ nọ! Ẹnịnị vị ana tụra umaata aa vẹ ẹvẹẹva!” Dị ọ rẹ ka, “Kwaa-kwaa, Anibabironi ẹ sị hyẹdụ, mị ka ẹ kụ́ hyẹdụ bemi! Avaba ori anị ana a bẹ vị ana maanị gara hi ẹtẹ.”

¹⁰ Ẹwụ nịnị aza amị ana a raà za eyi kwọrọ ẹtẹ, ịrẹyị ẹnẹ Ẹnẹyịmavara Ochẹtẹẹngụ sị zụ̀ mị mị kà wụ nịnị avọọ nị.

Ịrẹyị ene vee tù Anedomi

¹¹ Ịrẹyị ene vee tù Anedomi yị: Ọza ịnya ộ hụrẹ Edomi vẹ dị ọ họ̀ mị dị ọ ka, “oserẹtẹ, eyi wáá vaa hụra nị̄, kà a mị de!”

¹² Dị mị ka eyi aa vaa nị̄, ama ẹtẹ re venee hozi. Mị ka ọ̀ọ ka ọnị ee hii họ̀ use, ọ̀ vavẹ di ò re ve họ̀ use.

Ịrẹyị ene vee tù Anarebiya

¹³ Ịrẹyị ene re vee tù Anarebiya yị: Ẹwụ nịnị anẹkụra Idedanị ana aza anịị̄ kụ́ udi tụ́ ịnị ụnọmị Arebiya ẹ̀ẹ maanị aa hụrẹ eehi,

¹⁴ aza ene enyi aa kụ̀ ene ve tù wụ ká enyi yị́ wa di è hú ọ. Ẹwụ nịnị ana ra hi ẹkụra Itema, kụ́ ịsọyịrị va yị aza ana tụ̀ hụụnị ịrẹkụ vẹ.

¹⁵ Aza e kú zwe agụvị ịrẹkụ ka a va sị ụhwọ ọnịrị ọpa wụ ẹnị. Ẹnịnị e si zwe ịrẹkụ mèe nyị Ananyị.

¹⁶ Ananyị yị ộ kà a mị, ọ ka pooro dị ọ̀ naa mẹ ịrayị ọnya, anka ọnụkọrọ mẹ̀ẹ za ịrayị ịrịka, avaba ụbanyị Anikeda vaa ta.

¹⁷ Avaba isoja Anikeda ana vọ vị ana kụkụ vaa yà chẹkẹẹ aanị. Ọ kà ọnị Ẹnẹyịmavara ana vị Ohomorihi Anisirẹrị ọ kà avọọ nị.