Ayịsaya 15 - IWE ỌNỊNỊ

Ohomorihi vaa sị ụyaa rị Animowabi

¹ Ịrẹyị ọnị Ohomorihi ka o vee tù Animowabi. Ẹkụra Ari ọnịrị Ikiri ene hi ịnị ẹtẹ Imowabi vi ene vú ẹtẹ ịnị ịrahụ ẹkụhị ọnya.

² Dị Anidiboni hụ agụvị avọọ nọ ini irehi ori ẹnịnị ịnị ataba di ene ee sụ ùnè nị. Animowabi ê sụ ùnè Inebo ọnịrị Imediba, dị ẹ kụ́ ịrẹsụ ọnịrị ịrẹwa ẹnịnị hwòhwòrò nị.

³ Aza ene hi ini ubooro vị ana kụ́ ịta oji kú ẹngụ ana a sị zụ̀ ka â nyị ịsị ẹ yaa zị ẹngụ anị. Dị aza re hi ịrẹsụ irehi ọnịrị ini orere di e và eyi kú ẹtẹ di eyee sụ ùnè nị.

⁴ Ánihesiboni ọnịrị Anireyarehi mèe nowu, aza ene hi Ijahazi huu vị ana aa wụ́. Ezirẹkụ Imowabi ịnyẹmba vi ene ee nowu, dị ẹgahị kụ́ ngụ wa ẹngụ.

⁵ Ẹmị ịnyẹmba ọnị raa jị òrèrè agụvị ịrẹyị Imowabi. Ẹnịnị vi ene zwe huu na ngụ ẹkụra Izowa ọnịrị Egirati Iserisiya. Ẹnịnị e zi zwe pooro na ngụ Iruhiti ọnịrị Ihoronayimi. Avọọ ẹnịnị màa jịị jị oreree vàa tụra oze na nị, agụvị ka vị a nyayịnẹ wụ̀ wa và ha nị.

⁶ Enyi ini okuha Inimirimi ọ sị wụ. Avaba avị ẹ kụ́ wụ, ọza o yi kuku re avị ohwoohu ikonya.

⁷ Aza ẹnẹẹ vị ana kụ́ ogu ẹnị ẹ vịdị kụ́ tẹ, dị ẹ zị oze ini okuha Iwiro ka ẹnị è zwe na para hu.

⁸ Avaba ẹkụra ene hi ọkara Imowabi ệ wụ́ aza ẹnẹẹ mèe nowu. Anegirayimi ọnịrị Anibiya-Erimi ệ hyakụ wụ́ wa owu.

⁹ Anya vị ene vee sì avaba orosi ene hi Idimoni. Ohomorihi kà ọnị vaa sịị sị ụyaa rị waa hu avọọ. Ọ kà ọnị vaa tụ́ idu ka ọ na wụ̀ avaba Animowabi ana vọ hị́ ịnị ẹkụra ọnịrị ẹnị enee zwe.