Ayịsaya 14 - IWE ỌNỊNỊ

Anisirẹrị ana a za ọrịhị vaa vaa vẹ eehi

¹ Ama Ẹnẹyịmavara ọnị vaa vayị ezi Ijekọvụ ana vị aza anị. Ọ rẹ vanaa kụ́ waa vẹ ka ẹ̀ va ra ịnị ẹtẹ ẹnịnị. Azọga va naa ra pè wa ịzọọ.

² Anẹkụra ana vọ vaa mẹ ọgụvọọ yị Anisirẹrị ka ẹ varẹma nọ ịnị ẹtẹ oni Ohomorihi sị yị wa. Anẹkụra vị ana vaa mẹ ụkọrọọ hẹkẹ Anisirẹrị ịzọọ. Aza ana vịdị za wa ọrịhị vị ẹnị ẹnị rẹ vanaa za ọrịhị. Dị ẹ rẹ yaa mẹ ịjọvaa tụra ọza ana vịdị mẹ ịjọva tụra wa.

 sị ohinọyị Anibabironi mẹ enyinyi

³ Ịhị Ẹnẹyịmavara ọ̀ọ raà sị wụ hụụnị ụyọrị ọnịrị ẹngụkata ene vịdị tù wu ụ mé vị ọrịhị,

⁴ ahẹ ọnị ụ vaa jị Anibabironi ịhị ọnọọ yị. Dị ụ ka, “Ọza ana vịdị aa mẹ ẹchakaa yị, aanị ộ ta, ọ. Ọ yị kụkụ zụ kụ́ ayị hị́ ọza.

⁵ Ẹnẹyịmavara ọ raà dọ ụkata hụụnị ụvọ aza edivi ana aa mẹ ịjọva.

⁶ Aza odivi ẹnẹẹ ẹ̀ẹ raà nyị ehuna ẹkụra, avọọ ẹ mẹ̀ vaa chamayịị yị wa pooro kẹnẹ nị.

⁷ A mẹ̀ raà dọ wa ụkata aanị, éngụ anẹhẹ vaa rọ, dị ẹ rẹ nyị ụhwọtụ. Dị ẹnịnị kụkụ aa jị ahẹ inohine.

⁸ Avaba ọchị ẹbanyị-ẹbanyị ene hi ini iriku Ịrẹbanọnị vị ana vaa jẹ. Dị ẹ ka a mẹ̀ si wu hu ẹtẹ aanị, ẹ yị kụkụ nyị aza ana aa vẹ vaa ma ọnịị nya ẹtẹ.

⁹ Ẹ́wụ ohinọyị Anibabironi mèe chi nọ ini ikuta, dị avaba aneku nịnị wụsẹ kwẹẹtẹ giri ka ẹnị ọ̀ va gẹrị wụ nị. Dị aza ana vịdị vị ohinọyị ẹbanyị-ẹbanyị hi ẹhẹ ene wusu kwẹẹtẹ ka ẹnị ẹ̀ kụ́ ụ nyaasẹ nị. Mị ka Aza ana vịdị vị ohinọyị ẹbanyị-ẹbanyị hi ẹhẹ ene wusu mè re ka waa ngụ ini ikuta, vị ẹ kwẹẹtẹ hụrẹ udi ohinọyị ẹnịnị agụvị awụ nị.

¹⁰ Avaba ẹnịnị vị ana aa kà a ka ọkụmị ẹwụrị ẹnị kụkụ vị aanị nịị? Dị ẹ ka ẹwụrị ẹnị ẹ sị vị ọnya, ọ.

¹¹ Ẹwụrị avaba ụbanyị awụ ọ sị ngụ ikuta aanị nị. Ẹwụ ana a vịdị maanịị hú ọkangga yị, idegu maanị chaka kụ́, dị avaba ẹngụ awụ vị ikukurumi-ikukurumi aanị nịị?

¹² Ho! Ẹwụ ohinọyị Anibabironi ọnị ịra anị vịdị aa za anka ụzọmị etumeyọnị avọọ, ẹwụ ọnọọ a maanị tụ́ ụvọ hụrẹ ẹbẹẹba va nya ẹtẹ aanị nịị? Ẹwụ ọnọọ wáá yị, ana vịdị maanị mẹ ehuna yị anẹkụra?

¹³ Waa kà a ịnị ayị awụ ka waa kà udi awụụ hịrẹ anka ohinọyị. Wụ ka wee sì ka wa nyị ụbanyị huna Ohomorihi. Wụ ka wee sì ka ẹwụrị arijenu nịnị è duduu yaayịtẹẹ vaa bẹ ịrẹsụ ataba Isihọnị.

¹⁴ Wụ ka wụ vaa hịrẹ nọ akẹbẹẹba eguhi, dị wa kụkụ ya anka Ohomorihi Ochẹtẹẹngụ avọọ.

¹⁵ Ama Ohomorihi o reè ne wu chi va ngụ ini ikuta ụvẹtẹ-ụvẹtẹ huu.

¹⁶ Aza ene re wu vi oni o hi eyi. Dị ẹ yaa kà a ka ọza ana maanịị hí angwa anị wáá yị? Wéē re,

¹⁷ ọza ana maanị wụ̀ aza ha, dị ọ tụ́ ẹhẹ osusu. Ẹkụra ọnị ọ̀ọ gara dị kụ́ aza anị nị, ọ mā zẹẹ ka aza ẹnẹẹ ẹ̀ kụkụ varẹma nọ eehi ẹnịnị.

¹⁸ Avaba ohinọyị anẹhẹ ama vọ ene sú vi ene hi ini ikuta ẹnịnị hẹẹ-hẹẹ.

¹⁹ Ama ẹwụ ẹ yị hyakụ nyị ikuta oku awụ vi ene e ne tịtẹ kẹnẹ ka ọ̀ọ wụ̀. Aza ana a sị ụ̀hwọ̀ wụ̀ vị ana kụ́ và wu hi ịnị ụsị ịrẹta-ịrẹta. Oku awụ nịnị vị ana aza aa kụ́ ahụụ hii parahu.

²⁰ Wa sị ẹkụra awụ va nẹtẹ, wa kụ́ aza awụ va ha, agụvị avọọ ọza o yi vee ne wu anka a mè ne ohinọyị ana vọ. Avaba evere awụ vị aza edivi. Ẹnịnị ệ ta ịnị ẹhẹ pàá.

²¹ È tenyi aha dị à za ezi ohinọyị odivi ọnọnị dị à wụ̀ wa ịzọọ agụvị ebira odivi oni ohiku ẹnịnị mẹ. Ẹ yị nyị evene ẹnịnị ana aa vanaa rị ohinọyị tụ́ ịnị ẹhẹ, dị ẹ̀ rẹ vaa dà ẹkụra hi ẹhẹ.”

Ohomorihi vee vú Anibabironi ẹtẹ

²² Ẹnẹyịmavara Ochẹtẹẹngụ ka ọnị vaa kwẹẹtẹ tù Anibabironi, dị ọnị za avaba ezi anị ọnịrị ịpa ẹnịnị di oni vú wa ẹtẹ hụrẹ ẹhẹ.

²³ Ọ kà dị ọnị vara Ịbabịrọnị ụnọmị oni ogugu nịnịị̄ hi ịnị anị. Ọ kà ọnị vaa vara a ẹtẹ ene enyi jị hị́, dị ọnị maanị hì wa hụyẹ-hụyẹ na va ha.

Ịrẹyị ene vee tù Anasiriya

²⁴ Ẹnẹyịmavara ọ sị ọ ka, ọ si eku hí tụ́ ọ ka ẹ yị nyị ịsị aa vara ka ẹ yị vị ọnị mẹ̀ kà a â yà. Ọ kà ọnị mẹ̀ kà a gẹdẹ-gẹdẹ ọnị vaa mẹ̀ ẹ nị.

²⁵ Ọ kà Anasiriya ene hi Ijuda ịnị ẹtẹ anị vị ọnị ọnị vaa kwọrọọ ha. Ọ kà vị ọnị vaa kụ́ ahụụ hi wa ịrẹsụ ịrẹsụ ataba anị nị. Ọ rẹ ka ọnị vaa tụ̀ ọkẹẹkẹrẹ ẹnịnị hụụnị ọrọkọ aza anị, dị ọnị dọ ẹnya ene e kune tụra aza anị va ha.

²⁶ Ananyị yị ka ịsị ọnị vaa mẹ anẹhẹ ọ vị ọnọọ nị. Ọ kà ọnị vaa tana ụvọọ za avaba anẹhẹ.

²⁷ Ẹnẹyịmavara Ochẹtẹẹngụ ọ ka ọnị vavọọ vaa mẹ nị, ẹnẹ ka ọnị ọ zụ za a jẹ? Ọ raà sị ụvọ tụra ịsị ọ ka ọnị aa mẹ, ẹnẹ kụkụ zụ za a varẹma?

Ohomorihi vaa si ụyaa rị Anihwirisiti

²⁸ Ịrẹyị ọnọnị vị ana Ayịsaya kà ịnị ịrayị oni ohinọyị ana aā hị́ Ahazi si sú.

²⁹ Ọ kà ẹwụ nịnị Anihwirisiti, asị ụ na jẹ nịnị ka inori ana a vịdị ee sii tú wu nịnị o si che. Éwụ́ òo sú, ẹ́wụ́ ene divi hu avọọ aā chịị dọ ẹngụ anị ịrẹsụ nị. Ẹ́wụ́ edivi-edivi ẹẹ̄ chịị hụụnị ajẹ ẹ́wụ́ nị.

³⁰ Ẹnẹyịmavara vee sere aza anị ana aa rị ụya. Ọ vaa mẹ ka ẹ̀ ra ẹhẹ, dị asị angwa hí wa. Ama evere ẹwụ nịnị Anihwirisiti vị oni Ohomorihi vaa sị ụngwẹẹ wụ vaa ha, saka-saka.

³¹ Ẹwụ nịnị Anihwirisiti, tụ́ ụvọ kú ịrẹsụ wee nowu nịnị. Ẹngụ awụ nịnị ọ̀ọ da ẹgahị. Ezirẹkụ ệ kọmị hụrẹ eyi ẹbẹẹba aa vẹ, vị ẹ sị mẹẹ anka areyi avọọ ẹ mẹ̀ rụrụ nị. Ẹ yị nyị ikonya ẹnịnị ana vị anangwahi.

³² Anẹkụra ẹnẹẹ èe ve họ̀ use ịrẹyị, a mẹmẹ vee tụ́ wa ohi? Dị a kà a yị wa ka Ẹnẹyịmavara o re è tenyi jẹẹ. Aza anị ana a vịdị sị ụya rị vee re aha ẹvagu ịzọọ.