Arụwẹ 5 - IWE ỌNỊNỊ

Arụwẹ Ọhụhị Ọyị da ịpẹ Ayamva Ọnịsẹ kà:

¹ Ẹnẹyịmavara kwogwo asị ụ hi ayị ịsị e tu ẹnị aanị. Navọ wạ kana eyi dị we re ụhị ana a mẹ̀ nyị yị aanị o.

² Azọga ẹ sị yị dọ ogu ọnị ohiku ayị hụrẹ ụvọ tịtẹ yị yị. Anẹkụra ọsa nịnị ẹ kụkụ ra ịnị eehi ayị nị.

³ Ya sị vara ezi oku ẹnẹ ẹ yị nyị ada; ọnyị ayị nịnị ẹ kụkụ sị vara osoku va hi ẹtẹ booro aanị.

⁴ Ị kụkụ aa hị́ enyi ọnị yee hú nị; ọkụ ọnị yaa sị ka ịra vị ọnị yaa hị́ bẹẹ.

⁵ Aza anaa dụ yị vi ana ku chire yị dị ẹ yịị và, ọ sị ngụ yị ẹngụ, yẹ yị nyị eyi tụ́ ụhwọ́.

⁶ Yâ sị ẹngụ ayị mẹ ezi ahụ yị Anijipiti ọnịrị Anasiriya agụvị di ye re ịsa za ayị zụ kẹnẹ.

⁷ Ohiku ayị nịnị ẹ mẹ̀ ebira odivi ama ẹnịnị ẹ yị kụkụ ya ịzọọ, dị ẹyị vaa rị ụya anị aanị nị.

⁸ Ọrịhị nịnị aa mẹ ọda tụra ayị ịrẹsụ dị ẹ̀ yị nyị ọza anaa dọ yị hụrẹ wa ụvọ aanị nị ọ.

⁹ Ị kụkụ aa sị ịrẹsụụ tu usu ne sì ịsọyịrị, agụvị ka ẹnị ana wụ̀ ọza vị ene hi ẹkara-ẹkara ẹkụra ee zí ọza.

¹⁰ Ẹngụ ayị ộ ta kayịra anka arasị avọọ, ụngwẹ maa vaa wụ̀ yị.

¹¹ Ose ẹyị vị ọnị ọnịvị ayị nịnị kụkụ aa ngụụ chire ẹtẹ ịrẹsụ ataba Ịzayọnị; Avọọ ẹ mẹ raa sị ụkata-ụkata ngụ tu ezwoorihi ayị ẹnẹ ẹ yị yẹ́ ọnọrụ avaba ẹkụra ene hi ẹtẹ Ijudiya ni.

¹² Ọdọvịdị ayị nịnị vị ana kụ obo hi ụvọ dị e zù wa obo. Aza ẹ yị sị ụbanyị yị azọkụ ayị vụrụ-vụrụ.

¹³ Ezwọọmụha ayị vị ana aa sị ụkata zaa kwọ̀ ayị, dị ezi ọnọrụ ayị kụkụ aa sị ahụụ jị ọsaa nyee ọkụ ene kune tụra wa mẹ ngụ wa nị.

¹⁴ Azọkụ nịnị ẹ yị kụkụ gẹ enoze oze ana ngụ ẹkụra, ọpa ezweyi ẹnị ẹ̀ yị kụkụ mẹ aahẹ.

¹⁵ Ayohine ayị ộ ta; ẹzẹ ọnị ịị nyị ọ sị vara ayodu.

¹⁶ Avaba ịsị ẹnị yaa sị me eyi zị ệ ta. Ya sị da agụvị ebira odivi ọnị ị mẹ.

¹⁷ Ịrẹyị ẹnẹnị ẹ raa mẹ ka ayị ayị ọ va zi, ẹgọ ẹ yị kụkụ zẹẹ ka ye re ẹtẹ ẹtẹẹrẹ ị maa jị òrèrè,

¹⁸ agụvị ka ataba Ịzayọnị ọ sị tụ́ osusu, dị ahịka irezi ịnị avị ẹ kụkụ aa woowo ngụ ịnị anị zị nị.

¹⁹ Ama ẹwụ, Ẹnẹyịmavara ọ vị ohinọyị pooro zịna-zịna nị. Ẹ wa rẹ vaa mẹ̀ ịjọva pooro ne tu ẹzẹtẹ ẹhẹ nị.

²⁰ Sị ẹ vẹ dị Ẹnẹyịmavara maanị hi ayị ayị gọdọ? Sị ẹ vẹ dị ụ maanị và ịrẹma ayị gọdọ?

²¹ Ẹnẹyịmavara kwogwo, kụ yị varẹma ka ẹngụ awụ vẹ! Kụ yị varẹma! Navọ wa và ayị ịrẹma nọ udi ụbanyị ayị ịyẹẹyẹ.

²² Ẹnẹyịmavara ụ wáá sị yị yi tịtẹ saka-saka nị? Aanị ka ọyịkụ awụ ẹ yị vaa nyị ẹhwị?