Arụwẹ 4 - IWE ỌNỊNỊ

Arụwẹ Ọhụna Ọvavịrẹma ọyị hyẹdụ Ijerusarẹmị Ọnịsẹ kà:

¹ Kaaa! Ezi Anijerusarẹmị ana vịdị maanị nyị ụbanyị anka igooru ana za ẹtẹ avọọ ẹ maanị mi aanị nị? Ịrẹta ana sị da irehi Ohomorihi ẹ kụ gara và hí avaba oze ẹkụra.

² Ezwọọmụha Anịzayọnị ệ vịdị nyị ụbanyị anka igooru, ama ọyaanị, ẹ́ kụkụ sị mẹẹ anka ụnọkọ ana a sị ụmọpa mẹ avọọ nị.

³ Irezi ịnị enyi kịị kà ezi anị ịrẹva, ama aza amị vị ana sị mẹẹ anka inomi ana aā hị́ igonggo ana chamayị yị ezi avọọ.

⁴ Ẹẹ navọ ezinụvọ ẹnịnị ka ụngwẹ ọnịrị onyi ọ̀ọ wụ̀ wa ha; ezi ẹnịnị aa pa ịsọyịrị zị ama ẹ yị nyị ọza ana sị yị wa.

⁵ Aza anaā vịdịị rị ịsa ene zoza hu kere-kere, ụngwẹ kụkụ aa wụ̀ va hi oze ẹkụra aanị nị. Aza ana ahịka ẹẹ̀ ịdịị rị vọ ku, ẹ kụkụ aa tọ̀ọ́ ịsa hụụnị itutu rị aanị nị.

⁶ Ụya ana aa sị rị aza amị, óo divi huni ụya ọnị Anisodọmị nịnị rị. Isodọmị ọ vị ẹkụra ọnị Ohomorihi vú ẹtẹ avaavo nị.

⁷ Ezi anọrụ ayị e yi du ha, ệ nị yakị-yakị. Dị ẹ yaa yamị-yamị zị ẹnịrị ẹngụ ọnịya, ọchẹngụ ẹnịnị aa tototo anka uweyi ọkatarihi ana aā hị́ ịsahwaya avọọ nị.

⁸ Ama booro aanị ẹnịnị e mine hu ụnọkọ aremi. Ọza ọ̀ọ gẹrị wa oze, ẹ yị yaa yẹ wa. Ụpa ẹngụ ẹnịnị ọ ta hịnya na za ẹchụkụ. Ẹẹ wụ pooro anka ọkụ ọyịwụ.

⁹ Aza ana a wụ̀ eyi ịrẹkụ e dahi huna aza ene vene sù ene e yi re ịsa rị, dị ụngwẹ tangwa wụ̀ wa va ha nị.

¹⁰ Ẹngụkata ana vẹ, vị ana kụ odivi gẹ ẹngụ. Anyẹnẹẹ ana ahịka ẹẹ ngwayị ezi ẹnịnị ẹtẹẹtẹrẹ, vị ana kụkụ vana sị ezi ẹnịnị mẹ ịsọyịrị, dị ẹ yaa chịnẹ wa rị nị.

¹¹ Ịjị ọyịkụ Ẹnẹyịmavara hịrẹ ụna tu wa, dị ọ rị ẹkụra Ịzayọnị ịra na ka ẹtẹ nị.

¹² Ẹ yị nyị ohinọyị nịnị, a vị ọza ọnyọọnyị ịnị ẹhẹ ana dọ vị ịzẹyịza ka ọnịvị Anijerusarẹmị ẹ zụ jịnẹ ẹbanoze oze ana aā zịị ngụ Ijerusarẹmị vụrụ-vụrụ.

¹³ Ama ebira odivi ọnịsẹ nịnị ọnịrị ohirẹsụ irehi Ohomorihi nịnị ọ mẹ ka aa wụ̀ aza ana aa mẹ ịzẹyịzaa ha nị.

¹⁴ Ọnịsẹ ọnịrị ohirẹsụ irehi Ohomorihi ẹnịnị vị anaa ngụ ubooro zịịzị anka ogweyi avọọ. Anya aza ẹnẹ mẹ̀ ka a wụ̀ vị ene che ku wa, dị o du wa ẹngụ. Ẹ yị nyị ọza ana kụkụ dọ ka ọnị ọ hyakụ sị ụvọ kanyị wa awuru.

¹⁵ Dị aza kuku ee na owu ku wa ka ẹ kana kwooze, asị ẹ sị ụvọ kanyị ẹnị agụvị ka ẹ sị ẹngụ ẹnịnị du ẹngụ nị. Ẹnẹnị vana kụkụ a vaa chi vaa hịrẹ ngụ ẹkụra zị nị. Dị ọzọza jị obori ẹnịnị nị.

¹⁶ Ẹnẹyịmavara ọnị ụvọta ọ gara wa hi ozi ni. Ẹ yị kụkụ hị́ ịrẹyị ẹnịnị ịrẹyị. Ẹnịnị ẹ yị kụkụ nyị ụbanyị vụrụ-vụrụ.

¹⁷ Eyi ayị ọ sị jị tụ oze i mee sì ọnọgụvọ ọnị ye yi ve re. Ẹnị ee zi ọgụvọ pooro ne tu ka ẹnị ee zi anẹkụra ẹnị ẹ̀ yị nyị ịsị ẹ zụ mẹ ka, ẹ̀ va gụ ẹnị ụvọ.

¹⁸ Agụvị ọnịvị ayị enee bè yi ahụ-ahụ, yẹ yị kụkụ nyayịnẹ va tụra oze. Dị ẹ kà, eyi ayị ọ sị nị ọ, a sị ẹkụhị ayị za ịrịka, ayị ộ ta o.

¹⁹ Ẹnịnị ẹ rẹ huni ọkasịmẹ, ẹ maa dụ ẹnị chi ataba. Ệ dụ yị na ngụ ịnị ataba. Ịnị ụnọmị ọnị yị ka ya na tẹ̀ vị ọnị aza anaa dụ aanị na tẹ̀ hí ee zi yị.

²⁰ Ẹ raà za ohinọyị ọnị Ẹnẹyịmavara nyị yị yị ka ya sị eyi tụra. Ọnị ọ vị ọza ọnị ị sị ayị tụra ka ọ vaa dọ yị ha hụnị ụvọ anẹkụra tụra anẹkụra anaa vị eyi ịrazị ka yị nị.

²¹ Ẹwụ nịnị Anedomi ọnịrị Anuzi waa jẹ ịrajẹ, dị waa mẹrị nịnị booro aanị. Ama yẹ́ ka ụyọrị awụ nịnị aa vẹ ịsọnsọọnị. U vee hu ụya anka eche dị aa mẹrị wụ, dị ụ tụ ẹngụ awụ ahwaahụ.

²² Ụyọrị Anịzayọnị vaa ta. Ẹnẹyịmavara ẹ yị kụkụ vaa za ayị ku aha ịzị a za ayị ọrịhị ne hi aanị. Ama Ẹnẹyịmavara vaa sị ụya ịvị Anedomi rị wa. Ọ vaa kụ wa uruvo hi ẹhẹ dị è re ebira odivi ẹnịnị.