Arụwẹ 1 - IWE ỌNỊNỊ

Arụwẹ Ịpaapa Ayodu ọnịrị Ịrịnya Ijerusarẹmị Ọnịsẹ kà:

¹ Oogwoo, Ijerusarẹmị ana vịdị maanị nyị aza a maanị tụ osusu aanị nịị! Ẹkụra ọnị avaba anẹhẹ vịdị maanị sị ụbanyị yị ọ kụkụ tịtẹ goo anka osoku aanị nịị! Ẹkụra ana vịdị ya ọvịdị ẹkụra ana vọ, ọ kụkụ vị ọrịhị anẹkụra ana vọ aanị nị.

² Avaba ịrahụ vị ọnị Anijerusarẹmị aa jị òrèrè dị eyi ẹnịnị vị ẹgọ-ẹgọ. Ịnị avaba aza ẹnị ẹnịrịị vịdị vị ọta ẹ́ yị va nyị ikonya ana va sị wa ayị nẹtẹ. Avaba aza ọnị ọnịrịị vịdị zee vi ene vene e, dị ẹ varẹma kụkụ kwẹẹtẹ tu wa nị.

³ A sị Anijuda nịnị dụ hụrẹ ẹkụra ẹnịnị. Ẹyaa rị ụya. Ẹnịnị ẹ sị vara ọrịhị. Ẹnịnị vị ana kụkụ ra ẹkụra ọsa ịzị ẹnịnị ẹ̀ yị nyị ẹtẹ tụ. Aza anaa dụ wa vị ana kara wa okiri-okiri, ẹnịnị ẹ yị re oze zwè zị.

⁴ Avaba oze Ijerusarẹmị aa zị ẹngụ ka ẹ yị ọza ana aa zị ẹnị. Avaba Oze ovwoovu ọbanyị anaā zịị ngụ ẹkụra vi osusu Ẹ yị nyị ọza ana kụkụ a vẹ ịnị irehi Ohomorihi vaa mẹ ahẹkẹ ẹkụhị eche. Ezi ẹnyẹnẹẹ anaā jị ahẹ ịnị irehi Ohomorihi kụkụ e sụ ùnè, dị ohirẹsụ irehi Ohomorihi nịnị eè rimanya nị. Ijerusarẹmị aa ba arụwẹ ọngwọọngụ.

⁵ Ẹnẹyịmavara ộ sị ụya rị Anijuda nịnị agụvị ebira odivi ẹnịnị, dị ọnịvị ẹnịnị nyị ẹbẹẹba ẹnịnị dị ẹyaa mẹ ọda tụra wa ịrẹsụ nị. A kụ ezi ẹnịnị za ọrịhị ne hi ụnọngụ-ụnọngụ.

⁶ Ụbanyị Anijerusarẹmị ịyẹẹyẹ ọ sị vara ịtọpa. Ẹnị ọdọvịdị ẹnịnị vana kụkụ sị mẹ̀ ẹ anka ùnè ọnị ụngwẹ sị tụ ọkụmị avọọ. Ẹ́nịnị kụkụ sị mẹẹ uye ọnị ozube aa dụ dị echi sị ọ ha avọọ nị.

⁷ Anijerusarẹmị maa rị ụya, ẹ kụkụ aa tamayị ẹhẹ ọyịza-ọyịza ene ẹnị ra ịyẹẹyẹ. Ịjị ụvọ ọnịvị ẹnịnị ku wa, ẹnịnị e yi re ọza va gụ wa ụvọ, dị ọnịvị ẹnịnị kụkụ è nyị wa unyi nị.

⁸ Anijerusarẹmị nịnị ẹ sị tẹ agụvị ebira odivi-odivi ẹnẹ yaa mẹ̀. Ẹ yị kụkụ nyị ụbanyị vụrụ-vụrụ. Asị iruvo ẹnịnị re. Eyee rimanya, ụhị maa nyị wa ẹ kụkụ à sị eyi tẹ̀.

⁹ Ebira odivi ẹnịnị vana aza ee re chapaa, ama ẹnịnị é yi rò ịrẹyị ka sẹ vaa vị ọvavịrẹma anị kẹ. Agụvị avọọ ẹ maanị hyẹdụ divi-divi nị. Ẹ́ yị nyị ọza anaa sị wa ayị nẹtẹ vụrụ-vụrụ. Ụvọ ọnịvị ẹnịnị o ku wa, dị ẹ kụkụ e nowu ka Ẹnẹyịmavara ọ̀ vayị ẹnịnị nị.

¹⁰ Ọnịvị ẹnịnị ẹ raà kụ avaba ogu ẹnịnị. Ẹnịnị ê re ọnịvị ẹnịnị maa ngụ ịnị irehi Ohomorihi, ịzị Ẹnẹyịmavara kà ọọ vị aha eenyisi yị aza ẹnẹ yị vị Aniju ka ẹ̀ ngụ.

¹¹ Avaba Anijerusarẹmị aà jị òrèrè ọngwọọngụ e mee si ịsọyịrị; Ẹ kụkụ aa sị ogu ẹnịnị na dọ ịsọyịrị agụvị asị ụngwẹ wụ̀ ẹnị. Dị Anijerusarẹmị kụkụ a jị òrèrè, dị ẹ yaa hị́ Ẹnẹyịmavara kà ọ̀ navọ ò re ụya ọnị ẹnị aa rị aanị nị.

¹² Ẹ yaa hị́ avaba aza anaa parahu ẹ maa jị òrèrè. Ẹ ka, “Ọzọza o re ịsị Ẹnẹyịmavara sị ẹnị mẹ̀. Ẹ yị nyị ọza ana maanị rị ẹngụ ụya ọnị ẹnị rị aanị da”. Ẹnẹyịmavara vị ana sị ọyịkụ-ọyịkụ sị sị ụya rị ẹnị.

¹³ Ohomorihi ọ raà ka ịra ku ẹnị hụrị ẹbẹẹba, ẹngụ ẹnịnị ọ ta jịnẹ ịra gogogo. Ịrẹpa ọnị Ohomorihi va zi ẹnị, ọ sị ẹnị za nya ẹtẹ, dị ọ navọ ẹnị ka ẹnị ẹ̀ maanị rị ụya nị.

¹⁴ O re avaba ịvị ọnị ẹnị mẹ̀, dị ọ sụ́ ọ vabẹ nị; Dị ọ sị ọọ gẹ ẹnị ọrọkọ, dị ẹnya sị ngụ ẹnị nị. Ẹnẹyịmavara ộ sị ẹnị chire ọnịvị ẹnịnị ụvọ. Ẹ yị hyakụ nyị ịsị ẹnị zụ pe wa mẹ vụrụ-vụrụ.

¹⁵ Ẹnẹyịmavara ô nyị isoja ayị ana kata hu kere-kere unyi; dị ọ tụ isoja hụrị aha ọsa dị e ve vu ezwọọmụha ayị ẹtẹ nị. Ệ kwọrọ avaba aza ayị và ha anka a mẹẹ kwọrọ asẹ ịnị ụkọ avọọ.

¹⁶ Ịsị ẹ vị iruvo ọnị maa sịị jị òrèrè dị ẹgọ ee si ịnị eyi amị yị. Ẹ yị nyị ọza ana zụ sị ayị amị nẹtẹ vụrụ-vụrụ. Ẹ yị nyị ọza ana zụ hụ́ mị ayọvị. Ụvọ ọnịvị ayị ọ sị kara ayị; ẹ sị yị tụ avosusu.

¹⁷ Anịzayọnị nịnị aa da ịpẹ ka à gụ ẹnị ụvọ, ama e yi re ọza gụ wa ụvọ. Ẹnẹyịmavara ọ raa hị́ ọnịvị ẹnịnị ana kara wa ịrẹkụ tụ wa. Dị ẹ kụkụ aa sị Anijerusarẹmị mẹ enyinyi nị.

¹⁸ Ịsị Ẹnẹyịmavara mẹ̀ vana vọrọ, agụvị ka ẹnị ẹ rẹẹ yị saasa ịrẹyị Anị nị. Ama re ụya ọnị ẹ yaa rị aanị. A raà kụ ezi ọnọrụ ẹnịnị ọnịrị ezi anẹẹ ẹnịnị za ọrịhị ne hi ẹkụra ọsa.

¹⁹ Ệ hị́ aza ene vịdị sì ịrẹyị ẹnịnị, ama di e vene wa nị. Ohirẹsụ irehi Ohomorihi nịnị ọnịrị azọkụ nịnị e wusu hi ịnị ẹkụra é mee si ịsọyịrị ọyị za ayị zu.

²⁰ Tee! Ẹnẹyịmavara navọ we re ẹngụkata ọnịrị ụya ọnị yaa rị aanị. Ayị ayị o si du chuku-chuku ịsị ebira odivi sị yị mẹ̀. Aà wụ̀ aza ha ịnị ubooro, wàa va yà ịnị eehi usu rẹ sị ngụ tu wu.

²¹ Wụ́ ị maa jị òrèrè, ama ẹ yị nyị ọza ana vọrọ ka ọ sị ayị amị nẹtẹ. Avaba ọnịvị ayị ẹ raà wụ́ ẹngụkata ọnị Ẹnẹyịmavaraene kụ tu yị dị ẹ yaa jẹ ka ọ yara mẹ nị. Ẹnẹyịmavara sị ẹkụhị ọnị ụ wo oto vẹ, dị ọnịvị ayị nịnị ẹnị ẹ rẹ maanị rị ụya ọnọnị.

²² Ẹnẹyịmavara ọ̀ navọ ọnịvị ayị ẹ̀ rị ụya avaba ebira odivi ẹnịnị. À sị ụya rị wa anka ị maa rị ụya ebira odivi aanị. Ẹnị aa jị òrèrè ọngwọọngụ agụvị ụya ọnị ẹnị aa rị, dị ẹngụ aa zị ẹnị tụ ịnị ịhị nị.