Aniroomi 9 - IWE ỌNỊNỊ

Ohomorihi ọnịrị aza ọnị ọ nyị

¹ Ịrẹyị ọnị maa kà aanị vị ịzẹyịza. Mâ sị Ikirisiti tẹ ivenu, me yi cheeche. Ayị amị ọnịrị Ụhwẹ Ohomorihi ọ rẹ dọ ivenu tụ́ ọọ bẹẹ.

² Ịzẹyịza, ayị amị o si du ẹtẹẹtẹrẹ, ịrẹyị ọnya aa zị mị ẹngụ pooro kẹnẹ ịnị ayị amị.

³ Mâ hyakụ zụ dọ ka Ohomorihi ò chì hi mi, dị ọ̀ sị mị hụụ ịdị Ohinọyị ọnị ọ nyị ka ọ̀ dọ yị há, dọ ịrẹsụ anda ayị. Anka ọzarẹyịrẹsụ, ẹnị ẹ vị aza amị nị;

⁴ ẹnị ẹ vị Anisirẹrị nị, ẹnị Óhomorihi sị Mẹ ezi anị, dị ọ mẹ ka ẹ̀ nyị tụ́ ịnị ụbanyị anị nị. Ohomorihi ô wo oto irenyi-irenyi yị wa, dị ọ rẹ sị ọda anị yị wa nị. Ohomorihi ọ rẹ sị zụ wa a mẹ̀ vọrọ ka àa hẹkẹ ọnị, dị ẹ̀ rẹ dọ ịsa oni Ohomorihi kà a ka ẹ yị zụ nyị ka ọnị ọ yị vaa mẹẹ yị wa nị.

⁵ Ịdị ẹnịnị ohiku ayị chị hụrẹ vẹ nị. Anka ọzarẹyịrẹsụ, ịpa ẹnịnị Óhinọyị oni Ohomorihi nyị ka ọ̀ dọ yị há chị hụrẹ vẹ nị. Ọnị ọ̀ vị Ohomorihi avaba aza nị, ọnị ị vaa sị ụgaa yị pooro nị. Aamị.

⁶ Mẹ yị kà a ka ịrẹyị oni Ohomorihi kà, ọ sị vị osusu. Ẹ yị vị avaba aza ana ka ẹnị vị Anisirẹrị, ẹ̀ vị Anisirẹrị obooro.

⁷ Ẹ yị rẹ vị avaba ezi Abụrahamị ẹ vị ezi anị obooro, agụvị ka erima ezi Ayiziiki kẹnẹ, a vaa za ịrịkaa tụ́ ịnị ezi Abụrahamị nị.

⁸ Ọnọọ ọ vị ka ẹ yị vị avaba ezi ana ẹ yị ma yị Abụrahamị kẹnẹ, ẹ vị ezi Ohomorihi. Ama ezi ọnị vịdị sị ịzẹzẹ anị zẹẹ ka Abụrahamị vaa ma, dị ọ va ma wa, ẹnị ẹ vị ezi anị obooro nị.

⁹ Ịrẹyị ana a vịdị kà yị Abụrahamị yị. Ohomorihi ka: Ụmẹ òo si tù, ọnị vaa vẹ, dị ọnị ve tù ka Ịsara ọ sị ozi ọnọrụ ma.

¹⁰ Ẹ yị vị ọnọọ kẹnẹ; Irebeka ộ ma ezi ẹẹva, ana ada ẹnịnị vị ọnya. Ada ẹnịnị ọnọọ ọ vị Ayiziiki, ohiku ayị nị.

^11-12 Ama dị ọ va yẹ ka ọnịị ma ezi ẹnẹẹ, dị ẹ hyakụ va yẹ ka ẹnịị mẹ ọyịza, àa vị odivi, Ohomorihi ộ kà a yị Irebeka ka: Ana vị ọzọkụ ọ vaa hẹkẹ ana vị Ozweyi nị. Ọnọọ ộ sị zụ̀ ka Ohomorihi o yi sì eto ọnị ọnị mẹ ini oze ọza ọyịnyị, ọ̀ jẹẹ ịrẹsụ ịsa ọnị ọza sị ụvọ anị mẹ. Ama avaba anị vị ana yà ịnị ụvọ Ohomorihi ana hị́ ọza.

¹³ Á vịdị chẹrẹ ẹ tụ́ ini Iwe Ohomorihi ka: Oni ô sì ịrẹyị Ijekọvụ, ama oni e yi sì ịrẹyị Iisọ.

¹⁴ Sị ị vaa kà aanị? Ị yáá vaa kà a ka vi Ohomorihi ọ̀ yị nyị ịzẹyịza nị? Ọchọnọyịrẹsụ!

¹⁵ Ohomorihi ộ vịdị kà a yị Imosiisi ka, “Ọza ọnị ọnị òo sì ka ọnị aa ngụ ayị anị, dị ọnị ngụ ayị anị. Ọza ọnị ọnị òo sì ka ọnị aa vayị anị, dị ọnị rẹ vayị anị.”

¹⁶ Agụvị avọọ ẹ yị vị ịrẹyị ịsị ọza sì, à vị ka ịsị ọza mẹ ọ vị, ịrẹyị ayamva Ohomorihi kẹnẹ ọ vị nị.

¹⁷ Ini Iwe Ohomorihi, ộ kà a yị ohinọyị Anijipiti ka: Iruvo ọnị ọnị sị sị wụ tụ́ ẹbẹẹba yị: Oni ee sì ka ọnị ọ̀ sị ụkata anị zụ̀ aza ini oze ịrẹyị awụ. Dị avaba aza ẹ̀ rẹ zụ wụ́ ịrẹha anị ngụ ẹhẹ zịịzị.

¹⁸ Agụvị avọọ, ọza oni Ohomorihi òo sì, dị ọ vayị anị. Ọza oni òo re sì, dị ọ mẹ ka ọ̀ nyị ayị ọkatẹngụ.

Aza oni Ohomorihi òo sì kẹnẹ ọọ̄ nyị nị

¹⁹ Aza ẹnyị awụ nịnị ẹ zụ aa kà a ka: Àa vavọọ yọ nị, sị ẹ vẹ di Ohomorihi kụkụ aa yịị jị ịvịị yị aza? Ịsị Ohomorihi òo sì ka ọnị aa mẹ, ene zụ yi ọọ?

²⁰ Ẹ yị vị avọọ ọ mẹ̀ vị, oo. Ẹwụ ọzarẹyịrẹsụ kẹnẹ, ẹnẹ vị ẹwụ ana aa và Ohomorihi ị̀karenu? Ụnọkọ ọ yị zụ kà a yị ọza ana jị ọọ ka, “Ho, sị ẹ vẹ dị ụ maanị jị mị?”

²¹ Aanị ka ọnụnọkọ, ọ̀ọ dà ụvụ, ọ yị zụ sị oze ọnya jị ụnọkọ anaa vaa sị mẹ̀ ịsa ẹtẹẹtẹrẹ, dị ọ sị ọsa jị ụnọkọ anaa vaa sị mẹ avaba ịsa kẹnẹ?

²² Ohomorihi óo sì ka ọnị ọ̀ sị zụ̀ aza ẹnyị ka ọnịị̄ kụ́ ayị, dị ọnị rẹ nyị ụkata nị. O si tù ka à wụ̀ aza ẹnẹẹ, ama Ohomorihi ọ nyị nyị isuuru ẹtẹẹtẹrẹ, dị aa yịị sị ẹngụụ dọ ịrẹyị ẹnịnị ọnọọ vaa kụ́ ayịị hi.

²³ Ohomorihi o re sì ka ọnị ọ̀ sị zụ̀ aza ẹnyị ka ọnị ộ nyị ụbanyị ẹtẹẹtẹrẹ. Aza ẹnẹẹ ẹ vị aza ọnọọ raà vayị ẹnịnị nị. Dị ọ rẹ vịdị mẹ wa tịtẹ ka ẹ̀ nyị tụ́ ịnị ụbanyị anị.

²⁴ Mị ka ẹyị ọnọọ hị́, ayị vị hụụnị Aniju nịnị kẹnẹ, ama hụụnị Anigiriki nịnị bẹẹ.

²⁵ Ohomorihi ộ vịdị zị oze ịnị ụvọ Ihoseya (ana vị ọnịsẹ ịyẹẹyẹ) kà a ka, “Aza ẹnẹ ẹ̀ yị vị aza amị, mị kụkụ vaa hị́ aza amị nị. Ọza oni mè yi vịdị sì ịrẹyị anị, mị kụkụ vaa hị́ ọza oni mi sì nị.

²⁶ Ịzị aa yà kà a yị wa gẹdẹ-gẹdẹ ka ayị vị aza Ohomorihi ẹ vị, ịzọọ a rẹ vaa yàa hị́ wa aza Ohomorihi ana yàra nị.”

²⁷ Ayịsaya o re vịdị nowu kà ịrẹyị ini oze Anisirẹrị ka, “Anisirẹrị ẹ̀ẹ daka rụrụ pooro anka ààrẹ ụtọ ókụ̄, chee ịnị ẹnịnị kẹnẹ Óhomorihi vaa dọ ọ há nị.

²⁸ Ọ yị vaa jẹẹ dị Ohomorihi ọ̀ wụsẹ mẹ̀ ọkarẹyị anẹhẹ, dị ọ ta.”

²⁹ Ayịsaya ọ rẹ vịdị kà a ka, “Ẹ̀ yị vị oni Ohomorihi Ochẹtẹngụ navọ aza chee yị, ị yaanị kụkụ sị mẹẹ anka anẹkụra Isodọmị avọọ nị, dị ị rẹ yà anka anẹkụra Igomora.”

Anisirẹrị nịnị ẹ yị dọ ịsị Ohomorihi mẹ eto anị yị wa.

³⁰ Sị ị vaa kà aanị? Ya zụ kà a ka Anigiriki, dị è yi re sì ka ẹnị ẹ̀ jị ịhị yị ẹngụ ẹnịnị, Ohomorihi ọ raà jị ịhị yị wa, agụvị ka ệ sị ayị tụraa.

³¹ Ama Anisirẹrị ana sị eyi tụra ọda, ka ọ̀ jị ịhị yị ẹnị, eyi ve re ẹngụ ọda ọnọọ.

³² Sị ẹ vẹ? Agụvị ka ịsa ẹnẹẹ mẹ ọ yị jẹẹ ịrẹsụ ẹdọwụ, ama ị́rẹsụ ụkọrọ ụvọ ẹnịnị ọ jẹẹ nị. Agụvị avọọ ẹnịnị ệ tụ́ ahụ, dị ẹ và angga ịnị ịrẹta ọnọọ anaā mẹ ọzaa tụ́ ahụ nị.

³³ Â vịdị vavọọ chẹrẹẹ tụ́ ini Iwe Ohomorihi ka, “Re! Mâ sị ịrẹta ọnya tịtẹ Ịzayọnị; ịrẹta ọnị ọzaā tụ́ ahụ ịnị anị ọ vị nị; ịrẹta anaā mẹ ka ọza ọ̀ hyẹdụ ọ rẹ vị nị. Ama ọza ana àa sị ayị tụraa, ụhị ọyị vaa nyị ọọ.”