Aniroomi 8 - IWE ỌNỊNỊ

Ụhwẹ Ohomorihi ọ mẹ ka ya yàra obooro nị

¹ Booro aanị, we si oo re nịnị ka ọza ọ yị kụkụ zụ jị ịvị yị ọza ọnị ọnịrị Ijeesu Ikirisiti sị vị ọnya.

² Ị mẹ̀ kụkụ yà ịnị ụvọ Ụhwẹ Ohomorihi aanị, ọ raà mẹ ka ẹyịrị Ikirisiti ọ̀ vị ọnya, dị ya yàra obooro. Ụhwẹ Ohomorihi ọnọọ ọ sị mị dọ hụụnị ụvọ ọda anaā sịị ọzaa mẹ ịvị, di o sú.

³ Ịsa ọnị ọda Imosiisi ọ̀ yị zụ mẹ, agụvị ka ọza ọ yị zẹẹ ka ọ̀ sị ụkata anị tụ́ ẹhẹ, Ohomorihi ọnị ọ sị ọọ mẹ. Ohomorihi ộ tụ́ Ozi anị vẹ ẹhẹ anka ọzarẹyịrẹsụ ana vị ọnịvị avọọ, ka ọ̀ va kụ́ ịvị aza kwooze. Ộ vẹ agụvị ọ̀ va vị ịsọvọ ịvị ana aza ana vọ mẹ.

⁴ Ohomorihi ộ vavọọ mẹ, agụvị ẹyị ana aa zị ụsẹ anka Ụhwẹ Ohomorihi mè sì, ọ̀ zụ mẹ avaba ịsa ana vọrọ saka-saka ọnị ọda Ohomorihi sì ka aa mẹ.

⁵ Aza ana aa mẹ̀ ebira anka ọchẹngụ ẹnịnị mè sì, vị ana sị ayị tụ́ nị ịsa ọnị ọchẹngụ ẹnịnị òo sì kẹnẹ. Ama aza ana raa mẹ̀ ebira anka Ụhwẹ Ohomorihi mè sì, vị ana rẹ sị ayị tụ́ ịnị ịsa ọnị Ụhwẹ Ohomorihi sì kẹnẹ.

⁶ Ọza ana àa sị ayị tụ́ ịnị ịsa ọnị ọchẹngụ anị sì kẹnẹ, isu aa za a ịrẹsụ nị. Ama ọza ana àa sị ayị tụ́ ịnị ịsa ọnị Ụhwẹ Ohomorihi sì, vaa yàra obooro, dị ọ rẹ nyị ẹngwọọrọ.

⁷ Ọza ana àa sị ayị tụ́ ịnị ịsa ọnị ọchẹngụ anị òo sị kẹnẹ, ọnịvị Ohomorihi aa vị nị. Iruvo ọ vị ka ọ yị vaa mẹ̀ ịsa oni Ohomorihi ọ̀ọ mẹ ọda anịị yọ; ọ yị hyakụ aa zụụ mẹẹ bẹẹ.

⁸ Agụvị avọọ, aza ana sị ayị tụ́ ịnị ịsa ọnị ọchẹngụ ẹnịnị sì kẹnẹ, ẹ yị zụ mẹ̀ ebira ene zé Ohomorihi eyi.

⁹ Ama Ụhwẹ Ohomorihi ọ̀ọ yà ịnị ayị ẹwụ nịnị, wẹ yị kụkụ sị ayị tụ́ ịnị ịsa ọnị ọchẹngụ awụ nịnị sì kẹnẹ. Ịsa ene zé Ụhwẹ Ohomorihi eyi, ụ sị ayị tụ́ ịnị anị nịnị nị. Aza ọnị Ụhwẹ Ikirisiti ọ̀ yị yà ịnị ayị anị, ẹ yị vị aza anị ẹ vị.

¹⁰ Ikirisiti ọ̀ọ sị yà ịnị ayị awụ nịnị, u vee sú nịnị ịnị ẹhẹ ọnọnị agụvị ịvị. Ama Ụhwẹ Ohomorihi vaa mẹ ka wa yàra nịnị pooro zịna-zịna, agụvị ka Ohomorihi ọ sị ịhị jị yị wụ nịnị.

¹¹ Ohomorihi ọ ha Ijeesu kwẹẹtẹ hụụnị isu nị. Ụhwẹ Ohomorihi ọnọọ ọ̀ọ yà ịnị ayị awụ nịnị, ọnị ana ha Ijeesu kwẹẹtẹ hụụnị isu, rẹ vaa mẹ ka oku awụ nịnị ọ̀ ha kwẹẹtẹ. Ụhwẹ Ohomorihi ọnọọ ana yà ịnị ayị awụ nịnị ọ vavọọ vaa mẹ̀ ẹ nị.

¹² Ẹwụ nịnị ẹyịnyara amị, wee re nịnị aanị ka ẹ yị ọda ana kụkụ za yị ka ya a mẹ̀ ịsa ọnị ọchẹngụ ayị òo sì kẹnẹ.

¹³ Wàa mẹ̀ ebira anka ọchẹngụ awụ nịnị mè sì kẹnẹ, isu aa za a ịrẹsụ nị. Ama wàa zị oze ịnị ụvọ Ụhwẹ Ohomorihi sị ịsa edivi ọnị ọchẹngụ awụ nịnịị̄ sì tịtẹ saka-saka, ụ vaa yàra nịnị pooro zịna-zịna.

¹⁴ Avaba aza ana àa zẹẹ ka Ụhwẹ Ohomorihi ọ̀ọ sị oze zụ̀ ẹnị, ẹnị ẹ vị ezi Ohomorihi nị.

¹⁵ Ụhwẹ Ohomorihi ọnị ọ sị wụ nịnị ọ yị za wụ nịnị ọrịhị, ana zụ mẹ ka we kukuu hí angwa nịnị. Ama Ụhwẹ ọnọọ ộ sị ụkata yị ka ye zuu nowuu hị́ Ohomorihi ka; Ada ayị!

¹⁶ Ụhwẹ Ohomorihi ộ dọ ayị ayị ivenu ka ezi Ohomorihi ị vị nị.

¹⁷ Ị mẹ̀ sị vị ezi Ohomorihi aanị, ị rẹ vaa dọ ẹyịza oni Ohomorihi sị tịtẹ yị aza anị. Ẹyịrị Ikirisiti re dudu vaa dọ ẹyịza oni Ohomorihi raà sị tịtẹ yọ. Yàa rị ụya, anka Ikirisiti ọnị mẹ̀ rẹ rị ụya, ẹyị rẹ vaa nyịị tụ́ ịnị ụbanyị ọnị ọ nyị.

Ụbanyị ọnị vaa nyị, ọza ẹ yị zụ kà a

¹⁸ Mâ yẹ kaakara ka ụya ọnị yaa rị booro aanị, ẹ yị nyị ịzị o vee tù ụbanyị oni Ohomorihi sị tịtẹ yị.

¹⁹ Avaba ịsa oni Ohomorihi tụ́, ee zí eyi ka ịhị Ohomorihi ana sị ụbanyị ezi anịị zụ̀.

²⁰ Ohomorihi ọ sị ọkarẹyị mẹ ka avaba ịsa ọnị ọnị tụ́, ẹ̀ kụkụ vị kẹnẹ-kẹnẹ. Ẹ yị vị ka ẹnị ẹ vavọọ sì ọ ọ yị ẹngụ ẹnịnị nị, ama avọọ ọza ana tụ́ wa mè sì ọọ nị. Ama â nyị ọyịtureyi ọnya,

²¹ ọnị ọ vị ka ẹkụhị ọnya, Ohomorihi vaa dọ avaba ịsa ọnị ọ mẹ tụ́, asị ẹ vụ̀ va ha. Ohomorihi vaa mẹ ka ẹ̀ nyị ẹngụ ẹnịnị, dị ẹ̀ nyị ụbanyị ene ezi Ohomorihi nịị vaa nyị.

²² Yâ yẹ ka vi ve tù ọyaanị, avaba ịsa oni Ohomorihi tụ́, vị ene ee tì, dị ẹ yà ịnị ẹngụkata anka ọnẹẹ ana aa barẹẹ avọọ.

²³ Ẹ yị vị ịsa oni Ohomorihi tụ́ kẹnẹ ẹ vavọọ ee tì. Ẹyị bẹẹ ana nyị Ụhwẹ Ohomorihi vị ana vavọọ ee tì tụ́ ịnị ayị ayị. Ụhwẹ Ohomorihi ọnọọ ọ vị ịsa ịpaapa oni Ohomorihi sị yị nị. Yâ jẹẹ ee zí ka ọ̀ va sị yị mẹ ezi anị, ọnị ọ vị ka ọ̀ va hị́ avaba ẹngụ ayị varẹma.

²⁴ Yâ nyị ọyịtureyi, agụvị avọọ a sị dọ yị há nị. Ịsị yaa tụra eyi anị, yèee re e, ẹ yị kụkụ nyị ka vị yaa tụra eyi nị. Ọza wéé kukuū zí eyi ịsa ene ee re?

²⁵ Ama àa vị ịsị yè yi re, ị yaa tụra eyi anị nị, vị ị tangwa aa sị isuuruu jẹẹ zí ọọ nị.

²⁶ Ụhwẹ Ohomorihi raa gụ ẹyị ẹnẹ ẹ̀ yị nyị ụkata ụvọ. Yẹ yị yara mẹ̀ aduwa, a mẹ̀ vọrọ; agụvị avọọ Ụ́hwẹ Ohomorihi ọnị ụvọta aa dá ịpẹẹ yị Ohomorihi yị nị. Ee tì ana ahịka irenu ọ yị zụ kà.

²⁷ Ohomorihi anaā zama ayị avaba azaa re, ọ rẹ yẹ ịsị ẹ yà ịnị ayị Ụhwẹ Anị, agụvị ka Ụhwẹ Ohomorihi aa dá ịpẹẹ yị Ohomorihi agụvị aza Ohomorihi, anka Óhomorihi mè sì ọ.

²⁸ Yâ yẹ ka avaba ịsa ana àa mẹ, vị oni Ohomorihiī mẹ ka ọ̀ vị ọyịza yị aza ene sì ịrẹyị anị; ọnọọ vị ka aza ọnị ọ sị hị́, anka ọ mẹ̀ mẹ eto anị.

²⁹ Aza oni Ohomorihi sị yẹ tịtẹ, dị ọ rẹ vịdị sị wa nyị tịtẹ ka ẹ̀ yà anka Ozi anị. Ozi anị ọnọọ ọ vaa vị ozi ịpaapa anị ịnị ẹnị ọrụrụ-ọrụrụ ana vọ ana vị ọyịnyara anị nị.

³⁰ Aza oni Ohomorihi sị nyị tịtẹ, dị ọ rẹ hị́ wa nị. Aza ọnọọ vavọọ hị́, dị ọ rẹ jị ịhị yị wa nyị. Aza ọnị ọ vavọọ jị ịhị yị, dị ọ rẹ sị ụbanyị yị wa nị.

Ẹ yị nyị ịsị ẹ zụ sị yị hụụ ịdị Ohomorihi

³¹ Sị ị kụkụ vaa kà booro aanị? Ohomorihi ọ̀ọ yà yị ịrẹma, ẹnẹ kụkụ zụ kwẹẹtẹ tù yi?

³² Ohomorihi ẹnẹ ẹ̀ yị hyakụ sị Ozi anị ụvọta-ụvọta tẹ yị, ộ na a vọ ka ò sú yị avaba ayị. Ọza ana na aa sị Ozi anị ụvọtaa yị, si u ro ka ọ yị kụkụ zụ sị yị ọọhẹ kẹnẹ?

³³ Aza oni Ohomorihi sị nyị, ẹnẹ kụkụ zụ kà a ka ệ rị ịvị? Ẹ yị nyị, agụvị ka Ohomorihi ọnị ụvọta ọ raà jị ịhị yị wa.

³⁴ Áá nyị ọza ana kụkụ zụ jị ịvị yị wa? Ẹ yị nyị, agụvị ka Ijeesu Ikirisiti, ô wusu yị wa. Ohomorihi ộ hyakụ rẹ sị ọọ ha kwẹẹtẹ hụụnị isu bẹẹ. Ọ kụkụ yà eyi ụvọrị Ohomorihi booro aanị. Aa dá ịpẹ ịrẹyị ayịị yị Ohomorihi.

³⁵ Sị ẹ zụ sị yị hụụ ịdị Ikirisiti, ana maanị sì ịrẹyị ayị aanị? Ayodu wáá yọ? Ẹngụkata wáá yọ? Àa daka sị ụya rị yị, dị ụngwẹ aa kụ̀ yị, dị yẹ̀ yị kụkụ nyị ịta kú ẹngụ nị, yẹ yị vaa hụụ ịdị Ikirisiti ene sì ịrẹyị ayị. Ịrẹyị asigiri ọ̀ọ daka vẹ, à vị ka daa sị ụhwọ ka àa sịị wụ yị, yẹ yị vaa hụụ ịdị Ikirisiti.

³⁶ Â vịdị vavọọ chẹrẹ ẹ ka, “Agụvị awụ aza ee chire yi angwa eyinị-eyinị ka ẹnị vaa wụ̀ yị nị. Ẹ yaa mẹ yị anka atẹmẹ ana aa va naa wụ avọọ.”

³⁷ Ịnị avaba ịrẹyị ẹnẹnị, ọza ene sì ịrẹyị ayị, aa mẹ ka yaa nyị ẹbẹẹba saka-saka.

³⁸ Mâ yẹ kaakara ka yèe sú, yàa va yàra, ẹ yị nyị ịsị ẹ zụ sị yị hụụ ịdị Ikirisiti. Anggẹẹrị nịnị ọnịrị ori nịnị ana nyị ụkata beri ịsa ọyaanị, ọ̀ọ vị ịsa ịrẹma ụhwọọ,

³⁹ ọ̀ọ daka vị ẹbẹẹba, àa vị eku, àa vị ịsa tụra ịsa anaa mẹ, ẹ yị nyị ịsị ẹ vaa sị yịị hụụ ịdị Ohomorihi ana sị zụ̀ yị ini oze Ijeesu Ananyị yị Ohinọyị ọnị ọ nyị ka ọ̀ dọ yị há, ka oni ô sì ịrẹyị ayị.