Aniroomi 7 - IWE ỌNỊNỊ

Ọda ọ yị kụkụ zụ za oku

¹ Ẹwụ nịnị ẹyịnyara amị, aza ana yẹ ọda, m maa kà ịrẹyịị yị nị. Ọza òo yi sú, ọda nyị ụkata ị́rẹsụ anị.

² Wâ yẹ ka ọnẹẹ ana nyị ọnọrụ, ọda ộ zaa ka ọ̀ yà ịda ọva anị, ọva anị ọ̀ọ yị yà ẹhẹ. Ama ọva anị òo wusu, ọda ọyị kụkụ zaa ka ọ̀ yị yà ịda anị.

³ Ini oze avọọ, ọva anị ọ̀ọ yị yà ẹhẹ, dị ọ nọ ịda ọnọrụ ọsa nị, ọsẹrẹka a vaa hị́ ọọ nị. Ama ọva anị òo wusu, ọda ọnọọ ọ yị kụkụ zaa. Agụvị avọọ ọ̀ọ na nyị ọnọrụ ọsa, ọza ọyị kụkụ zụ hị́ ọọ ọsẹrẹka.

⁴ Ẹwụ nịnị ẹyịnyara amị, avọọ ẹwụ nịnị mẹ̀ rẹ yà nị. Àa vị ini oze ọda Aniju yọ, vụ ụ sị mẹẹ anka oku avọọ nị, agụvị ka ẹwụrị Ikirisiti óo wusu nịnị. Ọza ẹnẹsa ọ kụkụ nyị wụ nịnị nị, ọza ọnọọ a ha hụụnị isu nị. Agụvị avọọ ya kụkụ nyẹngụ aa mẹ ọyịza ana vaa sị ụgaa vaa yị Ohomorihi.

⁵ Ị mẹ̀ vịdị aa mẹ̀ ebira anka aza kẹnẹ mẹẹ̄ mẹ, yaa sị avaba ẹngụ ayịị mẹ̀ ịsa odivi ọnị ọchẹngụ ayịị̄ sì. Ọda ộ mẹ̀ ka ya hyakụụ mẹẹ hu avọọ. Isu ọ vị ọdịrẹma avaba ịsị ị vịdị vavọọ mẹ nị.

⁶ Ama booro aanị a sị yị dọ tịtẹ hụụnị ụvọ ọda ọnọọ. Vị ị sị mẹẹ anka oku avọọ ini oze ịsị ẹ vịdị za yị ọrịhị nị. Yẹ yị kụkụ hẹkẹ Ohomorihi ini oze ọkụkụ ana vị oze ọda ana chẹrẹ tịtẹ; oze ọwọọwa ọnị Ụhwẹ Ọnịnị sị yị, ị kụkụ aa zịị hẹkẹ ẹ nị.

Ọda Ohomorihi ọnịrị ịvị

⁷ Sị ị vaa kà aanị? Ịvị ọ́da wâ vị nị? Asị Ohomorihi zẹẹ! Ọda ọ mẹ ka ma yẹ ịsị aā hị́ ịvị nị. Mẹ yị yaanị yẹ ịsị aā hị́ eyọhụrẹ, ẹ̀ yị vị ọnị ọda kà a ka, “Asị ụ mẹ eyọhụrẹ!”

⁸ Ịvị ọ kụkụ raà zị oze ịnị ọda aa mẹ ka maa mẹ̀ eyọhụrẹ irenyi-renyi. Ẹ yị yaanị nyị ọda, ịvị vị ana yaanị yà anka oku avọọ.

⁹ Ịjị mẹ̀ yị vịdị yẹ ọda, máa yàra, ẹ yị nyị ịrẹyị. Ịjị ọda vẹ, ịvị ọ sị ụkata nyị,

¹⁰ aa ka à na kà, di mi wusu nị. Ọda anaa mẹ ka ọ̀ mẹ ka aza ẹ̀ yàra booro, vị ana mẹ ka emè sú.

¹¹ Ịvị ộ zị oze ịnị ọda si mi vene, dị ọ sị ọda ọnọọ kà a mị ka mée wusu nị.

¹² Àa vị ọdaa yọ, ọda ọnị vị ọnịnị, avaba ọda ọnya-ọnya vị ọnịnị, dị ẹ vị ịzẹyịza, di e re zoza nị.

¹³ Vị ọnọnị wâ vị ka ịsa ene zoza aa wụ̀ mị nị? Asị Ohomorihi zẹẹ! Ịvị ọ vavọọ mẹ nị. Ịvị ộ sị ịsa ene zoza, aa sịị wụ̀ mị, ka ọza ò zụ re ịsị ịvị vị. Agụvị avọọ ọda ộ mẹ̀ ka ọza ò zụ re ịzị ịvị divi ne tù.

Ịsa ẹẹva ana aa mẹ̀ ụkọrọ ịnị ayị ayị

¹⁴ Yâ yẹ ka ọda vị ana hụụnị ụvọ Ụhwẹ Ọnịnị vẹ, ama ẹmị vị ọzarẹyịrẹsụ kẹnẹ. Ịvị ọ sị mị za ọrịhị,

¹⁵ agụvị ka ịsa ẹnẹ ẹmị ụvọta aa mẹ, mẹyị hyakụ yẹ. Ịsị mi sì ka ma mẹ, mẹ mā mẹẹ. Ama ịsị mè yi sì ka ma mẹ, ọnị gẹdẹ-gẹdẹ mịī mẹ nị.

¹⁶ Màa mẹ̀ ịsa oni mè yi sì ka ma mẹ, ọnọọ ộ sị zụ̀ ka mâ dọ ka ọda ô zoza.

¹⁷ Ọnọọ vị ka ayị vị ẹmịrị eyi amị aa mẹ̀ ịsa ọnọọ. Ịvị ana yà ịnị ayị amị aa mẹẹ nị.

¹⁸ Mâ yẹ ka ẹmị anka ọzarẹyịrẹsụ, ẹ yị nyị ịsị ẹ yà ịnị ẹngụ amị ana zụ mẹ ka ma mẹ̀ ịsa ene zoza ọnyọọnyị. Ịzẹyịza mee sì ka maa mẹ̀ ịsa ana vọrọ, ama mẹyị zụ mẹẹ.

¹⁹ Ịsa ozoza oni mèee sì ka ma mẹ, mẹ mā mẹẹ. Ama ịsa edivi oni mè yi sì ka ma mẹ, dị ahịka ẹnị m maa mẹ̀ nị.

²⁰ Wee re aanị ka màa mẹ̀ ịsa oni mè yi sì ka ma mẹ, ka ayị vị ẹmịrị eyi amị aa mẹẹ; ịvị ana yà ịnị ayị amịị yọ nị.

²¹ Me si oo re ka ịsị aa mẹ̀ ụkọrọ ịnị ẹngụ amị yị: Màa ka maa mẹ̀ ịsa ana vọrọ, dị ahịka ịsa edivi kẹnẹ mị zụ mẹ nị.

²² Ayị amị ô hine tụ́ ịnị ọda Ohomorihi,

²³ ama mee re ka â nyị ịsa ọsa ana aa mẹ̀ ụkọrọ ịnị ẹngụ amị. Ịsa ọnọọ vị ana và eyi ịrazị kà ọda ana ayị amị hine tụ́. Ịsa ọnọnị ọ sị mị vara ọrịhị ọda anaā sịị ọzaa mẹ ịvị ana yà ịnị ẹngụ amị.

²⁴ Mâ da vị ọnụyọrị kẹnẹ! Ẹnẹ vaa dọ mịị hụụnị ụvọ ẹngụ amị ọnọnị, ana aa wụ̀ mị aanị?

²⁵ Ama mâ kụ́ Ohomorihi avọ ka ini oze Ijeesu Ikirisiti Ananyị yị ọ vaa dọ mị. Ịsị maa kà yị: Ẹmị ụvọta aa sị ayị amị hẹkẹ ọda Ohomorihi, ama ẹngụ amị vị ana aa hẹkẹ ọda anaā sịị ọzaa mẹ ịvị.