Aniroomi 4 - IWE ỌNỊNỊ

Abụrahamị ộ sị zụ̀ Ohomorihi mẹmẹẹ̄ jị ịhị yị aza

¹ Sị ị nyẹngụ ka booro aanị ini oze ịrẹyị Abụrahamị ana vị ohiku ayị? À vẹ ya zama ịsị Abụrahamị re daa re!

² Àa vị agụvị ịsa ana Abụrahamị mẹ̀ Óhomorihi sị jị ịhị yọ nị, ọ yaanị nyẹngụ ee wo oto. Ama ẹ yị va nyị oto ana Abụrahamị zụ wo ini eyi Ohomorihi.

³ Si Iwe Ohomorihi kà? Ọ kà, Abụrahamị ọ́ sị ayị tụra Ohomorihi, agụvị avọọ dị Ohomorihi za a ịrịka tụ́ ịnị ọnịrẹyịzẹyịza nị.

⁴ Ọza ọ̀ọ mẹ̀ ụkọrọ dị ọ dọ utosi ụkọrọ anị. Ụta ene e sí ọọ, ẹ yị vị ẹyịza a sị mẹ̀ ẹ; ụta ana a rị ọọ e sí ọọ nị.

⁵ Ama ọza ẹnẹ ẹ̀ yị sị ayị tụra ụkọrọ ụvọ anị, dị ọ sị ayị tụra Ohomorihi anaā jị ịhị yị aza ẹnẹ ẹ̀ yị vị ọnịrẹyịzẹyịza nị, Ohomorihi vaa za a ịrịkaa tụ ịnị ọnịrẹyịzẹyịza, agụvị ka ộ sị ayị tụra a.

⁶ Ẹngụ ịrẹyị ọnị Idevidi vịdị aa kà ọ vị ọnọọ nị, ọ maa kà ịrẹyị ẹngụ ịrajẹ aza ẹnẹ ẹ̀ yị nyị ịsị ẹ mẹ̀ di Ohomorihi za wa ịrịka tụ́ ịnị ọnịrẹyịzẹyịza.

⁷ Ọ kà, Aza oni Ohomorihi raà vagu ịnị ịsa odivi ẹnẹ ẹ mẹ, dị ọ raà sị ịsa kú ịvị ẹnịnị, vaa daa jẹ.

⁸ Aza oni Ohomorihi ọ̀ yị za ịrịka tụ́ ịnị ọnịvị vaa daa jẹ.

⁹ Ẹngụ ịrajẹ ọnọọ, Aniju nịnị kẹnẹ ẹ́ẹ́ zụ nyị ọọ nị, à vị aza ẹnẹ ẹ̀ yị vị Aniju ẹnị ẹ rẹ zụ nyị ọọ bẹẹ? Yâ vịdị sị ọ kà ka Abụrahamị ộ sị ayị tụra Ohomorihi, agụvị avọọ di Ohomorihi za a ịrịka tụ́ ịnị ọnịrẹyịzẹyịza nị.

¹⁰ Ye re ụmẹ oni Ohomorihi vavọọ sị za Abụrahamị ịrịka tụ́ ịnị ọnịrẹyịzẹyịza? Dị ọ va jị ụvẹvẹnẹ wáá yọ, à vị ọ mẹ̀ sị ụvẹvẹnẹ jị kwooze?

¹¹ Ụvẹvẹnẹ vị apọtẹrẹwa ka Abụrahamị ộ vịdị raà sị ayị tụra Ohomorihi, di Ohomorihi za a ịrịka tụ́ ịnị ọnịrẹyịzẹyịza nị. Dị ọ va jị ụvẹvẹnẹ ọ hụrẹ sị ayị tụra Ohomorihi nị. Ini oze ọnọọ, Abụrahamị ọ raà vị ada avaba aza ana sị ayị tụra Ohomorihi ịnị ụmẹ ẹnẹ ẹ̀ yị jị ụvẹvẹnẹ, dị Ohomorihi ọ̀ zụ za ẹngụ aza ẹnẹẹ ịrịka tụ́ ịnị ọnịrẹyịzẹyịza.

¹² Abụrahamị ọ rẹ vị ada Aniju nịnị nị, aza ana ahịka ẹ yị vị ụvẹvẹnẹ kẹnẹ ẹ jị, ama ệ sị ayị tụra Ohomorihi, anka Ábụrahamị ada ayị mẹẹ̄ mẹ, dị ọ hyakụ va jị ụvẹvẹnẹ.

Ẹdọwụ a sịị̄ dọ ịsị Ohomorihi ọ̀ọ kà a ka ọnị vaa mẹ nị

¹³ Ohomorihi ộ zẹẹ Abụrahamị ịzẹzẹ ka Abụrahamị ọnịrị ezi anị ẹ vaa nyị avaba ẹhẹ nị. Ẹ yị vị agụvị ka Abụrahamị ộ saasa ọda Aniju, ama agụvị ka ộ sị ayị tụra Ohomorihi, di Ohomorihi za a ịrịka tụ́ ịnị ọnịrẹyịzẹyịza ọ vavọọ sị kà a yọ nị.

¹⁴ Àa yaanị vị ọza anaā saasa ọda, Óhomorihi wo oto ka ẹ vaa nyị ẹhẹ nị, ịrẹyị aza ana sị ayị tụra Ohomorihi kụkụ yaanị vị kẹnẹ-kẹnẹ. Dị ịsa oni Ohomorihi rẹẹ ịzẹzẹ anị ọnị rẹ vị ịrẹyị kẹnẹ-kẹnẹ.

¹⁵ Ọda vị anaā mẹ ka Ohomorihi ọ̀ jị ịvị yị ọza; agụvị ka ẹ̀ yị nyị ọda, ẹ yị rẹ yaanị nyị ka ọza aa jịnẹ ọda.

¹⁶ Ye si oo re ka oto oni Ohomorihi wo, vị ana jẹẹ tụ́ ịrẹsụ ka ọza ộ sị ayị tụra Ohomorihi. Ọnọọ vaa mẹ ka ịsị Ohomorihi wo oto anị vị ọọhẹ, dị avaba ezi Abụrahamị re re oze dọ ọ nị. Ẹ yị vị ịrẹyị aza ana aa saasa ọda Aniju kẹnẹ, ama yị avaba aza ana aa sị ayị tụra Ohomorihi, anka Abụrahamị ọnị mẹ̀ rẹ mẹ. Yâ yẹ ka avaba ayị Ábụrahamị vị ada anị nị.

¹⁷ Â vịdị maanị chẹrẹ ẹ tụ́ ini Iwe Ohomorihi. (Ohomorihi ka): Ọnị ọ raà sị Abụrahamị vị ada ẹkụra ọrụrụ-ọrụrụ. Ini eyi Ohomorihi ana Abụrahamị sị ayị tụra Abụrahamị ọ vị ada ayị nị. Ohomorihi ọọ̄ ha oku nịnị ị kwẹẹtẹ hụụnị isu nị; ọọ̄ mẹ̀ ọda dị ịsa ẹnẹ ẹ̀ yị vịdị yà ịzọọ, dị ọ kụkụ yà ịzọọ.

¹⁸ Abụrahamị ộ sị ayị tụra Ohomorihi, dị aa yịị tụra eyi ịsa ana ahịka àa ka ọza ọ̀ kà, ẹ yị kụkụ vọrọ ka ọ̀ọ tụra eyi anị nị. Ịzẹyịza, dị ọ vị ada anẹkụra ọrụrụ-ọrụrụ nị, anka a mẹ̀ vịdị kà a tịtẹ ka: Ezi ewu vaa rụrụ ẹtẹẹtẹrẹ.

¹⁹ Abụrahamị aa vaa gụ ịrayị ẹchẹhị, ama vị ọ yị nyayịnẹ sị ayị tụra Ohomorihi nị, ọ yị jị ọọ ịrẹka. O yi ro o ka ọnị ọ yị kụkụ zụ ma ozi, ọnịrị ka Isera ose anị ọ sị kụ̀rà ozi.

²⁰ Ọ yị mẹ ayị ẹẹva, dị ọ̀ọ jị ịrẹyị Ohomorihi ịrẹka. Agụvị ka ộ sị ayị tụra Ohomorihi, ộ jẹẹ geri-geri, dị aa sị ụgaa yị Ohomorihi nị.

²¹ Ộ yẹ ịnị ayị anị ẹtẹẹtẹrẹ ka ịsa oni Ohomorihi wo oto anị, ọ zụ mẹ̀ ẹ.

²² Agụvị ka Abụrahamị ộ vavọọ sị ayị tụra Ohomorihi, dị Ohomorihi za a ịrịka tụ́ ịnị ọnịrẹyịzẹyịza nị.

²³ Ẹ yị vị Abụrahamị ọnịnya kẹnẹ, a chẹrẹ ẹ yị ka Ohomorihi ọ za ịrịka tụ́ ịnị ọnịrẹyịzẹyịza.

²⁴ A rẹ vavọọ chẹrẹ ẹ yị ẹyị ana sị ayị tụra Ohomorihi ka ộ za yị ịrịka tụ́ ịnị ọnịrẹyịzẹyịza. Ohomorihi ọnọọ ọ ha Ijeesu Ananyị yị hụụnị isu nị.

²⁵ Ọnị ọ sị ọọ chire aza ụvọ ka ẹ̀ wụ ọọ agụvị ịvị ẹnẹ ẹyị mẹ nị. Dị Ohomorihi rẹ ha a hụụnị isu ka ọ̀ zụ jị ịhị yị nị.