Aniroomi 13 - IWE ỌNỊNỊ

 vọrọ ka yaa wụ́ ịrẹyị aza ana aa mẹ ịjọva

¹ Ọzọza ọ̀ ká ịrẹsụ hi yị aza ana aa mẹ ịjọva, agụvị ka Ohomorihi ọ sị wa tụ́ ịzọọ nị. Avaba aza ana sị ụvọ za ọda booro aanị, Ohomorihi ọ sị ọda ọnọọ yị wa nị.

² Ọza tụra ọza ana àaa kụ̀ụ hịrẹ aza ana nyị ọda, ịsị Ohomorihi si hi ẹtẹ ọ́za ọnọọ aa kụ̀ụ hịrẹ avọọ nị. Ọza ana àa vavọọ mẹ, vi ee sì ka Ohomorihi ọ̀ jị ịvị yị ọnị avọọ nị.

³ Aza ana àa mẹ̀ ịsa ana vọrọ, ẹ yị nyị ka èe hí angwa aza ana aa mẹ ịjọva. Ama aza ana àa mẹ̀ ịsa odivi kẹnẹ a vọrọ ka èe hí angwa nị. Wè yi sì ka wee hí angwa aza ana nyị ọda, waa mẹ̀ ịsa ana vọrọ, ka ẹ vaa kà ọdaa wụ.

⁴ Ọza ana nyị ọda vị ozi ahụ Ohomorihi, ụkọrọ ozoza aa mẹẹ yị wụ nịnị nị. Wàa mẹ̀ ịsa odivi, wee hí angwa anị, agụvị ka ụkata ọnọọ nyị, ọyị vị kẹnẹ-kẹnẹ, ozi ahụ Ohomorihi ọ vị nị. Ọza ana àa mẹ̀ ịsa odivi, vị aa sị ọyịkụ Ohomorihi zụ̀ ọọ nị.

⁵ Agụvị avọọ, â nyị ka wa ká ịrẹsụ hi yị aza ana nyị ọda nịnị, ayị vị agụvị ka Ohomorihi va kụ́ ayị kẹnẹ, ama agụvị ivehu awụ nịnị.

⁶ Iruvo ọnị ụ raa sị tụ́ ẹkẹhị irehi nịnị, ọ vị ọnọọ nị, agụvị ka aza ana nyị ọda vị ezi ahụ Ohomorihi, ẹ màa mẹ̀ ụkọrọ ẹnịnị ọnọnị.

⁷ Ụta ọnị wàa rị wa, u sí ọọ nịnị! Tụ́ ẹkẹhị irehi irenyi-irenyi ẹnịnị yị wa nịnị; dụ wa rẹ nyị ịrẹsụ ọkahi, dụ wa sị ụbanyị yị ọzọza, anka ọ mẹ̀ vọrọ!

Ebira anaa vọrọ ka yaa mẹẹ hi ẹngụ.

⁸ Asị ụ rị ọza ọnyọọnyị ụta nịnị, àyị vị ka wee sì ịrẹyị ẹngụ nịnị kẹnẹ! Ọza ene èe sì ịrẹyị ọza, ọ raà mẹ̀ ịsa ọnị ọda Ohomorihi kà.

⁹ Â nyị ọda ka asị ụ sẹ̀ ịrẹka, asị ụ wụ̀ ọza, asị u yi oyi, asị ụ dọ ivenu ireche, asị ụ mẹ̀ eyọhụrẹ! Ọda ẹnẹnị ọnịrị ana vọ a vabẹ ịnị ịrẹyị ọnya chọchọchọ nịka: “Sì ịrẹyị ọnọhụva awụ, anka u mè sì ịrẹyị ẹngụ awụ!”

¹⁰ Ọza ene èe sì ịrẹyị ọnọhụva anị, ọyị vaa mẹ̀ ịsa odivii hi ọọ. Ọza òo sì ịrẹyị ọza, ọnọọ vị ka ọ raà saasa avaba ọda.

¹¹ Wa vavọọ mẹ nịnị, agụvị ka wâ yẹ ụmẹ ọnị ị yà nịnị booro aanị! O si tù ka wa ha ara nịnị! Ụmẹ oni Ohomorihi vaa sị dọ yịị há, ọ kụkụ gụrị ẹtẹ hu ụmẹ ọnị ị hụrẹ sị sị ayị tụra Ohomorihi nị.

¹² Ụmẹ ịrahụ ọnọnị aa vaa ta, eyi aa vaa nị. Agụvị avọọ à kụkụ vẹ ya và ụkọrọ ịrahụ hi ẹtẹ, dị ya kụ́ ẹnya ịrẹkụ ọọdụ; ọnọọ vị ka

¹³ à vẹ yaa zị ụsẹ ana vọrọ tụra aza ẹnẹ ẹ̀ yị zị ụsẹ ịrahụ! Asị ị rẹ̀ kụkụ dọ ọda eche ọyịrị pooro kẹnẹ! Asị i rè hú eche, dị ọ̀ọ mẹrị yị; asị ị rẹ̀ mẹ̀ ebira ịdọtị irenyi-renyi, àa vị ebira kẹnẹ-kẹnẹ! Asị ị rẹ̀ zyaazị; asị ị rẹ̀ rẹ kụ̀ ụhị!

¹⁴ Ama sị ebira Ijeesu Ikirisiti Ananyị yị mẹ awuru chire nịnị, asa ahịka ebira odivi ọnị ọchẹngụ awụ nịnịị̄ sì kẹnẹ, ụ waa mẹ nịnị nị!