Anikorasi 3 - IWE ỌNỊNỊ

Wa sị vara ọza ọwọọwa nịnị

¹ Wáa yẹ nịnị ka a sị ẹwụrị Ijeesu ha hụụnị isu nịnị. Agụvị avọọ waa sị eyii tụ́ ịnị ịsa ana yà ẹbẹẹba, ịzị Ikirisiti yaayịtẹ éyi ụvọrị Ohomorihi.

² Waa sị avaba ayị awụ nịnịị tụ́ ịnị ịsa ẹbẹẹba; asị ụ sị ayị awụ nịnị tụ́ ịnị ịsa ẹhẹ ọnọnị.

³ Wê wusu nịnị. A raà sị ụhwẹ awụ nịnị tẹ ị́dị Ikirisiti ana yà ịdị Ohomorihi.

⁴ Ikirisiti ọ vị ẹhẹ ayị nị; ịhị ọ̀ọ sị ẹngụ zụ̀, ẹyịrị ọ ọ vaa sị ẹngụụ zụ̀ ini igirima anị nị.

⁵ Agụvị avọọ asị ụ sị oze yị ịsa edivi ẹhẹ ọnọnị ọnị ụụ̄ vịdịị mẹ nịnị. Asị ụ rẹ̀ rẹ sẹ̀ ịrẹka, asị ụ rẹ̀ mẹ ụ̀nọ̀ nịnị; asị ụ rẹ̀ mẹ̀ ebira ịdọtị nịnị, asị ụ mẹ̀ ịsa edivi irenyi-irenyi ọnị ọchẹngụ awụ nịnịị̄ sì, dị ụ wa rẹ hụụnị eyọhụrẹ nịnị. Eyọhụrẹ vị ene re divi anka ori ọyịhẹkẹ avọọ.

⁶ Agụvị avaba ịsa edivi ẹnẹnị Óhomorihi aa sịị kụ́ ayịị hi aza ẹnẹ ẹ̀yị mā wụ́ ịrẹyị anị nị.

⁷ Ịyẹẹyẹ, avọọ ẹwụ nịnị mẹẹ̄ vịdịị mẹ̀ ebira nị, ẹ́ngụ ariro ẹnẹẹ mẹ vịdị hi ịnị ayị awụ nịnị nị.

⁸ Ama booro aanị, áa nyị ka wa sị ụvọ hụụnị avaba ebira edivi ẹnẹnị, ẹhụụ ọyịkụ ọnịrị ayọngụra beri ayamịkụ. Asị ụ zẹẹ ka ụhụ ọnịrị ịrẹyị ịdọtị ọ̀ kụkụ jịnẹ hụụnị irenu awụ vẹ!

⁹ Asị ụ rè cheeche yị ẹngụ nịnị, agụvị ka wáa yẹ ka wa sị ebira awụ nịnị ịyẹẹyẹ hụrẹ ụvọ,

¹⁰ ebira ọwọọwa ụ kụkụ nyị nịnị nị. Ohomorihi ọ vara wụ nịnị ọza ọwọọwa nị. Dị ee yii tenyi ebira awụ nịnị ọnọọ, agụvị dị ò zụ véné ebira Ikirisiti, dị waa yẹ Ikirisiti nịnịị huna avọọ nị.

¹¹ Agụvị avọọ ẹ yị kụkụ nyị ka ọsọnị ọ vị Anigiriki, dị ẹsẹnị vị Aniju nị. Ẹ yị rẹ nyị ịrẹyị ka aza ẹnyị ẹ́ẹ jị ụvẹvẹnẹ, ọsa ẹ yị jị. Ẹ yị nyị ka aza ẹnyị ẹ yị nyị eyohweyi; ẹ yị nyị ịrẹyị ọrịhị, àa vị ozi. Ịsị ẹ vị ịrẹyị obooro ọ vị Ikirisiti nị. Ọnị ọ vị avaba ịsa nị.

¹² Ohomorihi ọ sị wụ nịnị nyị mẹ aza anị; óo sì ịrẹyị awụ nịnị. Agụvị avọọ waa mẹ̀ ebira ana vọrọ tụra ọza Ohomorihi nịnị! Wee roo yị ẹngụ, dị waa ngụ ayị ẹngụ nịnị. Kà ẹngụ awụ nịnị chí, nyị ebira hẹẹ ọnịrị ayọnẹtẹ nịnị.

¹³ Waa sị ẹngụụ jị ọọ yị ẹngụ nịnị. Wàa mẹ ẹngụ ịrẹyị, waa vaa gu ẹngụ nịnị. Waa vaa gu ẹngụ nịnị anka Íkirisiti mẹ̀ vagu wu nịnị.

¹⁴ Ịsị e hu keekere ọ vị ka wee sì ịrẹyị ẹngụ nịnị. Ịrẹyị ẹngụ oyisì ọ kụ́ avaba ebira ẹnẹẹ gẹ nị. Ọnị ọ zụ mẹ ka ọza ọ̀ gụ nị.

¹⁵ Navọ ẹngwọọrọ oni Ikirisiti sịị̄ yị ọza ọ̀ọ sị oze zụ̀ ayị awụ nịnị, agụvị ka Ohomorihi ọ sị wụ nịnị hị́ ka wa vị ọnya nịnị ịnị ẹngwọọrọ ọnọọ. Waa kụ́ Ohomorihi avọ nịnị ịnị avaba ụmẹ.

¹⁶ Navọ ịrẹyị Ikirisiti ọ̀ yà ịnị ayị awụ nịnị ẹtẹẹtẹrẹ. Waa jị ahẹ ụga irenyi-irenyi nịnị. Waa jị ahẹ kụ́ Ohomorihi avọ nịnị.

¹⁷ Ịnị avaba ịsị ụ wàa mẹ ọnịrị ịnị avaba ịrẹyị ọnị ụ wàa kà, waa mẹẹ anka ọza Ijeesu Ananyị yị. Waa kụ́ Ohomorihi Ada ayị avọ ini oze Ijeesu.

A mẹ̀ vọrọ ka Anikirisiti ẹẹ̄ mẹẹ hi ẹngụ

¹⁸ Ẹwụ nịnị ọnẹẹ ana nyị ọnọrụ, waa ká ịrẹsụ hii yị ọva awụ nịnị anka ọ mẹ̀ vọrọ tụra ọza Ohomorihi.

¹⁹ Ẹwụ nịnị anọrụ ana nyị ọnẹẹ, wee sì ịrẹyị ose ewu nịnị, asị ụ nyị ẹngụrẹyị hi wa nịnị.

²⁰ Ẹwụ nịnị ezi, ịsa tụra ịsa ọnị ọza ana ma wụ nịnị ọ̀ọ kà a wụ nịnị, waa wụ́ nịnị; agụvị ka ịsị e zé Ohomorihi eyi ọ vị ọnọọ nị.

²¹ Ẹwụ nịnị ada ozi, asị ụ mẹ̀ ayị kụ́ ezi ewu nịnị, ka o ve du wa eyi dị ẹ yị nyị ịsị ẹ kụkụ zụ mẹ.

²² Ẹwụ nịnị ezi ahụ, avaba ịsị ọga awụ nịnị ẹ́hẹ ọnọnị ọ̀ọ kà a wụ nịnị, waa wụ́ nịnị Asị a hị́ ka wèe re wa nịnị kẹnẹ, ụ waa wụ́ ịrẹyị ẹnịnị anka omeyọza avọọ nị. Ama waa sị ayị ọnyaa mẹ̀ ụkọrọ anka ọ mẹ̀ vọrọ tụra ọza ana nyị angwahi Ohomorihi.

²³ Avaba ịsị ụ wàa mẹ, waa sị ayị ọnyara mẹẹ anka ọza ana aa mẹ ụkọrọọ yị Ananyị yị! Asị ụ mẹ̀ ẹ anka ọza ana aa mẹ ụkọrọọ yị ọza kẹnẹ.

²⁴ Wáa yẹ ka Ikirisiti Ananyị yị, ụ waa hẹkẹ nịnị nị. Oni o vee sí wu atọ ụkọrọ awụ nịnị nị, ọnị ọ vị ka ẹyịza ọnị ọ sị tẹ wụ nịnị.

²⁵ Aza ana àa mẹ̀ ịsa odivi, rẹ vaa dọ ọgụ ịsa odivi ẹnịnị. Ohomorihi ọ mā nyị ọza remeyi.