Anikorasi 1 - IWE ỌNỊNỊ

Ụkụ

¹ Ẹma vị Ịpọọrụ oni Ohomorihi sì ka ọ̀ vị odeyi Ijeesu Ikirisiti nị. Ẹmịrị Itimoti ọnẹbẹnị ayị ini oze Ijeesu ọ chẹrẹ iwe ọnọnị tụ́ hi

² ẹwụ nịnị, aza Ohomorihi ene hi Ikorosi nị. Ẹwụ nịnị anda ayị ana aa sị ayị ọnyaa saasa Ijeesu. Ohomorihi ọ̀ mẹ ọyịza wụ nịnị, dị ọ̀ rẹ sị ẹngwọọrọ yị wụ nịnị.

Ịpọọrụ ộ mẹ̀ aduwa yị Anikorosi

³ Ẹ yị nyị ka yaa mẹ̀ aduwaa wụ nịnị, dị yẹ̀ yị kụ́ Ohomorihi ana vị Ada Ijeesu Ikirisiti Ananyị yị avọ;

⁴ agụvị ka yâ wụ́ ka waa sị ayị tụra Ijeesu Ikirisiti nịnị, ọnịrị ka wee sì ịrẹyị aza Ohomorihi nịnị.

⁵ Ụ vavọọ aa mẹ nịnị agụvị ka waa tụra eyi ẹyịza oni Ohomorihi sị tẹ wụ nịnị tụ́ ịdị anị. Ụ mẹ̀ vịdị wụ́ enube ọyịza ana vị ịzẹyịza nịnị kẹnẹ, â kà a wụ nịnị ini oze ẹyịza ọnọọ nị.

⁶ Anka énube ọyịza ọnọọ mẹ̀ ngụ ịdị awụ nịnị, avọọ ọ mẹ̀ raa garaa ngụ avaba ẹhẹẹ zị nị. Aa mẹ ka aza ẹ̀ẹ nyị ebira ọyịza, dị ẹ̀ rẹẹ vịraa tụ́ ịnị anị, anka ọ mẹ̀ rẹ yà yị ẹwụ nịnị. Ô nyima ụ mẹ̀ hụrẹ wụ́ enube ọnọọ, dị ẹwụ nịnị rẹ sị ayamva Ohomorihi yẹ obooro.

⁷ Epahwirasi ọ vịdị kà a wụ nịnị nị. Ẹyịrị ọ dudu vị ezi ahụ Ijeesu. Yée sì ịrẹyị anị ẹtẹẹtẹrẹ. Aa sị ayị ọnyaa mẹ ụkọrọọ yị Ikirisiti ịnị akakana awụ nịnị.

⁸ Ọnị ọ kà a yị ka Ụhwẹ Ọnịnị ộ mẹ̀ ka we sì ịrẹyị ọza nịnị nị.

⁹ Agụvị avọọ, ị mẹ̀ hụrẹ wụ́ ọ, ị hụrẹ aa mẹ ịpọdaa yị Ohomorihi agụvị awụ nịnị nị. Yaa dá ịpẹ ka ọ̀ sị zụ̀ wụ nịnị gedebee ịsa oni o sì, dị Ụhwẹ Ọnịnị ọ̀ sị ịrẹyọyẹ yị wụ nịnị ịnị avaba ịsa.

¹⁰ Ịrẹyọyẹ ọnọọ vaa mẹ ka wa zụụ zị ụsẹ ana vọrọ ini eyi Ananyị yị nịnị, di o re zé eyi ẹtẹẹtẹrẹ; dị ẹhẹ awụ nịnị ọ̀ zụ nyị ẹtụtụ ịnị avaba ịsị ụ wàaa mẹ nịnị. Dị ụ raa yẹ Ohomorihii hu avọọ nịnị.

¹¹ Ohomorihi ọ̀ sị ụkata anị, ene huna avaba ụkata yị wụ nịnị, agụvị dị ụ wa nyị ụkata, dị ụ wa rẹ nyị isuuru ini avaba ịsa ana àaa mẹ nịnị;

¹² dị ụ waa kụ́ Ohomorihi Ada ayị avọ nịnị. Ọnị ọ mẹ wụ nịnị vọrọ ka wa zụ nyị tụ́ ịnị ẹyịza ọnị ọ sị tẹ yị aza anị ịdị anị ịzị ẹtohweyi ya nị.

¹³ Ohomorihi ộ dọ yị hụụnị ụkata ịrahụ, ọ raà sị yị va ngụ ịzị Ozi anị oni o sì ịrẹyị anị yà aa mẹ ịjọva.

¹⁴ Ozi anị ọnọọ ọ hị́ yị varẹma, dị ọ rẹ vagu yị ịnị ịvị ayị nị.

Ikirisiti ọ vị ọọnyị nị

¹⁵ Ikirisiti ọ vị uhwoto Ohomorihi oni yè yi re nị. Ọnị ọ vị ọọnyị nị, ọnị ọ vị ọzọkụ yị avaba ịsa oni Ohomorihi mẹ nị

¹⁶ Ini oze anị Óhomorihi zị mẹ avaba ịsa ene hi ẹhẹ ọnịrị ẹbẹẹba nị, ọnị ọ vị ka ịsị yee re ọnịrị ịsị yè yi zụ re, ẹhụụ anggẹẹrị nịnị ana nyị ụkata ọnịrị ọda irenyi-irenyi. Ini oze anị Óhomorihi zị mẹ avaba ịsa nị. Ọnị ọ rẹ mẹ wa yị nị.

¹⁷ O si kù ọnị ọ hụrẹ yà ịzọọ, dị a va yẹ ka aa mẹ avaba ịsa. Ọnị ọ za avaba ịsa jẹẹ nị

¹⁸ Ijeesu ọ vị ohirẹsụ anịragụ Ohomorihi anka ị́rẹsụ ọza maà sị oze zụ̀ ẹngụ ana vọ. Anịragụ Ohomorihi vị ana jẹẹ yị ẹngụ Ikirisiti. Ọnị ọ vị ọọnyị nị. Ọnị ọ vị ọnịpaapa ana ha kwẹẹtẹ hụụnị isu agụvị dị ọ̀ nyị ẹbẹẹba avaba ịsa nị.

¹⁹ Agụvị ka Ohomorihi ọ sị ọ mẹ tịtẹ ka Ozi anị ọ̀ gụ ịnị avaba ịsa, anka ọnị mẹ̀ rẹ gụ

²⁰ Ini oze Ozi anị ọnọọ, Óhomorihi raà mẹ ka ọnịrị avaba ịsa è zé nị. Ini oze anya oni Ozi anị ọnọọ che sẹ ẹtẹ ịrẹsụ apavahị o mè sú, Ohomorihi ô na oze ẹngwọọrọ yị avaba aza ẹhẹ ọnọnị ọnịrị ẹbẹẹba.

²¹ Ịyẹẹyẹ ọnịvị Ohomorihi ụ vịdị vị nịnị, di u noze rịrị ọ nịnị agụvị ariro odivi ọnịrị ebira odivi ọnị ụ waa mẹ nịnị nị.

²² Ama ọyaanị, ini oze isu oni Ozi anị sú, Ohomorihi ọ sị wụ nịnị vara ọta anị. Ô sú, agụvị ọ̀ zụ sị wụ nịnị nọ ịdị Ohomorihi, dị ụ wa vị ọnịnị nịnị, dị asị ụ nyị ohuvọ, dị asị ụ rẹ nyị ịvị nịnị vụrụ-vụrụ.

²³ Áa nyị ka wa yịị sị ayịị tụra Ijeesu nịnị, dị ụ wa jẹẹ geri-geri nịnị, dị asị ụ zẹẹ ka à hụrẹ wụ nịnị hụụnị ọyịtureyi ọnị ụ nyị nịnị, ụ mẹ̀ wụ́ enube ọyịza nịnị. Â kà enube ọyịza ọnọọ yị avaba anẹhẹ. Ụkọrọ enube ọyịza ọnọọ ẹmị Ịpọọrụ kụkụ aa mẹ nị.

Ụkọrọ oni Ohomorihi sị yà Ịpọọrụ

²⁴ Maa jẹ booro aanị, agụvị ka maa rị ụya agụvị awụ nịnị. Maa rị ụya ana vọ ọnị Ikirisiti ka ma rị yị ịragụ Ohomorihi, ana jẹẹ yị ẹngụ Ikirisiti.

²⁵ Ohomorihi ộ sị mị nyị ka maa mẹ̀ ụkọrọọ yị ịragụ anị. Agụvị awụ nịnị Óhomorihi sị sị ụkọrọ ọnọọ yị mị nị. Ụkọrọ oni o si chire mi ụvọ ọ vị ka maa kà enube ọyịza, dị asị mị da a tẹ vụrụ-vụrụ,

²⁶ beri ịrẹyị oni iruvo anị nyịnẹ. Ịrẹyị ọnọọ vị ana vị dị tẹ̀; aza ẹ yị vịdị yẹẹ hụrị ụmọrụmọ. Ama ọyaanị Ohomorihi ọ raà sị zụ̀ aza anị.

²⁷ Ô zé Ohomorihi eyi ka ọ̀ sị zụ̀ aza anị ị́rẹyị ọnọọ mẹmẹ nyị ụbanyị, dị ọ rẹ nyị ọgụ yị avaba anẹhẹ. Ịrẹyị ọnọọ oni iruvo anị nyịnẹ yị Ikirisiti yà ịnị ayị awụ nịnị, agụvị avọọ waa tụra eyi ka ụ vaa nyị tụ́ ini igirima anị nịnị.

²⁸ Agụvị avọọ ị yaa kà ịrẹyị Ikirisitii yị avaba aza nị. Yaa kà wa ọnọ, ị raa sị ịrẹyọyẹẹ zụ̀ wa ịsa, agụvị dị ya mẹ ka aza ẹnẹ ẹnịrị Ikirisiti sị vị ọnya ẹ̀ zụ gụ.

²⁹ Agụvị avọọ m maa sị avaba ụkata oni Ohomorihi sị mịị mẹ̀ ụkọrọ ọnọnị nị. Maa vụrị ka ma zụ mẹ̀ ụkọrọ ọnọọ ta.