Anihwiripi 4 - IWE ỌNỊNỊ

Iwọjị ọnị Ịpọọrụ sị yị Anihwiripi nịnị

¹ Ẹwụ nịnị ẹyịnyara amị, máa da sì ịrẹyị awụ nịnị kẹnẹ. Eyi awụ nịnị aa tụra mị. Ụụ̄ daa mẹ ka ịnẹ amị òo hine nịnị; ẹwụ nịnị ọ vị ọgụ ụkọrọ amị nị. Ẹwụ nịnị ẹyịnyara amị, ẹwụrị Ananyị yị ọ sị vị ọnya, agụvị avọọ jẹẹ geri-geri nịnị.

² Aarịhịnị, ẹwụ Iyodiya ọnịrị Isintike, re ka waa nyị ariro ọnya nịnị, anka ọ mẹ̀ vọrọ tụra aza ana aa saasa Ananyị yị.

³ Ẹwụ bẹẹ ẹnẹ ẹmịrị aa mẹ̀ ụkọrọ, re ka wáa gụ anẹẹ ẹnẹẹ ụvọ, ene pe mi mẹ̀ ụkọrọ, ị mẹ̀ dudu aa kà enube ọyịzaa zị beri Ịkịrẹmẹntị ọnịrị aza ana vọ ene pe mi mẹ̀ ụkọrọ; ịrẹha ẹnịnị yà ini iwe aza ana yara pooro zịna-zịna.

⁴ Waa jẹ nịnị ụmẹ tụra ụmẹ agụvị Ananyị yị. Me re tenyi ọ kà, mị ka waa jẹ nịnị.

⁵ Sị zụ̀ avaba aza nịnị ka waa nyị ebira hẹẹ nịnị. Ananyị yị aa vaa vẹ.

⁶ Asị ụ và ayị awụ nịnị zi agụvị ịrẹyị ịsọnyị-ịsọnyị. Ama ịsị wèee sì nịnị, kà a yị Ohomorihi nịnị. Waa mẹ̀ aduwa ọnịrị ịpọda nịnị, dị ụ wa rẹ kụ́ Ohomorihi avọọ tụ́ ọ nịnị.

⁷ Ịjọnọọ Ohomorihi vaa sị ẹngwọọrọọ wụ nịnị, ana ahịka ẹ yị nyị ọza ana zụ yẹ, ọ mẹmẹ yà. Ẹngwọọrọ ọnọọ vaa mẹ ọyịza ẹ yị ayị awụ ọnịrị ariro awụ nịnị agụvị Ijeesu Ikirisiti.

⁸ Ẹwụ nịnị ẹyịnyara amị, maa za ịrẹyị amị ịrẹsụ. Ẹngụ ịrẹyị ẹnẹnị a vọrọ ka wee ro nịnị nị: ịrẹyị ana àa vị ịzẹyịza, dị ọ vị ịrẹyị obooro nị, ọnịrị ịrẹyị ana àa vọrọ, dị ọ rẹ nị nị, beri ịrẹyị ana aza èe sì ịrẹyị anị, dị a raa kà ọyịza anị nị; ịsị ẹ̀ẹ vị ebira ozoza, dị aza raa ga a nị, wee ro ẹngụ ịrẹyị ọnọọ nịnị.

⁹ Ịrẹyị ọnị mị raà sị zụ̀ wụ nịnị, di mi reè si chire wu nịnị ụvọ, dị ụ wụ́ ọọ hụụnị irenu amị nịnị, di u re re, m màa mẹ̀ ẹ nịnị, ẹwụ nịnị ọ̀ rẹ vavọọ mẹ̀ ẹ. Ohomorihi anaā sịị ẹngwọọrọ yị ọza, vaa yàa beri ewu nịnị.

Ịpọọrụ ộ kụ́ Anihwiripi avọ agụvị ẹkẹhị ẹnẹ ẹ sị yọ

¹⁰ Máa da jẹ kẹnẹ agụvị Ananyị yị. Ọ mẹ̀ rẹ da kù, we re si nyima aa tama ayị amị nịnị. Máa yẹ ka u vịdị ee yii ro ịrẹyị amị nịnị, ama we yi re oze va mẹ ọgụvọ mị nịnị.

¹¹ Ẹ yị vị ka m maanị aa kà a agụvị ka mee re osiye nị. Ọ sị mị yẹ ẹngụ ka ọpa ịsa ọnị maa nyị ọ̀ hụ mị.

¹² Máa yẹ ịsị aā hị́ ka ọza ọ̀ nyị ịsa. Ma rẹ yẹ ịsị aā hị́ ka ọza ọ́ yị nyị ịsa gwẹtẹ. Aha tụra aha ọnịrị ụmẹ tụra ụmẹ, ụngwẹ ọ̀ọ kụ́ mị di mee re osiye nị, ịnẹ ọ̀ọ rẹ va há mị dị nyị ịsa gwẹtẹ nị, ma sị ọ kọ ịsa a vọrọ ka maa mẹ̀.

¹³ Ma zụ mẹ avaba ịsa ini oze ụkata oni Ikirisiti aa sịị yị mị.

¹⁴ Ama wâ mẹẹ ẹtẹẹrẹ nịnị dị ụ waa gụ mị ụvọ nịnị ịnị ụmẹ ọnọnị ọnị mị nyị ẹngụkata aanị.

¹⁵ Ẹwụ nịnị Anihwiripi, wáa yẹ nịnị ka m me hụrẹ nyima aa kà enube ọyịza m mẹ̀ hụrị Imasedoniya, ẹwụ nịnị ịnya kẹnẹ ọ vị anịragụ Ohomorihi ẹnẹ ẹmịrịị aa sị ịsaa yị ẹngụ nị.

¹⁶ M mẹ̀ rẹ yà Ịtẹsaronika, wâ sị ịsị mẹ̀ yị nyị va mị nịnị huna ụpẹ ẹẹva.

¹⁷ Ẹ yị vị ka ẹyịza awụ nịnị m maa dụ nị, ama maa dụ ka wa nyị ọgụ ẹtẹẹtẹrẹ tụ́ ịnị ẹyịza awụ nịnị.

¹⁸ Ẹpahwịrọdịtụsị ộ sị avaba ịsa ọnị ụ sị tụ́ ọ va yị mị. Avaba ịsị mee sì saka-saka, ma sị ọ nyị booro aanị; ọ́ọ hyakụ si huna ọpa oni mee sì. Ẹyịza ẹnẹẹ vị ana sị mẹẹ anka ịsa ana ahụ anị zoza avọọ; vị ọ rẹ yà anka ịsọvọ ene zé Ohomorihi eyi ẹtẹẹtẹrẹ avọọ nị.

¹⁹ Ohomorihi amị vaa sị avaba ịsa oni wee sìi yị wụ nịnị, agụvị ka ọ́ọ nyị ịsa ẹtẹẹtẹrẹ ana nyị ụbanyị tụ́ ịnị ụvọ Ijeesu Ikirisiti.

²⁰ Ụbanyị ọ̀ vị Óhomorihi Ada ayị pooro zịna-zịna. Aamị.

Ụkụ ọdịrẹma

²¹ Kụ́ avaba aza Ohomorihi ẹnẹ ẹnịrị Ijeesu Ikirisiti sị vị ọnya. Anda ayị ẹnẹ ẹmịrịị hi ịzẹnị ka ẹnị kụ́ wụ nịnị.

²² Avaba aza Ohomorihi ka ẹnị kụ́ wụ nịnị. Ẹnị anineehi ohinọyị Aniroomi ka màaa kụ́ wụ nịnị, ẹnị ẹ̀ẹ wụ́.

²³ Ẹyịza ọọhẹ Ananyị yị Ijeesu Ikirisiti ọ̀ yà pe avaba awụ nịnị.