Anihwiripi 1 - IWE ỌNỊNỊ

Ịpọọrụ ộ kụ́ wa

¹ Ẹmị Ịpọọrụ ọnịrị Itimoti ana vị ezi ahụ Ijeesu Ikirisiti aa chẹrẹ iwe ọnọnịị tụ́ụ hi avaba aza Ohomorihi ẹnị ẹnịrị Ijeesu sị vị ọnya ene hi Ihwiripi, re ne beri ọdọvịdị ịragụ Ohomorihi ọnịrị aza ana aa mẹ ọgụvọọ yị wa.

² Ohomorihi Ada ayị ọnịrị Ijeesu Ikirisiti Ananyị yị ẹ̀ mẹ ọyịza wụ nịnị, dị ẹ rẹ sị ẹngwọọrọ yị wụ nịnị.

Ịpọọrụ ộ mẹ̀ aduwa yị anịragụ Ohomorihi

³ Ụmẹ tụra ụmẹ oni mèe si ro ịrẹyị awụ nịnị, mịị̄ kụ́ Ohomorihi amị avọ agụvị awụ nịnị nị.

⁴ Ụmẹ tụra ụmẹ ọnị maa mẹ̀ aduwaa wụ nịnị, ịnẹ amị vị eneē hine

⁵ agụvị ọgụvọ ọnị ụ mẹ mị nịnị ini oze enube ọyịza, m me hụrẹ nyima ve tù ọyaanị.

⁶ Máa yẹ kaakara ka Ohomorihi ana maanị nyima aa mẹ̀ ịsa ozoza ọnọnị nịnị ayị awụ nịnị vaa mẹẹ nee tù ịrẹsụ pooro ne tù ẹkụhị ọnị Ijeesu Ikirisiti vaa sị vaa vẹ.

⁷ Áa vọrọ ka ẹngụ ariro ọnọọ ọ̀ vavọọ yà ịnị ayị amị, agụvị ka ịrẹyị awụ nịnị vị anaā yà ịnị ayị amị pooro. Ụkọrọ oni Ohomorihi nyị mi yi sị mị, wé beri emi nyị ụvọ tụ́ ọ nịnị. M Mẹ̀ yà ịnị ẹngwa, ẹmịrị ẹwụ nịnịị yọ nị; m mẹ̀ vaa kà ịrẹyị Ohomorihi dị maa sịị zụ̀ aza ka ịzẹyịza ọ vị nị, ẹmịrị ẹwụ nịnị rẹẹ yọ nị.

⁸ Ohomorihi ọ́ọ yẹ ka Ijeesu Ikirisiti ụvọta ọ mẹ ka eyi awụ nịnị ọ̀ọ tụra mị ẹtẹẹtẹrẹ nị.

⁹ Aduwa ọnị maa mẹẹ wụ nịnị yị: Ohomorihi ọ̀ navọ wee sì ịrẹyị ẹngụụ hu avọọ nịnị pooro. Dị ụ wa rẹẹ nyị ịrẹyọyẹẹ hu avọọ nịnị, dị ụ wa zụ yẹ ịsa ozoza ọnịrị ene è yi zoza nịnị.

¹⁰ Ịjọnọọ ụ va zụụ sị ụvọọ tụ́ ịnị ịsa ene zoza ẹtẹẹtẹrẹ nịnị. Wàa vavọọ aa mẹ nịnị, ịhị Ijeesu Ikirisiti ọ̀ọ vavẹ, ụ va zụụ yà nịnị anka ọza ana ayị anị nị, dị ọ̀ yị rị ịvị,

¹¹ dị ụ wa rẹ zụụ mẹ̀ ebira ana vọrọ tụra ọza oni Ohomorihi raà jị ịhị yị. Ijeesu Ikirisiti ọọ̄ mẹ̀ ka ọza ọ̀ vavọọ zụ mẹ̀ ebira nị. Ọnọọ vaa mẹ ka aza ẹ̀ẹ sị ụga ọnịrị ụbanyịị yị Ohomorihi.

Ikirisiti o hu keekere nị

¹² Ẹwụ nịnị ẹyịnyara amị, mee sì ka wa yẹ nịnị ka ịsa ene tù mi aanị vị ana aa mẹ ka enube ọyịza ọ̀ hyakụụ kà a tụ́ ọvịdị.

¹³ Booro aanị avaba aza ene hi ịdị ohinọyị ọnịrị aza ana vọ ẹ sị yẹ ka agụvị ịrẹyị Ikirisiti mị yà ịnị ẹngwa nị ịzẹnị nị.

¹⁴ Ịnị ẹngwa ọnị mị yà aanị, ọ raà mẹ ka anda ayị ọrụrụ-ọrụrụ e che ayị za Ananyị yị hu avọọ, dị ẹ̀ kụkụ nyị ọtụtụrụma hu avọọ, dị ẹyaa kà ịrẹyị Ohomorihi, di è yi hí angwa nị.

¹⁵ Ama aza ẹnyị vị ana aa kà enube ọyịza Ikirisiti agụvị ka ẹyaa kụ̀ ụhị, dị ẹ rẹ vị ọnịrẹyị nị. Ama aza ẹnyị vị ana aa sị ayị ọnyaa kà a.

¹⁶ Aza ana aa sị ụhịị kà ọyịza Ikirisiti, dị ẹ̀ yị nyị ayị ọnya, vị ene roo ka vị ẹnị aa dàa tụ́ ịnị ụya ọnị maa rị ịnị ẹngwa aanị nị.

¹⁷ Ama aza ẹnyị ene ee sì ịrẹyị Ikirisiti, agụvị avọọ dị ẹyaa kà enube ọyịza anị nị. Ẹ́ẹ yẹ ka Ohomorihi ọ̀ mẹ ka ma yà ịzẹnị nị, dị ma nyẹngụ sị zụ̀ aza ka ịrẹyị enube ọyịza vị ịrẹyị ịzẹyịza.

¹⁸ Sị mị vaa kà? Ọza ọ̀ọ kà enube ọyịza agụvị ka aa kụ̀ ụhị, ọ̀ọ va sị ayị ọnya kà a, ayị amị vị ene ee hine. Áa vị Ikirisiti aa yịị kà enube anị nị, ayị amị vị ene vee yii hine.

¹⁹ Máa yẹ ka a vaa hụrẹ mị ụvọ ini oze aduwa ọnị ụ waa mẹ nịnị, ọnịrị ini oze ọgụvọ ọnị Ụhwẹ Ọnịnị Ijeesu Ikirisiti aa mẹẹ mị.

²⁰ Ịsị mee sìi hu keekere di mi re si eyi tụ́, ọ vị ka asị ụhị nyị mị ini oze ọnyọọnyị nị. Ama mee sì ka ma nyị ọtụtụrụma ịnị avaba ụmẹ ọnịrị ọyaanị bẹẹ. Mee sì ka ma nyẹngụ sị avaba ayị amị sị ụbanyị yị Ikirisiti, màa daka sú, màa yára.

²¹ Àa vị ẹmị yọ, màa yára, dị mè yị nyị Ikirisiti nị, ẹ yị nyị ka maa mẹ̀ ẹhẹ. Màa va nyị Ikirisiti, di mi sú nị, ọgụ ọ vị mị nị.

²² Àa vị ka maà yàra, ma nyẹngụ aa yịị mẹ̀ ụkọrọ ozoza; mẹ yị kụkụ yẹ ana a vọrọ ka ma nyị.

²³ Ịrẹyị ẹyịva vị ene ee tura mị ị zị oze eyi ẹnyị eyi ọsa. Ama ịsị mee sì ọ vị ka ma hụụnị ẹhẹ ọnọnị, dị ị ma na yà ịdị Ikirisiti nị; ọnọọ ọ vị ene zoza hu nị.

²⁴ Ama màa yị yà ẹhẹ, ọnị ọ dahi yị ẹwụ nịnị hu nị.

²⁵ Máa yẹ ọnọnị ịnị ayị amị; agụvị avọọ, maa yịị yà ẹhẹ pe wu nịnị, dị ma zụ mẹ ka waa kà a tụ́ ọvịdị ịnị ẹdọwụ awụ nịnị, dị ụ wa rẹ nyị ịrajẹ ịnị anị nịnị.

²⁶ Ịhị mèe ve tù wu nịnị ịzọọ, ọ vaa mẹ ka waa sị ụgaa yị Ijeesu Ikirisiti nịnị ẹtẹẹtẹrẹ agụvị amị.

²⁷ Ịsị ẹ vị ịrẹyị obooro ọ vị ka ebira awụ nịnị ọ̀ yà anka ọ mẹ vọrọ tụra ọza ana dọ enube ọyịza wụ́. Me ve hee wu nịnị oo, mẹ yị vẹ oo, mee sì ka ma wụ́ ka wáa sị ayị ọnya jẹẹ geri-geri nịnị, di u we duduu sị ọnyaa dụ ịrẹyị enube ọyịza ọnị ụ dọ wụ́ nịnị.

²⁸ Asị u hí angwa ọnịvị awụ nịnị vụrụ-vụrụ. Ọnọọ vaa sị zụ̀ wa ka ẹnịnị vee vu ẹtẹ, ama ẹwụ nịnị vaa nyị ehuna, ọnịrị ka Ohomorihi ọ yà ịrẹma awụ nịnị nị.

²⁹ Ohomorihi ộ sị oze wụ nịnị ka wa sị ayị tụra Ikirisiti nịnị. Ẹ yị vị ọnọọ kẹnẹ, ama ọ rẹ mẹ ka we re oze rị ụya nịnị agụvị anị nịnị.

³⁰ Wa raà và ụvọ beri emi nịnị aa vụ̀ ịrẹvụ oni u vịdị re nịnị ka maa vụ̀ nịnị. Wáa wụ́ ọ nịnị ka maa yịị vụ̀ ịrẹvụ ọnọọ.