Anihiburu 9 - IWE ỌNỊNỊ

Ị́zẹzẹ ọwọọwa meme huna oto ịyẹẹyẹ

¹ Ịnị oto ịpaapa, â nyị ọda ini oze ana a vọrọ ka ọza ọ̀ọ hẹkẹ Ohomorihi. A rẹ nyị aha ọnịnị ana aza mẹ.

² Â nyị ajẹngụ ana a vịdị jị. Aā hị́ eyi ẹhẹ anị Aha Ọnịnị. Ịsa ana a kụ́ hi ịzọọ, yị: ozotupa ọnịrị iteevuru beri Ịbụrẹẹdị ana a sị va yị Ohomorihi.

³ Ịnịnẹ anị, â nyị aku ana a sị ịta ọsa ana ratụpọ jị oze anị. Ịzọọ aā hị́ Aha Ọnịnị keekere nị.

⁴ Ịsị a rẹ kụ́ hi ịnị ọnọọ yị: ụta ana a sị igooru mẹ ịzị a yàā rị eturare ịraa yị Ohomorihi, ọnịrị apoti ana aā hị́ apoti oto Ohomorihi ana a sị igooru kú avaba ịrẹma anị. Ini apoti ọnọọ â nyị ụnọkọ ana a sị igooru mẹ, dị a sị ịsọyịrị ana aā hị́ ịmana tụ́ ịnị ụnọkọ ọnọọ nị. Okutẹ Eerọnị ene nyị avị beri ịrẹta ẹẹva oni Ohomorihi chẹrẹ ọda tụ́ ịnị anị, rẹ yà ini apoti ọnọọ.

⁵ Ị́rẹsụ oku apoti ọnọọ â nyị anggẹẹrị ẹẹva aanị ana nyị ụbanyị ana a mẹ, ana aā hị́ Ikerubimi. Ệ gana avaka kú apoti ọnọọ. Ệ jẹẹ yị Ohomorihi ana yaayịtẹ ịzọọ, ịzị ọ yàā vayị aza nị. Yẹ yị nyẹngụ aa kà avaba anị chẹẹ-chẹẹ booro aanị.

⁶ Àa vavọọ sị ịsa ẹnẹẹ tenyi tịtẹ, dị ohirẹsụ irehi Ohomorihi aa nọ ini eyi ẹhẹ ajẹngụ ọnọọ eyinị-eyinị, dị ọ na aa mẹ̀ ụkọrọ Ohomorihi.

⁷ Ohirẹsụ ọbanyị irehi Ohomorihi ọnịnya kẹnẹ ọọ̄ ngụ ini aku ajẹngụ ọnọọ ụpẹ ọnya kẹnẹ ịnị ịrayị nị. Àaa na, dị ọ sị anya za ọnị ọ vaa sị mẹ ịsọvọọ yị ẹngụ anị, dị ọ̀ rẹ mẹ yị aza agụvị ịvị ene e nyeeyi mẹ.

⁸ Ụhwẹ Ọnịnị aa sị ịsa ẹnẹnị sịị zụ̀ yị ka, éyi ẹhẹ ajẹngụ mẹ̀ yị yà ịzọọ, ọza o yi re oze na ngụ Aha Ọnịnị keekere.

⁹ Ịsa ịyẹẹyẹ ẹnẹẹ vị ana jẹẹ yị ịsa ọyaanị ọnọnị. Ọnị ọ vị ka ẹyịza ana aza sị va yị Ohomorihi, ọnịrị uye ẹnẹ ẹyaa wụụ mẹ ịsọvọọ hi ọọ, ẹyị zụ mẹ ka ayị aza ana aa mẹ̀ ịsa ẹnẹẹ, ẹ̀ gụ saka-saka éyi Ohomorihi.

¹⁰ Ịsa ẹnẹnị vị ịrẹyị ịsọyịrị ọnịrị ịsa oyihú ne beri ẹngụ irenyi-irenyi ọyịnyịna. Avaba ẹnẹẹ vị ịsa ịnị ẹhẹ ọnọnị kẹnẹ, ana ahịka ụmẹ chee ẹ jẹẹ yị nị, dị Ohomorihi ọ̀ va vara avaba ịsa ọwọọwa.

¹¹ Ama Ikirisiti ọ zị vẹ booro aanị. Ọnị ọ vị ohirẹsụ ọbanyị irehi Ohomorihi ana aa sị ịsa ozozaa vẹ nị. Ọnị ộ mẹ̀ ụkọrọ anị ịnị ajẹngụ ana banyị hu, di o re zoza hu. Ẹ yị vị aza ẹ mẹ ịzọọ, ọ yị hyakụ yà ịnị ẹhẹ ọnọnị.

¹² Ikirisiti ộ ngụ Aha Ọnịnị keekere Ohomorihi. Ụpẹ ọnya gene-gene ọ ngụ ịzọọ nị. Ẹ yị vị anya ịdẹ ọnịrị ozi imaaru ọnọrụ ọnị za na ngụ ịzọọ. Anya anị ụvọta ọ za na, dị ọ sị hị́ yị varẹma pooro zịna-zịna nị.

¹³ Anya ịdẹ ọnịrị imaaru ọnọrụ beri atịtọ ozi imaaru e vidiī chee sẹ́ ọza ẹnẹ ẹ̀ yị nị ini eyi Ohomorihi, agụvị dị ẹ̀ zụ nị nị.

¹⁴ Anya uye ẹnẹ ẹ̀ẹ zụ mẹ ka aza ẹ̀ nị, ọnọọ ọ́ọ sị zụ̀ ka anya Ikirisiti ọ́ọ nyị ụkata hu avọọ ẹtẹẹtẹrẹ. Ẹngụ anị ụvọta ẹnẹ ẹ̀ yị nyị ịvị ọ sị mẹ ịsọvọọ yị nị ini oze Ụhwẹ Ọnịnị ana yàra pooro zịna-zịna. Agụvị avọọ ộ nyịna ayị ayị nị, ka asị ị kụkụ na mẹ ịvị, anaā sịị ọza nee sú; ama dị ya kụkụụ hẹkẹ Ohomorihi ana yára.

¹⁵ Ịsa ẹnẹnị ẹ́ẹ sị zụ̀ ka Ikirisiti ọ vị ọza ana yà ịnị akakana aza ọnịrị Ohomorihi nị, dị ọ mẹ eto oto ọwọọwa, agụvị aza oni Ohomorihi sị hị́, ẹ̀ zụ vẹ, dị ẹ̀ va dọ ẹyịza oni Ohomorihi sị ọọ kà ka ẹ yị zụ nyị ka ọnị ọyị vaa sịị yị wa. Ẹyịza ọnọọ vị ẹnẹẹ vaa nyị pooro zịna-zịna. Ịsa ẹnẹnị vaa mẹ, agụvị ka áa nyị ọza ịnya ene sú ka ọnị ọ̀ hị́ aza varẹma hụụnị ịsa edivi ẹnẹ ẹ vịdịị mẹ ịnị ụmẹ ẹnẹ ẹ sị yà ịnị ụvọ oto ịyẹẹyẹ.

¹⁶ Ọza ọ̀ọ naa chẹrẹ ẹ tịtẹ a mẹ̀ vọrọ ka à gà ogu anị, oni òo wusu, dị à va gà ogu anị, áa nyị ka à sị zụ̀ gedebee ka ô wusu da.

¹⁷ Ọza ana vavọọ chẹrẹ iwe tịtẹ, ọ̀ọ yị yàra, iwe ọnọọ ọ yị nyị ụkata. Ama ịhị òo wusu, ịjọnọọ íwe ọnọọ nyị ụkata nị.

¹⁸ Agụvị avọọ oto ịyẹẹyẹ oni Ohomorihi zẹẹ aza, ẹ yị nyị ụkata, àyị vị a sị anya tụ́ ịnị ịrẹyị anị.

¹⁹ Ịpaapa, Imosiisi ộ vịdị kà a yị avaba aza ẹnẹẹ avaba ịsa a vọrọ ka ẹ̀ mẹ anka ọda Ohomorihi. Dị ọ va sị anya ozi imaaru ọnịrị ịdẹ beri enyi, dị ọ sị avị ana aā hị́ ihisopu ọnịrị ẹyị atẹmẹ ana a jị ngụ azọnọ ovivi, dị ọ jị ọọ ngụ anya ọnọọ ọnịrị enyi, di o chee sẹ́ iwe ọda ọnịrị aza ẹnẹẹ nị.

²⁰ Dị ọ ka, “Anya ọnọnị Óhomorihi sị sị ụvọ tụ́ ịnị oto oni o wo yị wụ nịnị nị.”

²¹ Dị Imosiisi re che anya ọnọọ sẹ́ ajẹngụ Ohomorihi ọnịrị avaba ẹnya ana a sịị̄ mẹ ahẹkẹ ịnị ajẹngụ ọnọọ nị.

²² Anka ọda Imosiisi, ọ sị vọ chee, a hị́ ka avaba ịsa aā sị anyaa vara ọnịnị nị. Ẹ̀ yị vị e che anya sẹ́ ẹtẹ, ọza ọyị zụ nyịna ịvị kwooze.

Ịsọvọ oni Ikirisiti mẹ ọ kụ́ ịvị aza kwooze nị.

²³ Ẹnya ahẹkẹ ẹnẹẹ ana ahịka vị ẹyaa sịị zụ̀ ịsa obooro ana yà ẹbẹẹba nị; áa nyị ka à vavọọ vara wa ọnịnị. Ịsa obooro ẹnẹẹ ana yà ẹbẹẹba, áa nyị ka à mẹ̀ ịsọvọ ene huna avọọ, dị ọ vara wa ọnịnị.

²⁴ Ikirisiti ọ́ yị na ngụ aha ọnịnị ana aza mẹ, ana ahịka vị ọnị aa sị ịsa obooro zụ̀ kẹnẹ nị. Ịdị Ohomorihi booro ọ ngụ nị, agụvị avọọ ọ na jẹẹ ọvịdị Ohomorihi agụvị ayị booro aanị nị.

²⁵ Avaba ohirẹsụ ọbanyị irehi Ohomorihi vị anaā ngụ Aha Ọnịnị (ini irehi Ohomorihi) ịrayị-ịrayị. Dị a hị́ ka anya uye ọ sị na nị, ayị vị anya ẹngụ anị. Ama ẹ yị nyị ka Ikirisiti ọnị ọ̀ọ sị ẹngụ anịị mẹ̀ ịsọvọ ụmẹ tụra ụmẹ.

²⁶ Àyị vị avọọ, vị ọ yaanị aa rị ụya ụmẹ tụra ụmẹ, ẹ́hẹ mẹ̀ hụrẹ nyima nị. Ama ộ vẹ ịnị ẹhẹ ọnọnị ụpẹ ọnya gene-gene ịnị ụmẹ ẹnẹ ẹhẹ aa vaa ta aanị, ka ọnị ọ̀ sị ẹngụ anị mẹ̀ ịsọvọ, dị ọ̀ kụ́ ịvị aza kwooze.

²⁷ A sị eto anị mẹ ka ọza vị ene vee sú ụpẹ ọnya gene-gene. Òo wusu, dị Ohomorihi mẹ̀ ọkarẹyị yọ.

²⁸ Avọọ Íkirisiti ọnị mẹ̀ rẹ sị ẹngụ anị mẹ̀ ịsọvọ ụpẹ ọnya gene-gene nị, ka ọnị ọ̀ kụ́ ịvị aza ọrụrụ-ọrụrụ kwooze. Ọ rẹ vanaa vaa vẹ ịnị ẹhẹ ọnọnị, ama ayị vị agụvị ịvị. Aza ene ee zí ọọ eyi, aa vaa dọ ọ há nị.