Anihiburu 5 - IWE ỌNỊNỊ

¹ Aā nyị avaba ohirẹsụ ọbanyị irehi Ohomorihi hụụnị akakana aza, ka ọ̀ọ hẹkẹ Ohomorihii yị ẹnị. Dị ọ̀ rẹẹ mẹ ịsọvọọ hi Ohomorihi, dị ọ̀ọ sị ẹyịza ẹnịnị naa yọ agụvị ịvị ẹnẹ ẹnị ẹ̀ẹ mẹ.

² Ọnị ụvọta ọnị ọ rẹ zụ nyeeyi ini oze ọrụrụ-ọrụrụ, agụvị avọọ o zụ roo yị aza ẹnẹ ẹ̀ yị yẹ, ọnịrị aza ene ee nyeeyi.

³ Agụvị ka ọnị ụvọta o re zụ nyeeyi, áa nyị ka ọnị ọ̀ rẹẹ mẹ̀ ịsọvọ agụvị ịvị ẹngụ anị, anka ọ mẹ̀ raa mẹ̀ ịsọvọ agụvị ịvị aza ana vọ.

⁴ Ẹ́ yị nyị ọza anaā sị udi ụbanyịị yị ẹngụ anị, dị ọ sị ẹngụ anị vị ohirẹsụ ọbanyị irehi Ohomorihi. Ọza oni Ohomorihi ọ̀ọ hị́ kẹnẹ, anka ọ mẹ̀ hị́ Eerọnị, ọ zụ nyẹngụ yà udi ọnọọ nị.

⁵ Avọọ gẹdẹ-gẹdẹ ọ mẹ̀ rẹ vị yị Ikirisiti nị. Ọ́ yị sị ụbanyị yị ẹngụ anị ka ọnị ọ̀ vị ohirẹsụ ọbanyị irehi Ohomorihi. Ama Ohomorihi ọ́ kà a yọ ka: Ẹwa vị Ozi emi nị, ajịnị mị ma wụ nị.

⁶ Ọ́ rẹ kà a áha ọsa ka: Ẹwa vị ohirẹsụ irehi Ohomorihi pooro zịna-zịna anka Imerikizẹdẹkị nị.

⁷ Ịnị ụmẹ oni Ijeesu sị yà ẹhẹ, ộ mẹ̀ aduwa ẹtẹẹtẹrẹ, dị ọ hyakụ aa ká ẹgọ, o mèe nowuu hị́ Ohomorihi ana zụ dọ ọ tụ ka asị ọ sú, Ohomorihi ộ wụ́ aduwa anị agụvị ka ộ sị ayị yị Ohomorihi.

⁸ Ozi Ohomorihi ọ yị vị nị, ama ini oze ụya ọnị ọ rị, ộ kọ ịsị aā hị́ ka ọza ọ̀ wụ́ ịrẹyị chire Ohomorihi irenu.

⁹ Ịjị Ohomorihi sị Ijeesu mẹ ka ọ gụ, dị Ijeesu kụkụ vị oze ana aza ana wụ́ ịrẹyị anị aa zịị há pooro zịna-zịna.

¹⁰ Ohomorihi ộ nyị ọọ ka ọ̀ vị ohirẹsụ ọbanyị irehi Ohomorihi anka Imerikizẹdẹkị.

Áa vọrọ ka wa sị vịra nịnị booro aanị

¹¹ Áa nyị ịsa ọrụrụ-ọrụrụ ọnị ị yaanị kà ini oze anị. Ama yẹ yị zụ kà a wụ nịnị, agụvị ka ịrẹyị ọ mā hụra ngụ wụ nịnị ụtọ.

¹² O si tù ka ẹwụ nịnị ọ̀ kụkụụ zụ̀ aza ịsa. Ama áa nyị ka à rẹ varẹma vaa zụ̀ wụ nịnị ịsa ịpaapa ini oze ịrẹyị Ohomorihi. O si tù ka wa yaanịị rị ịsa obooro nịnị, ama áa nyị ka à yịị sị ịrẹvaa kà wụ nịnị.

¹³ Ọza ene èe yii hú ịrẹva, vị vị ozweyi; ọọ̀ yị yẹ eyi ịrẹyị Ohomorihi.

¹⁴ Ịsa ọyịrị obooro ázọkụụ̄ rị nị. Ẹnịnị ệ kọsẹ ịrẹyọyẹ, agụvị avọọ ẹ sị ọyịza ọnịrị odivi yẹ.