Anihiburu 3 - IWE ỌNỊNỊ

Ijeesu o huna Imosiisi nị

¹ Ẹwụ nịnị anda ayị, Ohomorihi ọ sị wụ nịnị nyị tụ́ irenyi yị ẹngụ anị. Ọ rẹ hị́ wụ nịnị ka wa nyị tụ́ ịdị anị ẹbẹẹba. Agụvị avọọ ro ịrẹyị Ijeesu nịnị ana vị odeyi ọnịrị ohirẹsụ ọbanyị irehi Ohomorihi ayị. Ọnị ị dọ wụ́ nị.

² Ộ nyị ịzẹyịza hi Ohomorihi ana nyị ọ ka ọ̀ va mẹ̀ ụkọrọ yị ọnị, anka Imosiisi ọnị mẹ̀ rẹ nyị ịzẹyịza ịnị ụkọrọ ọnị ọ mẹ ịnị akakana avaba aza Ohomorihi.

³ Ọza ana da irehi ọ nyị ụbanyị huni irehi ọnị ọ dà nị. Avọọ Íjeesu mẹ̀ nyị ụbanyị huni Imosiisi ẹtẹẹtẹrẹ nị.

⁴ Yáa yẹ ka avaba irehi saka-saka ọza ọ dàa nị. Ama Ohomorihi ọ mẹ avaba ịsa nị.

⁵ Imosiisi ộ nyị ịzẹyịza ịnị ụkọrọ ọnị ọ mẹ ịnị akakana avaba aza Ohomorihi. Ama ozi ahụ kẹnẹ ọ vị nị. Ộ sị zụ̀ ịsị Ohomorihi vaa kà ị́rẹma ụhwọọ.

⁶ Ama Ikirisiti ọnị vị ozi. Ộ nyị ịzẹyịza tụ́ ini eehi Ada anị. Ẹya vị aza anị ọnọọ nị, yaa nyị ọtụtụrụma, dị ị sị ịrajẹ sị eyi tụ́ ịnị ịsa ọnị yee zi eyi pooro nee tù ẹtẹ nị.

Asị ọza na mẹ akamawụ

⁷ Ụhwẹ Ọnịnị ọ́ọ kà a ka: Ajịnị, wàa wụ́ ọngwẹ Ohomorihi nịnị,

⁸ asị ụ na mẹ ayọkatẹngụ nịnị anka óhiku awụ nịnị mẹ̀ mẹ ịnị ụmẹ ẹnẹ ẹ sị mẹ akamawụ hi Ohomorihi ịnị ụnọmị. Ẹnịnị ẹ rẹ zama a re.

⁹ Ohomorihi ọ̀ kà a ka: Ohiku awụ nịnị ệ zama ọnị re ẹtẹẹtẹrẹ ịnị ụnọmị ịyẹẹyẹ, ẹnịnị ê re ịsị ọnị mẹ mẹ ịrayị ẹbẹẹva.

¹⁰ Agụvị avọọ ayị aza ẹnẹẹ ệ kụ́ ọnị, dị ọnị kà a ka ẹnịnị vị anaā sịị ayị ẹnịnịị nyeeyi pooro, ệ mā zẹẹ ka ẹnị ẹ̀ saasa ọda anị.

¹¹ Dị ayị kụ́ ọnị, dị ọnị hị́ eku ka ẹ yị vaa ngụ ịdị anịị tụ́ ụhwọ́ paa nị.

¹² Agụvị avọọ, anda ayị nịnị, sị eyi pe ẹngụ awụ nịnị oo. Asị a na nyị ọza ịnya ịnị awụ nịnị ana na nyị ayị odivi ẹnẹ ẹ̀ yị ma dọ wụ́, dị ọ sị há hụrị oze Ohomorihi ana yára.

¹³ Agụvị asị a nyị ọza ene vene ịvị na mẹ ka ayị anị ọ̀ katẹngụ, wee hú ẹngụ ụvọ nịnị eyinị-eyinị m màa yịị kà a ajịnị aanị.

¹⁴ Oyitureyi ọnị ị nyị ịpaapa, yàa yị sị ụvọ zaa pooro ne tù ẹtẹ, ị vaa nyịị tụ́ ịnị ịsa Ikirisiti.

¹⁵ Â maanị kà a tụ́ ini Iwe Ohomorihi ka: Ajịnị, wàa wụ́ ọngwẹ Ohomorihi nịnị, asị ụ na mẹ ayọkatẹngụ nịnị, anka ohiku awụ nịnị mẹ̀ mẹ ịnị ụmẹ ẹnẹ ẹ sị mẹ akamawụ hi Ohomorihi.

¹⁶ Ẹnẹ vavọọ wụ́ ọngwẹ Ohomorihi dị ẹ mẹ akamawụ? Aanị ka ẹ yị vị aza oni Imosiisi kụ́ jịnẹ hụrị Ijipiti?

¹⁷ Ẹnẹ vavọọ mẹ ayị kụ́ Ohomorihi pooro mẹ ịrayị ẹbẹẹva? Ẹnịnị ẹ vị avaba aza ana mẹ ịvị, di e sú hi ịnị ụnọmị nị.

¹⁸ Ene Ohomorihi rẹ hị́ eku ka ẹ yị vaa ngụ ịdị anị vaa tụ́? Aza ẹnẹ ẹ̀ yị rẹ sị ayị tụraa yọ nị.

¹⁹ Agụvị avọọ, yée re ka ẹnịnị ẹ yị zụ ngụ, agụvị ka ẹnịnị ẹ yị sị ayị tụra Ohomorihi.