Anihiburu 11 - IWE ỌNỊNỊ

Aza ana sị ahụ ẹdọwụ hi ẹtẹ

¹ Sị aa hị́ ka ọza ọ́ọ sị ayị tụra Ohomorihi? Ọza ọ̀ọ sị ayị tụra Ohomorihi, ọnị ọ vị ka ọ́ọ yẹ ịnị ayị anị, ọyị jị ọọ ịrẹka ka ịsa ọnị ọnị aa tụra eyi anị aanị, oni vee ree dọ. Dị ọ rẹ yẹ ịnị ayị anị ẹtẹẹtẹrẹ ka ịsa oni oni ò yi re aanị yà ịzọọ ịzẹyịza nị.

² Anụmẹ ịyẹẹyẹ ẹ́ẹ vavọọ sị ayị tụra Ohomorihi, dị Ohomorihi kà ọda yị wa nị.

³ Agụvị ka Yáa sị ayị tụra Ohomorihi, ọnị ọ mẹ ka ya zụ yẹ ka ịrẹyị Ohomorihi ọ sị mẹ ẹhẹ nị; ọnị ọ vị ka ịsa ene hi ịnị ẹhẹ ọnị yaa sị eyi ayịị re aanị, vị ana hụụnị ịsa ọnị ọza ọ̀ yị zụ sị eyi re vẹ.

Ebẹrị, Enọkị ọnịrị Inowa

⁴ Ini oze ka Ẹba ộ sị ayị tụra Ohomorihi, ọnị ọ mẹ ka Ẹba ọ̀ mẹ̀ ịsọvọ ene huna Íkeeni nị. Ohomorihi ộ zaa ịrịka ka ọnịzẹyịza ọ vị nị, dị ọ dọ ẹyịza anị nị, agụvị ka ộ sị ayị tụra Ohomorihi. Ẹba ô wusu; ama agụvị ka ộ sị ayị tụra Ohomorihi, aa yịị kà ịrẹyịị yị pooro ve tù ajịnị.

⁵ Enọkị ọnị ọ rẹ sị ayị tụra Ohomorihi. Agụvị avọọ Óhomorihi sị sị ọọ nọ ẹbẹẹba ireyi-ireyi, dị ò yi sú nị. Ọza o yi kuku re e, agụvị ka Ohomorihi ọ raà sị. Dị a va sị ọọ nọ ẹbẹẹba, â vịdị dọ ivenu tụ́ ọọ ka ebira anị ô zé Ohomorihi eyi.

⁶ Ọza ẹnẹ ẹ̀ yị sị ayị tụra Ohomorihi, ọ yị nyẹngụ zé Ohomorihi eyi vụrụ-vụrụ. Iruvo ọ vị ka ọza ana àa vẹ ịdị Ohomorihi, áa nyị ka ọ̀ vịdị dọ wụ́ da ka Ohomorihi yà ịzọọ, ọnịrị ka ọọ̄ sị ọgụụ yị aza ene èe sì ọọ.

⁷ Inowa ộ sị ayị tụra Ohomorihi; agụvị avọọ ộ sị ụtọ pe Ohomorihi, ọ màa kà a ọnọ agụvị ịrẹyị ana aa vẹ. Inowa ọọ̀yị daka sị eyi re ịsa ẹnẹẹ, ama ộ wụ́ ịrẹyị chire Ohomorihi. Agụvị avọọ dị ọ mẹ ẹpa ọbanyị ọnya ana dọ ọnịrị aneehi anị há nị. Ini oze ọnọọ, ộ jị ịvị yị anẹhẹ. Ohomorihi ộ zaa ịrịka tụ́ ịnị ọnịzẹyịza, agụvị ka ọ́ọ sị ayị tụra Ohomorihi.

Abụrahamị

⁸ Abụrahamị ọnị ọ rẹ sị ayị tụra Ohomorihi, agụvị avọọ ộ wụ́ ịrẹyị chire Ohomorihi. Ịnị ụmẹ ọnya Ohomorihi ộ kà a yọ ka ọ̀ kwẹẹtẹ, dị ọ̀ nọ ịnị ẹtẹ ọnya aanị ọnị ọnị vaa sịị yọ. Ịzẹyịza, Abụrahamị ộ kwẹẹtẹ, dị aa yịị na kẹnẹ nị. Ọ yị hyakụ yẹ ịzị ọ daka aa nọ.

⁹ Ini oze ka Abụrahamị ộ sị ayị tụra Ohomorihi, ọ na ra ịnị ẹtẹ oni Ohomorihi ka ẹ yị zụ nyị ka ọnị ọ yị vaa sịị yọ. Ộ yà ịzọọ anka ọzọga. Ọnị beri Ayiziiki ọnịrị Ijekọvụ oni Ohomorihi rẹ hị́ eku ọnọọ vị ana ra ịnị ajẹngụ kẹnẹ,

¹⁰ agụvị ka Abụrahamị ee zí eyi ẹkụra ọnọọ oni Ohomorihi sị dà, ana ahịka vị ọ nyayịnẹ jẹẹ geri-geri nị.

¹¹ Isera ọnị ọ rẹ sị ayị tụra Ohomorihi, agụvị avọọ di o zụ zyẹẹ, dị ọ ma ozi ọnya nị. Ịnị ụmẹ ọnọọ, Isera osi huna ọza ana vọrọ ka ọ̀ kụkụ zụ ma ozi. Ama Isera ộ sị ayị tụra Ohomorihi ana ka ọnị vaa mẹ̀ ịsa ka ọnịzẹyịza ọ vị nị.

¹² Ịnị ụmẹ ọnọọ, Abụrahamị ộ ta bo, ọ hyakụ e vee sú. Ama ọnị ọyị va ma ezi ana ahịka ẹẹ rụrụ anka ụzọmị, dị ẹ rẹ rụrụ anka ààrẹ ụtọ ókụ̄ ọnị ọza ọ̀yị zụ za ịrịka nị.

¹³ Avaba aza ẹnị ị kà aanị, vị ana sị ayị tụra Ohomorihi pooro di e vee sú. Ẹnịnị ẹ yị dọ ịsa oni Ohomorihi hị́ eku anị; ama ẹ́ jẹẹ ẹnẹẹnẹ re ịsa ẹnẹẹ, dị ẹ sị ịrajẹ zí ọ eyi nị. Ẹnị ụvọta ẹ́ dọ ka ọzọga ẹnị vị tụ́ ịnị ẹhẹ nị.

¹⁴ Aza ana vavọọ kà, ẹ́ẹ sị zụ̀ ka ẹnị ee sì ẹkụra ana vị ẹ́ẹnịnị.

¹⁵ Ẹnịnị e yi ro ịrẹyị ẹkụra ẹnẹ hụrẹ vẹ. Ẹ̀ẹ yaanị vavọọ ro o, ẹ yaanị re oze varẹma.

¹⁶ Ama ẹnịnị ee sì ịzị e huna ẹkụra ẹnịnị ịyẹẹyẹ, ịzọọ ọ vị ẹkụra ihinẹba nị. Agụvị avọọ ụhị ọ yị nyị Ohomorihi, ẹ̀ẹ yaa hị́ ọ Ohomorihi ẹnịnị, agụvị ka ọ sị ẹkụra tenyi tịtẹ yị wa.

¹⁷ Abụrahamị ộ sị ayị tụra Ohomorihi. Ọnị ọ mẹ ka Óhomorihi mẹ̀ zama a re, ọ̀ dọ ka ọnị ọ̀ sị Ayiziiki, dị ọnị ọ̀ sị mẹ̀ ịsọvọ hi Ohomorihi nị. Abụrahamị Óhomorihi hị́ eku nị, ama ô tenyi ẹngụ ka ọnị ọ̀ sị ozi anị ikonya mẹ̀ ịsọvọ hi Ohomorihi.

¹⁸ Ini oze Ayiziiki ọnọọ a kà a ka Abụrahamị va zịị nyị ezi nị.

¹⁹ Abụrahamị ộ sị ayị sị ọ ka Ohomorihi ọ zụ ha Ayiziiki hụụnị isu. Àa kà a à kà a Ayiziiki vị ana sị mẹẹ anka ọza ana ha hụụnị isu avọọ ve tù Abụrahamị.

²⁰ Ayiziiki ộ sị ayị tụra Ohomorihi. Ọnị ọ rẹ mẹ ka ọ̀ mẹ̀ aduwa yị Ijekọvụ ọnịrị Iisọ, dị ọ kà a yị wa ịsị e vee tù wa ịrẹma ụhwọọ nị.

²¹ Ijekọvụ ọnị ọ rẹ sị ayị tụra Ohomorihi. Ọnị ọ mẹ ka óni mèe vee sú, ọ̀ mẹ̀ aduwa yị ezi Ijosẹẹhụ ọnya-ọnya nị. Ụmẹ ọnọọ ô che ayị za okutẹ anị, dị ọ sị ụbanyị yị Ohomorihi nị.

²² Ijosẹẹhụ ọnị ọ rẹ sị ayị tụra Ohomorihi. Ọnị ọ mẹ ka óni mèe ree vee sú, ọ̀ kà ịrẹyị ini oze ka Anisirẹrị nịnị vaa hụrẹ Ijipiti nị. Dị ọ kà a yị wa ịsị a vọrọ ka ẹ̀ mẹ ẹchụkụ anị nị.

Imosiisi

²³ Aza ana ma Imosiisi ệ sị ayị tụra Ohomorihi. Ọnị ọ mẹ ka ẹ mẹ̀ sị Imosiisi ma, ẹ̀ sị ọ na tẹ̀ mẹ ụhwẹ ẹẹta nị, agụvị ka ê ree ka ozi ọnọọ ô zoza. Ẹnịnị e yi hí angwa ọda oni ohinọyị mẹ.

²⁴ Imosiisi ọnị ọ rẹ sị ayị tụra Ohomorihi. Ọnị ọ mẹ ka ọ mẹ̀ sị vịra, asị ọ zẹẹ ka àa hị́ ọnị ka ozi ohinọyị Anijipiti ọnẹẹ ọ ma ọnị nị.

²⁵ Ọ vana dọ ka ọnịrị aza Ohomorihi è duduu rị ụya, àa sị ka ọnị ọ va naa rị ẹhẹ chee, dị ọ̀ mẹ ịvị.

²⁶ Ô ro ka ọza òo sị eyi wụ̀ ọza agụvị Ikirisiti, ọ́ọ nyị ụbanyị huna avaba ụbanyị ene hi Ijipiti, agụvị ka Imosiisi ọ́ọ sị eyi tụ́ ịnị ọgụ ana aa vẹ ị́rẹma.

²⁷ Ịnị ka Imosiisi ọ sị sị ayị tụra Ohomorihi, ọ mẹ ka ọ̀ hụrẹ Ijipiti. Ọ yị hyakụ hí angwa ka ohinọyị ọnọọ aa kụ́ ayị. Ộ jẹẹ pe Ohomorihi geri-geri, agụvị ka vị ọ sị mẹẹ ka vi ee re Ohomorihi ọnị ọza ò yi zụ re avọọ nị.

²⁸ Ịnị ka ọ sị sị ayị tụra Ohomorihi, ọ mẹ ka ọ̀ sị Eche Ọyịparahu hi ẹtẹ nị. Di o che anya sẹ́ ẹbanoze nị, ka à yị vị avọọ, anggẹẹrị ana wụ ezi ịpaapa aza, va kanyị ẹnị.

Ẹdọwụ Anisirẹrị nịnị ana vọ

²⁹ Anisirẹrị nịnị ẹ́ẹ sị ayị tụra Ohomorihi. Ọnị ọ rẹ mẹ ka ẹ̀ zụ jịnẹ Irehu Ovivi anka èe rere zị ụsẹ ị́rẹsụ eteesu avọọ nị. Anijipiti nịnị mẹ̀ ka ẹnị aa sị eyii sì waa mẹẹ, enyi ộ mụnẹ wa.

³⁰ Anisirẹrị nịnị ẹ rẹ sị ayị tụra Ohomorihi. Ọnị ọ mẹ ka e mè si jesi kara ọvọ ana kara Ijeriko gụ ẹkụhị ịhịmba, ọvọ ọnọọ ò wú và hi ẹtẹ nị.

³¹ Ịrahabị ọsẹrẹka ộ sị ayị tụra Ohomorihi. Ọnị ọ mẹ ka asị a wụ ọọ beri aza ana mẹ akamawụ hi Ohomorihi nị. Aza ene ne yi ẹtẹ ọnọọ re, ọ́ọ dọ wa pe ẹngụ tụ́ ịnị ẹngwọọrọ.

³² Sị màa kụkụ kà? Mẹ yị nyị ụmẹ kà ịrẹyị Igidiyọnị, ọnịrị Ịbarakị beri Ịsamịsịnị ọnịrị Ịjẹhwịta ne beri Idevidi ọnịrị Ịsamụwẹrị ọnịrị ọnịsẹ nịnị.

³³ Ẹnịnị ệ sị ayị tụra Ohomorihi, dị ọ mẹ ka ẹ̀ zụ nyị ehuna ẹkụra irenyi-irenyi nị, ệ mẹ̀ ịsa ana vọrọ, ệ dọ ịsa oni Ohomorihi zẹẹ wa ịzẹzẹ anị. Aza ẹnyị ẹnịnị ệ mẹ ka idu nịnị è kú irenu ẹnịnị kú oku.

³⁴ Aza ẹnyị ẹnịnị ệ mẹ ka ịra ana aa za giri-giri, ò mi. Aza ẹnyị ẹ rẹ há hụrẹ ụvọ aza ana ka ẹnị aa wụ̀ wa. Aza ẹnyị ana vịdị vị ọkụmị, ẹ sị ụkata nyị. Ẹ sị vara ọkụrẹkụ ana nyị ụkata. Ẹnịnị kụkụ aa dụ isoja nịnị anẹkụra ọsa.

³⁵ Anyẹnẹẹ ẹnyị ê re ka aza ẹnịnị ene vịdị sú, ẹ sị ha hụụnị isu và ká wa vẹ. Â sị ụya rị aza ẹnyị ẹtẹẹtẹrẹ, ẹ yị dọ ka à hụrẹ ẹnị ụvọ, agụvị ka eyee zí eyi ka ẹnị vaa haa kwẹẹtẹ dị ẹnị ẹ̀ ngụ ịnị ẹhẹ ene zoza hu aanị.

³⁶ Aza ẹnyị ệ rị ụya ẹtẹẹtẹrẹ, aza màa mẹ wa isiya, di e ree tụ́ wa ịjapa. Â sị ẹba sụ́ aza ẹnyị, dị a rẹ kụ́ wa và hi ịnị ẹngwa nị.

³⁷ Aza ẹnyị vị ana a sị ịrẹta wụ, aza ẹnyị vị ene e che hi ẹẹva, dị a rẹ sị ụ̀hwọ̀ wụ̀ aza ẹnyị nị. Aza ẹnẹẹ vị onosiye, dị ahịka ịtụmpaha atẹmẹ ọnịrị ẹ́ẹvụ éyee chiree zịịzị nị. Â sị ụya rị wa ẹnẹmẹhị.

³⁸ Ẹngụ aza ẹnẹẹ, ẹhẹ ọnọnị o yi rere wa. Ẹnịnị ệ ngụ ịnị ẹtẹ ọpaapara ọnịrị ịnị ataba zịịzị, ệ ngụ ịnị ụtẹha ọnịrị ụsị zị.

³⁹ Avaba aza ẹnẹẹ ệ vavọọ sị ayị tụra Ohomorihi, dị Ohomorihi kà ọda yị wa nị; ama ẹnịnị e yi sị eyi re ịsa oni Ohomorihi zẹẹ wa ịzẹzẹ anị.

⁴⁰ Ohomorihi ọnị ọ raà mẹ eto ịsa ene zoza hu avọọ tịtẹ yị ẹyị, ọnị ọ vị ka ẹyịrị wa oni dudu vaa mẹ ka ya gụ nị.