Anihiburu 10 - IWE ỌNỊNỊ

Ụpọnya kẹnẹ Íkirisiti mẹ̀ ịsọvọ ịvị ayị nị

¹ Ọda Imosiisi vị ụmọmọ ịsa ozoza ana aa vẹ kẹnẹ, ẹnịnị ẹ yị nyẹngụ sị ịsa ọnọọ obooro zụ̀. Aa yịị mẹ̀ ịsọvọ ọnyọọnya ịrayị-ịrayị. Ịsọvọ ẹnẹẹ ẹ yị zụ mẹ ka aza ene ee sì ka ẹnị ẹ̀ kà pe Ohomorihi, ẹ̀ zụ gụ.

² Aza ana vavọọ aa hẹkẹ Ohomorihi ẹ̀ẹ yaanị sị nị saka-saka hụụnị ịvị, ayị ẹnịnị ẹ yị kụkụ yaanị aa jị ịvịị yị wa. A yaanị rẹ raà za avaba ịsọvọ ẹnẹẹ jẹẹ saka-saka.

³ Ama ịsọvọ ẹnẹẹ vị anaā mẹ ka aza ẹnẹẹ ẹ̀ẹ tamayị ịvị ẹnịnị ịrayị-ịrayị.

⁴ Anya imaaru ọnọrụ ọnịrị ịdẹ ẹyị zụ kụ́ ịvị kwooze vụrụ-vụrụ.

⁵ Agụvị avọọ Íkirisiti màa vaa vẹ ẹhẹ, ọ́ọ kà a yị Ohomorihi ka, “Wẹ yị sì ịsọvọ ọnịrị ẹyịza, ama wa raà mẹ ka ma nyị ọchẹngụ dị ma sị mẹ̀ ịsọvọ.”

⁶ Ayị awụ ò hine ịnị avaba uye ịsọvọ ana rị ịra ịrẹsụ ụta. À vị ịsọvọ anaā sịị ịvị kwooze.

⁷ Dị mị ka, “Ohomorihi, ẹmị yọ, máa vẹ ka ma va mẹ isi u wèe sì ka ma mẹ, anka a mẹ̀ chẹrẹ ẹ ini oze amị tụ́ ini Iwe Ohomorihi.”

⁸ Ộ vịdị kà a ka, “We yi sì ka ẹ̀ẹ mẹ ịsọvọọ hi wu, we yi sì ẹyịza ẹnịnị, we yi re sì ka ẹ̀ẹ rị uye ịra saka-saka wụ. We yi re sì ịsọvọ ana azaā mẹ ka ọ̀ kụ́ ịvị ẹnịnị kwooze. Ẹngụ ịsa ẹnẹẹ e yi zé wu eyi.” Aza vị ana aa yịị mẹ ẹngụ avaba ịsa ẹnẹẹ anka ọda, dị ọ vavọọ yị kà.

⁹ Ọ rẹ va kà a ka, “Ohomorihi, ọnị yọ, Ọnị ộ vẹ ka ọnị ọ̀ va mẹ ịsị u wèe sì ka ọnị ọ̀ mẹ.” Ọ raà kụ́ avaba ịsa ịyẹẹyẹ kwooze, dị ọ kụkụ kụ́ ịsa ọwọọwa dọ wa ịrẹsụ nị.

¹⁰ Ijeesu Ikirisiti ộ mẹ̀ ịsa oni Ohomorihi sì ka ọ̀ mẹ. Ọ raà vara yị aza anị ọnịnị ini oze ịsọvọ ọnị ọ sị ẹngụ anị mẹ ụpẹ ọnya gene-gene.

¹¹ Avaba ohirẹsụ irehi Ohomorihi vị anaā jẹẹ, dị aa mẹ̀ ụkọrọ anị eyinị-eyinị, dị aa mẹ̀ ịsọvọ ọnyọọnya ụpọsa-ụpọsa. Ama ịsọvọ ẹnẹẹ ẹ yị zụ sị ịvị aza kwooze vụrụ-vụrụ.

¹² Ama Ikirisiti ọnị vị ana yị mẹ̀ ịsọvọ ụpẹ ọnya kẹnẹ ana kụ́ ịvị aza kwooze pooro zịna-zịna. Dị ọ kụkụ yaayịtẹ éyi ụvọrị Ohomorihi nị.

¹³ Ịzọọ ọ yà, di ee zí ụmẹ oni Ohomorihi vaa sị kụ́ avaba ọnịvị anị tụ́ ịzị aā kụ́ ahụụ hi.

¹⁴ Ịsọvọ ụpẹ ọnya kẹnẹ Ìkirisiti mẹ nị. Dị ọ sị mẹ ka aza ọnị ọnị sị vara aza anị ọnịnị, ẹ̀ kụkụ vị ọyịgụ pooro zịna-zịna nị.

¹⁵ Ụhwẹ Ọnịnị ọ rẹ dọ ivenu tụ́ ịnị ịrẹyị ọnọnị. Ịpaapa ọọ kà a ka Ananyị yị ka:

¹⁶ “Oto ọnị mị vee wo yị wa ịnị ụmẹ ọnọọ yị: Ọnị vaa sị ọda anịị tụ́ ịnị ayị ẹnịnị, dị ọnị rẹ chẹrẹ ẹ tụ́ ịnị ayị ẹnịnị.”

¹⁷ Ọ rẹ kà a ka, “Ọnị ẹ yị kụkụ vaa tamayị ịvị ẹnẹẹ mẹ.”

¹⁸ Ohomorihi ọ̀ọ raà kụ́ ịvị aza kwooze, ẹ yị kụkụ nyị ka aza ẹ̀ yịị mẹ̀ ịsọvọ agụvị ịvị.

À vẹ yaa yịị sị ayịị tụra Ohomorihi!

¹⁹ Ẹwụ nịnị ẹyịnyara amị, ini oze anya oni Ijeesu che sẹ́ ẹtẹ o mè sú, yáa nyị ọtụtụrụma ọyịna ngụ aha ọnịnị keekere ịzị Ohomorihi yà.

²⁰ Ijeesu ọ raà na oze ọwọọwa yị. Oze ọnọọ vị anaā sịị ọza naa ngụ ịnị ọyịyara. Ẹngụ anị ọ sị sị yị na para ịta (ana a sị jị oze Aha Ọnịnị keekere ini irehi Ohomorihi) hu na ngụ ịzọọ nị.

²¹ Yáa nyị ohirẹsụ ọbanyị irehi Ohomorihi ọnya ana sị eyi pe aneehi Ohomorihi.

²² Agụvị avọọ, à vẹ ya sị ayị ọnya kà pe Ohomorihi, dị ya sị avaba ayị ayị tụra a, agụvị ka Ijeesu ọ raà nyịna ịvị ana ayị ayị aa jịị yị kwooze. A rẹ raà sị enyi ana nị nyịna ẹngụ ayị.

²³ À vẹ ya jẹẹ geri-geri, dị ya sị ụvọ za ịsa ọnị ị ka yáa dọ wụ́! Ohomorihi ana zẹẹ yị ịzẹzẹ, a zụ sị ayị tụra a.

²⁴ À vẹ yee ro ịrẹyị ẹngụ, dị yaa mẹ ka ye zuu sì ịrẹyị aza, dị ya rẹẹ mẹ ọyịza!

²⁵ Asị ị navọ ẹngụ ọyịkụgụ tịtẹ, anka aza ẹnyị mẹ̀ẹ̄ mẹ! Ama à vẹ yaa tụ́ ẹngụ ọtụtụrụma, ẹ́kụhị Ananyị yị mẹ̀ hyakụ aa gụrị ẹtẹ aanị!

²⁶ Ya sị ịzẹyịza yẹ; yèe kuku ee yii re ịsa odivi googoro dị ị naa mẹẹ nị, ẹ yị kụkụ nyị ịsọvọ ana aa kụ́ ọọ kwooze.

²⁷ Ọza ana àa vavọọ aa mẹ, ò hí angwa, agụvị ka Ohomorihi vaa mẹ̀ ọkarẹyị yọ. Ịra gogogo vaa rị aza ana vị ọnịvị Ohomorihi ịra.

²⁸ Ọza ana àa jịnẹ ọda Imosiisi, dị onivenu gụ ẹẹta, àa vị ẹẹva, ene ree nị, vị aa wụ ọọ nị, ọza ọ yị sị vayị anị.

²⁹ Ọ̀ọ vavọọ yà, zama a dị a re ẹngụ ụya ene vee tù aza ana àa sị eyi wụ Ozi Ohomorihi, agụvị ka anya oni Ijeesu sị hị́ eku, dị ọ sị vara ọza anị ọnịnị, ee ree ịsa ịyẹyẹ. Ọ rẹ sị eyi wụ Ụhwẹ Ọnịnị anaā mẹ ọyịzaa yị ọza.

³⁰ Yáa yẹ ọza ana kà a ka, “Oni oō sí atọ nị, oni vee sí atọọ varẹma!” Ọ rẹ kà ka, “Ananyị yị vaa mẹ̀ ọkarẹyị aza anị.”

³¹ Ọza ọ̀ọ hyẹdụ ne ngụ ịnị ụvọ Ohomorihi ana yára, ọza ọnọọ ọ sị dà.

³² Tamayị ịsa ana mẹ nịnị ịyẹẹyẹ, u mè re ẹtohweyi Ohomorihi nịnị ịpaapa! Wa daka yị rị ụya nịnị ẹtẹẹtẹrẹ, ama wa sị sị ẹngụ dọ ọ nịnị.

³³ Ịnị ụmẹ ẹnyị aza aa kụ̀ wụ nịnị ụhụ ịnị ịnọyị-ịnọyị, ẹyaa sị ụyaa rị wụ nịnị. Ụmẹ ẹnyị dị ụ raa saasa aza ana vavọọ aa rị ụya nịnị.

³⁴ Wê pe anịnẹngwa rị ụya nịnị. Wáa sị inohine dọ ka aza ẹ̀ dọ wụ ogu awụ nịnị, agụvị ka wáa yẹ nịnị ka wáa nyị ogu ene zoza hu avọọ tụ́ ẹbẹẹba nịnị ene è yi mē du.

³⁵ Agụvị avọọ, asị ụ hụrẹ ọtụtụrụma ọnị ụ nyị nịnị ụvọ, agụvị ka ọ́ọ nyị ọgụ ẹtẹẹtẹrẹ!

³⁶ Áa nyị ka wa nyị isuuru nịnị, agụvị wàa ịsa oni Ohomorihi sì, mẹ nịnị, dụ wa zụ dọ ịsa ọnị ọ zẹẹ wụ nịnị ịzẹzẹ anị.

³⁷ Anka iwe Ohomorihi mẹ kà, Òo kù chee, ọza ana aa vẹ, vaa vẹ. Ọyị vaa sị ụmẹẹ tura ẹtẹ.

³⁸ “Aza anị ana àa vị ọnịzẹyịza vaa yàra, agụvị ka ẹ́ẹ sị ayị tụra ọnị. Ama àa nyị ọza ana kà nọ ịrẹma, ayị anị o yi vee hinee tù ọọ.”

³⁹ Ama ẹyị ẹ yị vị ẹngụ aza anaā kà a nọ ịrẹma, dị è ne vu ẹtẹ. Ama ẹyị aa yịị sị ayịị tụra Ohomorihi, ka asị ụhwẹ ayị vú.