Anigaratiya 5 - IWE ỌNỊNỊ

Asị ụ kụkụ na vị ọrịhị ọda nịnị

¹ Ikirisiti ọ sị yị dọ hụụnị ọrịhị, agụvị avọọ, áa vọrọ ka wa jẹẹ geri-geri nịnị anka ọza ana nyị ẹngụ anị. Asị ụ kụkụ zẹẹ ka ọza ọ va vara wụ nịnị ọrịhị.

² Sị ụtọ pe ẹtẹ, ẹmị Ịpọọrụ aa kà a wụ nịnị nị, wàa zẹẹ ka ọza ọ̀ va jị wụ nịnị ụvẹvẹnẹ, ọnị ọ vị ka wẹ yị nyị tụ́ ịnị ịsa oni Ikirisiti mẹ nịnị.

³ Me re tenyi ọ kà ka ọza ana àa zẹẹ ka ọza ọ̀ jị ọnị ụvẹvẹnẹ, áa nyị ka ọza ọnọọ ọ̀ọ saasa avaba ọda Aniju nịnị.

⁴ Ẹwụ nịnị ene ee sì ka Ohomorihi ọ̀ hị́ wụ nịnị ọnịrẹyịzẹyịza agụvị ka waa saasa ọda, wa sị há hụụ ịdị Ikirisiti nịnị. Wa raà sị ẹngụ awụ nịnị hụụnị ayamva Ohomorihi.

⁵ Àa vị ẹyịị yọ, ẹyị vị ene ee zí eyi ka ịnị ụkata Ụhwẹ Ọnịnị Óhomorihi vaa hị́ yị ọnịrẹyịzẹyịza nị. Agụvị ka yáa sị ayị tụra Ijeesu.

⁶ Ọza ọnịrị Ijeesu ọ̀ọ vị ọnya, ọ̀ọ jị ụvẹvẹnẹ oo, ọ̀yị jị ụvẹvẹnẹ oo, ẹ yị nyị ọ mẹ̀ kà; avaba ẹnịnị vị ọnya. Ama ịsị ẹ vị ịrẹyị ẹtẹẹtẹrẹ ọ vị ka ya sị ayị tụra Ijeesu, di ye re sì ịrẹyị ẹngụ, ana sị zụ̀ ka yáa sị ayị tụraa.

⁷ Ụ vịdị aa zị ụsẹ ẹtẹẹrẹ nịnị, ama ẹnẹ va za wụ nịnị ka asị ụ kụkụ saasa ịrẹyịzẹyịza nịnị?

⁸ Áa nyị aza ene ee vene wu nịnị, ama máa yẹ ka ayị vị Ohomorihi ana hị́ wụ nịnị.

⁹ Wáa yẹ nịnị ka òwù kiiki aanị, ọ zụ ngụ ịsa ọbanyị, di o si oo wù ẹtẹẹtẹrẹ.

¹⁰ Agụvị ka ẹmịrị Ikirisiti ọ sị vị ọnya, máa sị ayị tụra wụ nịnị ka wẹ yị vaa nyị ariro nịnị ana jị áamị nyee. Ọza ana àaa và ayị awụ nịnịị zí, Ohomorihi vaa mẹ̀ ọkarẹyị yọ, ọza tụra ọza ọnị ọọ vị.

¹¹ Àa vị ẹmịị yọ nị, ẹwụ nịnị anda ayị, màa yịị kà a ka aza ana dọ Ijeesu wụ́, ẹ̀ jị ụvẹvẹnẹ, aza ẹnẹẹ ẹyị kụkụ yaanị aa sị ụyaa rị mị. Màa yaanị vavọọ aa kà, isu Ijeesu ị́rẹsụ apavahị ọyị yaanị aa mẹ ayịị kụ́ aza.

¹² Aza ana àaa và wụ nịnịị zí avọọ, à kà ka ẹ̀ na nị ẹngụ ẹnịnị.

¹³ Ẹwụ nịnị anda ayị, Ohomorihi vị ana hị́ wụ ka wa nyị ẹngụ awụ nịnị (hụụnị ụvọ ọda Aniju nịnị). Ụ mẹ̀ sị ẹngụ awụ nịnị nyị aanị, asị ụ kụkụ kà a ka ịsị e zé wu nịnị eyi kẹnẹ, ụ waa mẹ nị. Ama sì ịrẹyị ẹngụ nịnị, dị waa zị ẹngụ ụtụ nịnị!

¹⁴ Avaba ọda vị ana a vabẹ ịnị ịrẹyị ọnya ka, “Sì ịrẹyị ọnọhụva awụ anka ẹngụ awụ.”

¹⁵ Ama wàaa na ẹngụụ ha, dị waa jị ẹngụụ ịrẹrụ nịnị anka irezi avọọ nị, sị eyi pe ẹngụ awụ nịnị ka ụ va wụ ẹngụ nịnị!

Navọ Ụhwẹ Ọnịnị ọ̀ọ zụ̀ wụ nịnị oze!

¹⁶ Agụvị avọọ, navọ Ụhwẹ Ọnịnị ọ̀ọ sị oze zụ̀ wụ nịnị, agụvị asị ahịka ịsị ọchẹngụ awụ nịnị òo sì kẹnẹ, ụ raa mẹ nịnị nị!

¹⁷ Agụvị ka ịsa ọnị ọchẹngụ ọza sì, Ụhwẹ Ọnịnị oyi sì ọọ, ịsa ọnị Ụhwẹ Ọnịnị oni re sì, ọchẹngụ ọza oyi sì ọọ. Ịsa ẹẹva ẹnẹnị vị ana và eyi ịrazị kà ẹngụ; ọnị ọ vị ka ayị vị isu wèe sì nịnị kẹnẹ, ụ zụ mẹ nịnị.

¹⁸ Àa vị Ụhwẹ Ọnịnị aa zụ̀ wụ nịnị oze nị, wẹ yị kụkụ yà ịnị ụvọ ọda nịnị.

¹⁹ Ịsa anaā hụụnị ariro ọza vẹ, ẹyị tẹ, ẹnị yị: ẹnị ẹẹ̄ mẹ ka aza ẹ̀ẹ sẹ̀ ịrẹka dị ẹyaa mẹ ụnọ, dị ẹ rẹ yaa mẹ̀ ebira ịdọtị, dị ẹyaa mẹ̀ ebira kẹnẹ-kẹnẹ;

²⁰ dị ẹyaa hẹkẹ ori, dị ẹ rẹ yaa mẹ ẹbẹ, dị ẹyaa kụ́ ayị ọza, dị ẹyaa zyaazị, dị ẹyaa mẹ eyọhụrẹ, dị ẹyaa kụ́ ayị, dị ẹ rẹ yaa há ọhọha, dị ẹ sị ẹngụ ẹnịnị jị ịrịnya, dị ẹyaa há azaa hi,

²¹ dị ẹyaa kụ̀ ụhị, dị eyee hú eche dị aa mẹrị wa; dị ẹ rẹ yaa rị eche pooro kẹnẹ; dị ẹ rẹ yaa mẹ ẹngụ ịsa ẹnẹẹ ana vọ. Maa kà a wụ nịnị booro aanị, anka m mẹ̀ rẹ vịdị kà a wụ nịnị, ka aza ana àa mẹ ẹngụ ịsa ẹnẹẹ, ẹyị va ngụ ịzị Ohomorihi yà aa mẹ ịjọva.

²² Ama Ụhwẹ Ọnịnị ọọ̄ mẹ̀ ka ọza ọ̀ọ vịra ịnị ịsa ẹnẹnị nị: ịrẹyị ọza oyisì ọnịrị inohine beri ẹngwọọrọ ọnịrị isuuru beri ebira hẹẹ ọyịmẹ̀ ọnịrị ebira ozoza ne beri ịzẹyịza ọyịmẹ̀ ọnịrị

²³ ịrẹsụ ọkahi ne beri ẹngụ ọza ọyịsị ụvọ za. Ẹ yị nyị ọda ana za aza ana aa mẹ ẹsẹnị.

²⁴ Aza ana vị aza Ijeesu ẹ raà sị avaba ebira edivi ẹnẹẹ ẹnẹ ẹ vịdịị mẹ kwooze beri avaba ariro odivi ẹnịnị; ẹ raà kanyị ọọ za ọchị apavahị.

²⁵ Ụhwẹ Ọnịnị ọ sị ọyịyara obooro yị nị. Agụvị avọọ à navọ Ụhwẹ Ọnịnị ọnọọ ọ̀ rẹẹ zụ̀ yị oze ịnị avaba ịsị yàa mẹ.

²⁶ Asị ị rẹ̀ mẹ eyi kẹnẹ-kẹnẹ, asị ị rẹ̀ rẹ mẹ ayị kụ́ ẹngụ, dị asị ị rẹ̀ kụ̀ ụhị!