Anigaratiya 1 - IWE ỌNỊNỊ

Ụkụ

¹ Ẹmị Ịpọọrụ ana vị odeyi Ijeesu Ikirisiti ọ chẹrẹ iwe ọnọnị nị. Ẹ yị vị ọza ọ hị́ mị, ẹ yị rẹ vị aza ẹ nyị mị ka ma vị odeyi. Ama Ijeesu Ikirisiti ọ nyị mị nị, ọnịrị Ohomorihi Ada ayị, ana ha Ijeesu hụụnị isu.

² Avaba ẹyịnyara ayị ẹnẹ ẹmịrịị hi ịzẹnị ka ẹnị kụ́ wụ nịnị anịragụ Ohomorihi ene hi Ịgaratịya.

³ Ohomorihi Ada ayị ọnịrị Ijeesu Ikirisiti Ananyị yị ẹ̀ mẹ ọyịza wụ nịnị, dị ẹ̀ sị ẹngwọọrọ yị wụ nịnị!

⁴ Ijeesu ọ sị ẹngụ anị mẹ̀ ịsọvọ yị ịvị ayị agụvị dị ọ̀ dọ yị tịtẹ hụụnị ịsa edivi ẹhẹ ọnọnị anka Ohomorihi Ada ayị me sì ọ.

⁵ Igirima ọ̀ vị Óohomorihi pooro zịna-zịna! Aamị.

Enube ọyịza vị ikonya chọchọchọ

⁶ Ho! Ịrẹyị awụ nịnị ọ́ọ da hí mi irenu kẹnẹ! Wáa wụsẹ jịnẹ sị và hụrẹ ịrẹma Ohomorihi ana hị́ wụ nịnị ini oze ayamva Ikirisiti, ụ kụkụ aa dụ enube ọsa.

⁷ Ịnị ịzẹyịza, ẹ yị nyị enube ọyịza ọsa vụrụ-vụrụ; ama áa nyị aza ẹnyị ana aa và wụ nịnị zí, eyee sì ka eni è du enube ọyịza Ikirisiti ha.

⁸ Ọ̀ọ daka vị ẹyị, àa vị anggẹẹrị ẹbẹẹba ọ va kà enube ọyịza ọsa, dị ọ sị vị irenyi yị ọnị ị vịdị kà wụ nịnị nị, o du ọza ọnọọ kù huuu!

⁹ Anka m mẹ̀ vịdị kà a, mi ree tenyi ọọ kà: Mị ka, àa nyị ọza ana va kà enube ọyịza ọsa yị wụ nịnị, dị ọ vị irenyi yị ọnị ụ vịdị dọ nịnị nị, o du ọza ọnọọ kù huuu!

¹⁰ U wéé yi ro ka m maa dụ ka ọza ọ̀ọ ga mị nị, à vị Ohomorihi mi sì ka ọ̀ọ ga mị nị? Eyi ọza m maa mẹ̀ nị? Mèe yii sì ka ma mẹ eyi ọza, mẹ yị zụ vị ozi ahụ Ijeesu Ikirisiti.

Ị́pọọrụ mẹmẹ vara odeyi

¹¹ Ẹwụ nịnị ẹyịnyara amị, jẹẹ ma kà a wụ nịnị oo, enube ọyịza ọnị maa kà, ẹ yị vị ọza ọ sị mị.

¹² Mẹ yị dọ ọ hụụnị ụvọ ọza ọnyọọnyị, ẹ yị rẹ vị ọza ọ sị zụ̀ mị. Ijeesu ọnị ụvọta ọ sị zụ̀ mị nị.

¹³ Wáa yẹ ẹngụ ebira ọnị mịị̄ vịdịị mẹ ịjị maa saasa ahẹkẹ Aniju nịnị. Máa sị ụya rị ịragụ Ohomorihi ẹnẹmẹhị; máa sị vụrị ẹtẹẹtẹrẹ ka ma gara a ha.

¹⁴ Ịnị avaba ọpa amị, ẹma sị ụvọ za ahẹkẹ Aniju hu kere-kere nị. Ẹma rẹ sị avaba ayị amị mẹ ido oni ohiku ayị jị hu nị.

¹⁵ Ama Ohomorihi ọ́ọ vayị amị, ọ́ọ nyị mị di a va yẹ ka aa ma mị, dị ọ hị́ mị ka maa hẹkẹ ọnị nị. Ịjị o zé Ohomorihi eyi,

¹⁶ dị ọ sị Ozi anị zụ̀ mị ka ma nyẹngụ kà enube ọyịza anị yị anarịmadọwụ nịnị nị. Ụmẹ ọnọọ ẹ yị nyị ọza ọnyọọnyị oni mi sị pe gẹ eyi.

¹⁷ Mẹ yị rẹ nọ Ijerusarẹmị ka me ne hee aza ana vịdị vị odeyi di o ve tù mi. Ama ẹkụra Arebiya mị vịdị nọ, dị mị varẹma vẹ ẹkụra Ịdamasịkọsị nị.

¹⁸ Ịrayị ẹẹta ọ sị mẹ, dị mị va nọ Ijerusarẹmị ka me ne hee Ipita. Máa yà ịda anị mẹ ẹkụhị ẹwụrẹhị.

¹⁹ Ẹ yị nyị odeyi ọsa oni mi re, àyị vị Ijemiisi kẹnẹ ana vị ọyịnyara Ananyị yị.

²⁰ Avaba ịsa ọnị mị chẹrẹ tụ́ hi wu aanị vị ịzẹyịza. Ohomorihi vị onivenu amị ka me yi cheeche.

²¹ Ịrẹma ọnọọ, máa nọ ẹkụra Isiriya ọnịrị Isirisiya.

²² Ịjọnọọ anịragụ Ohomorihi ene hi ịnị ẹkụra Ijudiya, ẹ yị yẹ mị eyi gẹrị eyi.

²³ Ama ẹ́ẹ wụ́ ịtọpa amị kẹnẹ ka ọza anaā vịdịị sị ụyaa rị ẹnị ọ sị vara. Ọ kụkụ aa kà enube ọyịza ọnị ọ̀ vịdị ee sì ka ọnị ọ̀ kụ́ kwooze.

²⁴ Dị ẹyaa sị ụgaa yị Ohomorihi agụvị amị nị.