Anẹhwẹsọsị 3 - IWE ỌNỊNỊ

Aniju ọnịrị anẹhẹ ana vọ vị ẹbẹẹbẹ ini eyi Ohomorihi

¹ Ẹmị Ịpọọrụ vị anịnẹngwa Ijeesu Ikirisiti agụvị ẹwụ nịnị ẹnẹ ẹ̀ yị vị Aniju.

² Wáa yẹ nịnị ka Ohomorihi óo nyị mị iyi dị ọ sị ụkọrọ ọnọnịị mị ka maa mẹẹ wụ nịnị nị.

³ Ịsa oni Ohomorihi mẹ eto anị tịtẹ ene eyi ọza ọ̀ yị vịdị há tù, ọ raà sị zụ̀ mị saka-saka. Mâ vịdị raà chẹrẹ ịsa chee ini oze ịsa ẹnẹẹ.

⁴ Wàa kà ịsa ọnị mị chẹrẹ nịnị, u vee ree nịnị ka ịrẹyị Ikirisiti ene eyi ọza ọ̀ yị vịdị há tù, ma kụkụ va sị avaba anị yẹ.

⁵ Ịyẹẹyẹ, Ohomorihi ọyị vịdị sị ịrẹyị ẹnẹẹ zụ̀ aza. Ama booro aanị, Ohomorihi ọ raà mẹ ka Ụhwẹ Ọnịnị ọ̀ sị zụ̀ odeyi ọnịnị ọnịrị ọnịsẹ anị nịnị.

⁶ Ịrẹyị ọnọọ yị: ka Anigiriki, ẹnịrị Aniju vee duduu nyị tụ́ ịnị ịsa oni Ohomorihi sị kà ka ọnị vaa sịị yị aza anị ẹnẹ ẹnịrị Ijeesu Ikirisiti sị vị ọnya. Ini oze enube ọyịza, Aniju ọnịrị Anigiriki kụkụ sị vị ọnya nị.

⁷ Ohomorihi óo nyị mị iyi, ka maa kà enube ọyịza ọnọọ yị aza. Ộ sị ụkata anị mẹ̀ ụkọrọ ịnị ayị amị, dị ọ sị udi ọnọọ chire mi ụvọ nị.

⁸ Àa ka à na kà ịrẹyị aza Ohomorihi, ẹmị vị awụhwẹ ị́rẹsụ ẹnya. Ama Ohomorihi ọ sị sị ụbanyị yị ẹngụ anị, dị ọ sị oze yị mị ka ma kà enube ọyịza yị anẹhẹ nị. Ẹ yị nyị ọza ene zụ sì iruvo, dị ọ̀ yẹ ụbanyị ịsa oni Ikirisitiī sịị yị ọza.

⁹ Ohomorihi ọ rẹ mẹ mị ka ma sị zụ̀ aza, dị è re e Óhomorihi mẹmẹ aa mẹ̀ ịsa ọnị ọ vịdị mẹ eto anị tịtẹ. Hụrị ụmọrụmọ dị a va yẹ ka aa mẹ ẹhẹ, Óhomorihi ana mẹ avaba ịsa hụrẹ sị ịsa ọnọọ tẹ nị.

¹⁰ Ộ vavọọ mẹ, agụvị ọyaanị Ohomorihi ọ̀ sị anịragụ anị mẹ ka anggẹẹrị irenyi-irenyi ana nyị ụkata hi ẹbẹẹba ẹ̀ zụ yẹ ịrẹyọyẹ oni Ohomorihi nyị ini oze irenyi-renyi.

¹¹ Hụrị ụmọrụmọ Óhomorihi hụrẹ mẹ eto ịsa ẹnẹẹ nị, ana ahịka ọ va mẹ ini oze ụvọ Ijeesu Ikirisiti Ananyị yị.

¹² Agụvị ka ẹyịrị ọ ọ sị vị ọnya, dị ị rẹ sị ayị tụra a nị, ya kụkụ nyị ọtụtụrụma, ye re re oze kà pe Ohomorihi. Ẹ yị nyị ịsị ee chire yi angwa.

¹³ Aarịhịnị, asị ụ na zẹẹ ka ayị awụ nịnị ọ̀ vazi agụvị ụya ọnị maa rịị yị wụ nịnị! Avaba anị vị ọgụ yị wụ nịnị.

Oyisi ọnị Ikirisiti nyị yị yị

¹⁴ Agụvị avọọ, mê ku ẹtẹ yị Ohomorihi Ada ayị.

¹⁵ Ịrẹha anị avaba aneehi ẹhẹ ọnọnị ọnịrị ẹbẹẹba aa rị nị.

¹⁶ Maa mẹ̀ aduwa ka Ohomorihi ana nyị ụbanyị ẹtẹẹtẹrẹ ọ̀ navọ Ụhwẹ Ọnịnị anị ọ̀ sị ụkata wụ nịnị, dị ayị awụ nịnị ọ̀ nyị ụkata.

¹⁷ Mị raa mẹ̀ aduwa ka Ikirisiti ọ̀ yà ịnị ayị awụ nịnị, ụ màa sị ayịị tụraa nịnị. Ọ̀ navọ wee sì ịrẹyị aza nịnị, ana zụ mẹ ka wa jẹẹ geri-geri nịnị,

¹⁸ agụvị dị ẹwụ nịnị beri avaba aza Ohomorihi ana vọ, ọ̀ zụ yẹ ịzị Ikirisiti sì ịrẹyị awụ nịnị ne tù. Ịrẹyị ayị oni o sì ọ́ọ nyịnẹ, ọ́ọ gọdọ, ọ́ọ gana, dị ọ rẹ nẹba ẹtẹẹtẹrẹ nị.

¹⁹ Máa yẹ ka ọza ọ yị zụ yẹ ta, ịzị Ikirisiti sì ịrẹyị ayị na za. Ama ọ̀ yị navọ wa zụ yẹ nịnị ịzị Ikirisiti sì ịrẹyị awụ nịnị ne tù, agụvị dị avaba ịsa ozoza ana vị Óohomorihi, ọ̀ rẹ zụ gụ tụ́ ịnị avaba ayị awụ nịnị.

²⁰ Ohomorihi ọ zụ mẹẹ yị huna ọpa oni i họ̀ use, à vị ọnị ị hyakụ ee ro, ini oze ụkata ana aa sịị mẹ̀ ụkọrọ ịnị ayị ayị.

²¹ À vẹ yaa sị ụgaa yị Ohomorihi ịnị ịragụ anị ọnịrị ini oze Ijeesu Ikirisiti pooro zịna-zịna! Aamị.