Anẹhwẹsọsị 1 - IWE ỌNỊNỊ

Ụkụ

¹ Ẹmị Ịpọọrụ oni Ohomorihi nyị ka ọ̀ vị odeyi Ijeesu Ikirisiti, ọ chẹrẹ iwe ọnọnị tụ́ hi aza Ohomorihi ene hi Ẹhwẹsọsị nị, aza ana ahịka ẹ́ẹ sị ayị tụra Ijeesu Ikirisiti, dị ẹnịrị ọ sị vị ọnya.

² Ohomorihi Ada ayị ọnịrị Ijeesu Ikirisiti Ananyị yị ẹ̀ mẹ ọyịza yị wụ nịnị, dị ẹ̀ rẹ sị ẹngwọọrọ yị wụ nịnị.

Ịsa Ohomorihi oni Ikirisiti sị yị aza anị

³ À vẹ ya sị ụga yị Ohomorihi Ijeesu Ikirisiti Ananyị yị, ọnị ọ rẹ vị Ada anị nị. Ohomorihi ọ raà mẹ̀ ịsa ọyịza yị ẹyị ẹnẹ ẹyịrị Ijeesu sị vị ọnya. Ohomorihi ọ raà sị avaba ịsa ozoza anị ana yà ẹbẹẹba ịdị anịị yị.

⁴ Hụrị ụmọrụmọ dị a va yẹ ka aa mẹ ẹhẹ, Ohomorihi hụrẹ nyị yị agụvị Ikirisiti ka ya mẹ̀ ebira ọnịnị, dị asị ị nyị ohuvọ ini eyi anị, di yee sì ịrẹyị aza nị.

⁵ Ohomorihi ộ vịdị sị eto anị mẹ ka ini oze Ijeesu Ikirisiti ọnị vaa sị ẹyịị mẹ ezi anị. Ịsa ene zé e eyi, dị ọ yẹ ịnị ayị anị ka óo zoza ka ọnị ọ̀ mẹ ọ vị ọnọọ nị.

⁶ À vẹ yaa ga Ohomorihi, agụvị ka ayamva anị ọ́ọ nyị ụbanyị ẹtẹẹtẹrẹ, ọnị ọ vị ka ộ vayị ayị ini oze Ozi anị oni o sì ịrẹyị anị ẹtẹẹtẹrẹ.

⁷ Ozi anị ọnọọ ô che anya anị sẹ́ ẹtẹ, di o sú yị ịvị ayị nị. Agụvị ayamva Ohomorihi ana ahịka ọ́ọ banyị ẹtẹẹtẹrẹ, ọ vavọọ sị yà nị.

⁸ Ohomorihi vị ana nyayịnẹ mẹ ọyịza yị ẹtẹẹtẹrẹ. Ộ rẹ sị ịrẹyọyẹ obooro yị.

⁹ Ọ raà sị zụ̀ yị saka-saka, ịsị ọnị ọ vịdị sị eto anị mẹ ka ọnị vaa zị oze ịnị ụvọ Ikirisitii mẹ; eyi ayị ẹ yị vịdị há tù ịsa ẹnẹẹ.

¹⁰ Ịsa oni Ohomorihi mẹ eto anị ka ọnị vaa mẹ ịjị ụmẹ òo si tù ọ vị ka, ọnị vaa kụ́ avaba ịsa ene hi ẹbẹẹba ọnịrị ẹhẹẹ gụ tụ́ ịdị Ikirisiti nị. Dị ahịka Ikirisiti ọ vị ka Ikirisiti ọ vị ohirẹsụ avaba ẹnịnị nị.

¹¹ Avaba ịsa vị ana vaa mẹ anka Ohomorihi mẹ̀ mẹ eto anị tịtẹ. Agụvị Ijeesu, Ohomorihi ọ sị yị nyị ka ya vị aza anị, agụvị ka avọọ o mè sì ọ nị. Ộ vịdị mẹ eto anị tịtẹ ka

¹² ẹyị ana ahịka ẹya vịdị aa tụra Ikirisiti eyi aanị nị, ya ga ụbanyị Ohomorihi.

¹³ Avọọ ọ mẹ̀ rẹ yà yị ẹwụ nịnị nị. Ụ mẹ̀ wụ́ enube ọyịza ana vị ịzẹyịza ana mẹ ka Ohomorihi ọ̀ dọ wụ nịnị há, wá sị ayị tụra Ikirisiti nịnị. Ẹwụ nịnị ọnị ọnịrị Ikirisiti sị vị ọnya, Ohomorihi ộ sị apọtẹrẹwa tụ́ wụ nịnị ẹngụ ka ọnị ọ nyị wụ nịnị nị. Ụhwẹ Ọnịnị ọnị ọ kà a ka ẹ yị zụ nyị ka ọnị ọ yị vaa sịị wụ ọ jẹẹ yị apọtẹrẹwa ọnọọ nị.

¹⁴ Ụhwẹ Ọnịnị ọnọọ ọ́ọ sị zụ ka ị vaa dọ ẹyịza ana vọ oni Ohomorihi kà a ka ẹ yị zụ nyị ka ọnị ọ yị vaa sịị yị aza anị. Ọ rẹ mẹ ka ya yẹ ka Ohomorihi vaa hị́ aza anịị varẹma saka-saka. Agụvị avọọ à vẹ yaa ga ụbanyị anị.

Aduwa ọnị Ịpọọrụ mẹ̀

¹⁵ Agụvị avọọ, ẹ́mị ụvọta mẹ̀ hụrẹ wụ́, ụ mẹmẹ aa sị ayịị tụra Ijeesu Ananyị yị nịnị, di u ree sì ịrẹyị avaba aza Ohomorihi nịnị,

¹⁶ mị hụrẹ aa kụ́ Ohomorihi avọọ agụvị awụ nịnị nị. Maa tamayị awụ nịnị ini aduwa amị.

¹⁷ Maa mẹ̀ aduwa ka Ohomorihi Ijeesu Ikirisiti Ananyị yị ana nyị avaba ụbanyị ọ̀ sị Ụhwẹ Ọnịnị anaā mẹ ka ọza ọ̀ yẹ ịrẹyịị wụ nịnị; dị ọ̀ sị Ohomorihi zụ̀ wụ nịnị, dị ụ wa zụ yẹ ẹ nịnị.

¹⁸ Mị raa mẹ̀ aduwa ka Ohomorihi ọ̀ há ayị awụ nịnị hi ẹtẹ, di eyi awụ nịnị ò zụ hweyi tù ịsị ụ waa tụra eyi anị nịnị, ọ mẹ̀ hị́ wụ nịnị. Mị raa mẹ̀ aduwa ka wa yẹ nịnị ka ẹyịza oni Ohomorihi ka ọnị vaa sịị yị aza anị ọ́ọ nyị ụbanyị ẹtẹẹtẹrẹ.

¹⁹ Ohomorihi ọ̀ navọ wa rẹ yẹ nịnị ụkata ọnị ọ sịị mẹ̀ ụkọrọ ịnị ẹngụ ẹyị ana sị ayị tụra a, ana hi ka ọza ọ yị zụ kà.

²⁰ Ụkata ọbanyị ana aa sịị mẹ̀ ụkọrọ ịnị ẹngụ ayị ọnịrị ụkata ọbanyị ọnị ọ sị há Ikirisiti hụụnị isu vị ọnyọọnya. Ụkata ọnọọ ọ rẹ sị sị Ikirisiti na yaayịtẹ éyi ụvọrị anị ẹ́bẹẹba nị.

²¹ Ikirisiti ọ kụkụ nyị ẹbẹẹba avaba anggẹẹrị ọnụkata nị, ọnịrị avaba aza ana nyị ọda ọnịrị ụkata beri ohinọyị nịnị nị. Ọnị ọ nyị ẹbẹẹba ịsa tụra ịsa ọnị ọza ọ̀ọ hị́ ẹngụ anị ịnị ẹhẹ ọnọnị ọnịrị ịnị ẹhẹ ana aa vẹ nị.

²² Ohomorihi ọ raà kụ́ avaba ịsa ve hi agada Ijeesu ka ọ̀ vị ohirẹsụ ẹnịnị. Ọ rẹ mẹ ka Ikirisiti ana nyị avaba ịsa ọ̀ vị ohirẹsụ anịragụ anị bẹẹ.

²³ Anịragụ Ohomorihi ọ vị ẹngụ Ikirisiti nị. Ịnị anịragụ, ị́sa Ikirisiti gụ tụ́ nị. Ikirisiti ọ mẹ ka avaba ịsa ẹ̀ gụ ini oze tura oze nị.