Ahẹ Ụgama 97 - IWE ỌNỊNỊ

Ohomorihi o hu keekere nị

¹ Ẹnẹyịmavara ọ vị ohinọyị nị, agụvị avọọ avaba anẹhẹ ẹ̀ẹ jẹ ịrajẹ.

² Eguhi dụmẹ-dụmẹ vị ana kara Ẹnẹyịmavara, ohinọyị anị vị ana aa sị ịzẹyịzaa mẹ, ọ mā mẹ apẹ.

³ Ịra vị ana maanị yà ọvịdị anị, dị aa rị avaba ọnịvị anị ana kara a.

⁴ Etohweyi anị ọ mẹ ka ẹhẹ ò hweyi nị, anẹhẹ mè re e, angwa ô hi wa, ẹ yaa dá ẹgahị nị.

⁵ Ẹnẹyịmavara ana nyị avaba ẹhẹ mẹ̀ jẹẹ, ataba nịnị vị ana maanị nā anka ụsụ avọọ.

⁶ Ihinẹba aa sịị zụ̀ ka Ẹnẹyịmavara vị anaā mẹ ịzẹyịza, avaba aza ee re ụbanyị anị.

⁷ Avaba ọza ana aa hẹkẹ ori di e yee sii wo oto vị ọnị ụhị va nyị. Avaba ẹwụ nịnị ori òo kú ẹtẹẹ kụ́ Ẹnẹyịmavara.

⁸ Ẹnẹyịmavara, Anịzayọnị ọnịrị Anijuda mẹ̀ wụ́ụ mẹ̀ mẹ aa mẹ̀ ọkarẹyị, ẹnịnị vi ana aa jẹ.

⁹ Ẹnẹyịmavara ẹwa vị Ohomorihi ana nẹba hu keekere ịnị avaba ẹhẹ nị. Ẹwa nyị ụbanyị huna avaba ori nịnị ẹtẹẹtẹrẹ nị.

¹⁰ Aza ana àa ka ẹnị ê sì ịrẹyị Ẹnẹyịmavara ộ vọrọ ka ẹ̀ẹ nyị ịhyẹrẹ ịsa odivi. Ẹnẹyịmavara vi ene eē sere aza anị ana nyị ịzẹyịza ka asị ịsa odivi mẹ wa.

¹¹ Aza ana mẹ ịzẹyịza dị ẹ nyị ayị ọnya vee re ẹtohweyi, dị ẹ yaa jẹ.

¹² Ẹwụ nịnị ana nyị ịzẹyịza, tamayị ịsị Ẹnẹyịmavara mẹ dị waa jẹ nịnị, dị wa rẹẹ kụ́ ọ avọ nịnị.