Ahẹ Ụgama 96 - IWE ỌNỊNỊ

Ohomorihi ọ vị ohinọyị ene hu keekere nị

¹ Waā jị ahẹ ọwọọwaa gono Ẹnẹyịmavara nịnị, mị ka avaba ẹwụ nịnị anẹhẹ ọ̀ọ jị ahẹ gono Ẹnẹyịmavara.

² Waa jị ahẹ gono Ẹnẹyịmavara, dị waa kụ́ ọ avọ nịnị. Waa kà a nịnị eyinị-eyinị ka ọnị ọọ̄ dọ ọzaa ha nị.

³ Wàa yà ịnị akakana anẹhẹ waa kà ịrẹyị ụbanyị anị nịnị ọnịrị ịta mā ta pa ọnị ọọ̄ mẹ.

⁴ Ẹnẹyịmavara ộ banyị, ọnị a vọrọ ka àa kụ́ avọ nị. Ọnị a vọrọ ka aza ẹ̀ẹ sị ụbanyịị yị huna avaba ori nị.

⁵ Avaba ori anẹkụra nịnị vị ọchị kẹnẹ ana bẹ, ama Ẹnẹyịmavara ọ mẹ ẹbẹẹba nị.

⁶ Ẹnẹyịmavara vị ana nyayịnẹ nyị ụbanyị, avọọ ọ mẹ rẹ nyị ụbanyị ọnịrị ụkata ini irehi anị nị.

⁷ Ẹwụ nịnị aza, waa sị ụbanyịị yị Ẹnẹyịmavara, dị waa kà a ọ mẹmẹ nyị ụkata nịnị.

⁸ Waa sị ụbanyị ana vọrọ tụra Ẹnẹyịmavara yọ nịnị. Sị ịsa va mẹ̀ ẹ ẹyịza ini ohweje anị nịnị.

⁹ Tana tụra ẹtẹ dị waa kụ́ Ẹnẹyịmavara nịnị anka ọ mẹmẹ nyị ụbanyị Ẹwụ nịnị avaba anẹhẹ òo hí angwa anị ẹtẹẹtẹrẹ.

¹⁰ Waa kà a yị aza nịnị ka Ẹnẹyịmavara ọ vị ohinọyị nị. Ọ raà sị ẹhẹ jẹẹ nganganga, o yi zụ henyi Àa mẹ̀ ọkarẹyị aza, ọ yị vaa mẹ eyida.

¹¹ Ẹwụ nịnị ẹbẹẹba ọnịrị ẹtẹ ọ̀ọ jẹ. Òkū ọnịrị avaba ịsa ene hi ịnị anị èe nowu ịrajẹ.

¹² Ụnọmị ọnịrị avaba ịsị e hi ịnị ẹ̀ẹ mẹrị dị avaba ọchị ene hi ini iriku ẹnị ẹ̀ rẹ ẹ jị ahẹ ịrajẹ.

¹³ Ẹnịnị vavọọ vaa jị ahẹ kụ́ Ẹnẹyịmavara, agụvị ka aa vẹ dị ọ̀va mẹ̀ ọkarẹyị anẹhẹ. Ịzẹyịza ọ vaa sị mẹ̀ ọkarẹyị ana vọrọọ yị anẹhẹ ọnịrị aza nịnị.