Ahẹ Ụgama 91 - IWE ỌNỊNỊ

Ịda Ohomorihi ị tẹ tụ́ nị

¹ Ọza ana aa sị ẹngụ anị na tẹ̀ ịda Ohomorihi ana nẹba hu keekere ẹnị Ananyị yị vaa jị òkúu kú, dị ẹ yaa tụ́ ụhwọ nị.

² Ẹnị ẹẹ̄ kà a ka Ẹnẹyịmavara, ịda awụ mị tẹ dị à yị nyị ịsị ẹ zụ mẹ mị nị. Ohomorihi amị, mị vaa sị ayị tụra wụ

³ Ohomorihi ọ yị vaa zẹẹ ka aza ene ee bè wu ẹ̀ zụ za wụ. Ọ yị rẹ va zẹẹ ka ụkụ edivi anaā wụ̀ ọza ọ̀ kanyị wụ.

⁴ Ohomorihi vị ana vaa sị avaka anịị kụ́ wu, ẹ yị nyị ịsị ẹ zụ va mẹ wụ ịzọọ. Ịzẹyịza Ohomorihi vee sere wu dị aa dọ wụ ụ tụ́.

⁵ We yi vee hí angwa ịsa edivi ana aa zị ịrahụ ọnịrị ịsa asigiri anaā mẹ ọọdụ.

⁶ We yi re ve hí angwa ụkụ anaā ngụụ tụ̀ ọza ịrahụ ọnịrị ụkụ edivi anaā wụ̀ azaa ha ụmẹ ọọdụ.

⁷ Wa nyẹngụ ee re aza otomiroku mèe su vaa hi ẹtẹ eyi ụvọ ọnyị ọsa, ama ẹ yị nyị ịsị aa kanyị ẹwụ.

⁸ Ẹwụ vị ana vaa sị eyii re e kẹnẹ ịjị aza edivi àaa rị ụya.

⁹ Wa raà na tẹ̀ ịda Ohomorihi ọgọdọgọdọ ọnị ụvọ ọza è yi mè tù mị ka ịda ọnị Ẹnẹyịmavara ẹnẹ ẹ̀ yị zẹẹ ka à nyị ịsị ẹ kanyị mị ụ na tẹ̀ nị,

¹⁰ agụvị avọọ ẹ yị nyị ịsa odivi ene vee tù wụ, mị ka ẹ yị nyị ịrẹyị odivi ana vaa gụrị ịzị ụ yà.

¹¹ Ohomorihi vaa hụ ụvị awụ kà a yị anggẹẹrị anị, di e yee sere wu aha tụra aha ọnị wàa nọ.

¹² Ẹnịnị vị ana vaa sị wụụ rị ụvọ agụvị asị ụ na tụ́ ahụ hi ịrẹta.

¹³ Ụ maanị vaa kụ́ ahụ hi iku irenyi-irenyi ọnịrị ẹwụ edivi irenyi-irenyi, dị waa na haara kẹnẹ.

¹⁴ Ẹnẹyịmavara kà ọnị vee sere wụ dị ọnị aa dọ wụụ tụ́ agụvị ka wê sì ịrẹyị anị, dị ụ rẹ yẹ ka ọnị ọ vị Ohomorihi nị.

¹⁵ Ohomorihi ka aza ana vavọọ sị ayị tụra ọnị ẹ̀ẹ hị́ ọnị, ọnị vee tụ́ wa ohi. Ọ kà èe hi ịnị ẹngụkata ọnị ọ yị vaa hụrẹ wa ụvọ, ama ọnị vaa dọ waa tụ́, dị ọnị sị ụbanyị yị wa.

¹⁶ Ọ rẹ ka ọnị vaa sị ụhwẹ ọgọdọọ yị wa, dị ọnị dọ wa tụ́.