Ahẹ Ụgama 9 - IWE ỌNỊNỊ

Ahẹ ana a jị gono Ohomorihi ka ộ nyị ịzẹyịza (Ahẹ Idevidi ana yà ịnị ụvọ ọga ọjahẹ)

¹ Ẹnẹyịmavara, avaba ayị amị m maa sịị kụ́ wụ avọ nị; mi vaa kà zụ̀ aza avaba ụkọrọ ẹbanyị-ẹbanyị ọnị ụ mẹ.

² Ẹwụ Ohomorihi Ochẹtẹẹngụ, mi vaa jẹ ịrajẹ agụvị awụ. Dị maa jị ahẹ gono wu.

³ Ọnịvị amị mè re wu e si zwe varẹma. E mèe zwe, dị ẹ yaa hyẹdụ di e yee sú nị.

⁴ Ịzẹyịza ụ waa sịị mẹ̀ ọkarẹyị nị; wa mā mẹ eyi ịdị wa raà kà a ka mẹ yị rị ịvị.

⁵ Wa raà jị ịvị yị anẹkụra ẹnẹ ẹ̀ yị yẹ Ohomorihi. Dị ụ za aza edivi dị ụ wụ̀ wa va ha nị. Wâ mẹ ka asị a kụkụ wụ́ ịrẹha ẹnịnị pooro zịna-zịna.

⁶ Ọnịvị ayị ẹ si vú ẹtẹ pooro paa ịnị ẹhẹ. Wa sị ẹkụra ẹnịnị jị eburu. Ayị ẹnịnị ô hi saka-saka.

⁷ Ama Ẹnẹyịmavara ọnị vị Ohinọyị pooro zịna-zịna nị. O reè tenyi ịzị ọ vaa yà dị ọ̀ọ mẹ̀ ọkarẹyị.

⁸ Ịzẹyịza ọ vaa sị mẹ̀ ọkarẹyị anẹhẹ nị. Ịzẹyịza ọ rẹ vaa sị mẹ ịjọvaa tụra wa nị.

⁹ Àa mẹ ehunaa yị ọza, di o zwe na vaka Ẹnẹyịmavara nị, ẹ yị nyị ịsị ẹ kụkụ zụ kanyị ọza ọnọọ. Ịrẹyị òo tù ọza di o zwe nọ ịda Ẹnẹyịmavara nị nyị ịsị ẹ kụkụ zụ na kanyị ọza ọnọọ vụrụ-vụrụ.

¹⁰ Ẹnẹyịmavara, aza ana yẹ wụ vị ana vaa sị ayịị tụra wụ. Â yị nyị ọza ana vẹ ịda awụ da, ọnị ụ dụ varẹma.

¹¹ Waā jị ahẹ gono Ẹnẹyịmavara nịnị. Ọnị ọ vị ohinọyị tụ́ nị. Waā kà a yị avaba aza nịnị ịsa ọnị ọ mẹ.

¹² Ọza ọ̀ọ wụ̀ ọza, Ohomorihi ọọ̄ họ̀ ọ oponu nị. Ayị o mē hí ọ Àaa chamayịị yị ọza dị ọza ọnọọ nowu na za Ohomorihi nị. Ohomorihi vị ana aa ba ọza ọnọọ owu.

¹³ Ẹnẹyịmavara, wéē re ọnịvị amị màa sị ụyaa rị mị! Navọ wa vayị amị asị ụ zẹẹ ka me sú!

¹⁴ Wẹ̀ yị zẹẹ ka me sú, mị va zụụ jẹẹ Ịzayọnị ịnị akakana aza awụ dị maa gā wụ Dị mị ya ịzọọ dị maa jẹ agụvị ka wa raà dọ mị tụ́.

¹⁵ Aza ẹnẹ ẹ̀ yị yẹ wụ mẹ̀ na hụ ụvị ọza chị ụsị dị ahịka ẹnị ẹ rẹ horo ngụ ọ nị. Ịrẹpa ẹnị ẹ̀ và zi ọza gẹdẹ-gẹdẹ ọ rẹ vara eyi za wa ahụ nị.

¹⁶ Aza ệ yẹ ka Ẹnẹyịmavara vị ana aā mẹ ịzẹyịza. Ịsa ana aza edivi aa sị ụvọ ẹnịnị mẹ ọ rẹ vara eyi za wa nị.

¹⁷ Avaba aza edivi ene hi ayị Ohomorihi vi ene vee súu vaa ha.

¹⁸ Ama Ohomorihi o yi vee hí ayị oniruwa ẹnịnị mẹ̀ sị ayị tụra Ohomorihi ẹ yẹ ka ẹẹnịnị ọ yị vaa vị osusu.

¹⁹ Ẹnẹyịmavara navọ wa kwẹẹtẹ! Asị ụ zẹẹ ka aza ẹ̀ kà a ka ẹnị e huna wụ nị. Kụ́ aza ẹnẹ ẹ̀ yị yẹ wụ vẹ ịda awụ dị wa mẹ̀ ọkarẹyị yị wa.

²⁰ Ẹnẹyịmavara, navọ we chire wa angwa dị ẹ̀ yẹ ka aza rị ẹyị ịrẹsụ kẹnẹ ẹnị vị nị.