Ahẹ Ụgama 81 - IWE ỌNỊNỊ

Ahẹ ana a jị ịnị ụmẹ eche (Ahẹ Asahwi ana yà ịnị ụvọ ọjahẹ, Ahẹ Anigati).

¹ Waā sị ịnẹ ohinee jị ahẹ gono Ohomorihi ka ọnị aa sị ụkataa yị nị. Mị ka wa jị ahẹ boro-boro gono Ohomorihi oni Ijekọvụ hẹkẹ.

² Weē hú ịsa nịnị, dị ọkangga irenyi-irenyi ọ̀ọ sụ́, di weē hú agidibò irenyi-irenyi ene hine nịnị.

³ Sị ọpanyị ịdẹba di wee hú ọ nịnị ịnị eche ụhwẹ ọwọọwa ọnịrị ini eche ana aā rị ụhwẹ ọ̀ọ sị hụrẹ.

⁴ Ohomorihi oni Ijekọvụ hẹkẹ ọ mẹ ọda ọnọnị yị Anisirẹrị nị. Ọnị ọ kà a ka à vavọọ mẹ̀ ẹ pooro nị.

⁵ Ịrẹyị ọnọnị vị oni Ohomorihi jị ido anị yị Anisirẹrị ẹ́nịnị mẹ̀ na dụ Anijipiti. Yaa wụ́ ka ẹnịnị aa kà ẹkụra ọnị yẹ̀ yị yẹ.

⁶ Ohomorihi ka oni o reè chi ẹnya ụya hụrẹ wụ nịnị ịza, dị ọnị mẹ ka asị a rẹ kụkụ za wụ nịnị chema uji zị nị.

⁷ Ohomorihi ka ụ maà rị ụya, di u nowu va za ọnịnị nị, ọnị ộ ba wụ nịnị owu. Ọ kà ọnị yà ịzị opomi yà aa tụ́, dị ọnị tụ́ wụ nịnị ohi nị. Ọ rẹ ka ọnị ộ zama wụ nịnị re ini okuha Imeriba.

⁸ Ohomorihi rẹ ka Ẹwụ nịnị Anisirẹrị, batọ nịnị. Wàa sị ụtọ pè ịrẹyị amị nịnị, mị vaa kà wụ nịnị ọ̀nọ̀.

⁹ Asị a na nyị ori ọnyị-ọnyị ọnị ụ dọ pè ẹngụ nịnị o! wẹ yị nyayịnẹ ne kú ẹtẹ kụ́ ori ọnyị-ọnyị.

¹⁰ Ohomorihi rẹ ka ọnị ọ vị Ẹnẹyịmavara ana vị Ohomorihi awụ nịnị nị. Ọ kà ọnị ọ sị wụ nịnị hụrẹ Ijipiti vẹ nị. Ọ rẹ ka wa há irenu nịnị kẹnẹ, ka ọnị vaa sị ịsa awụ nịnị.

¹¹ Di Ohomorihi rẹ ka Ama aza amị ẹ yị zẹẹ ka ẹnị ẹ̀ wụ́ ịrẹyị amị, ẹnịnị ẹ yị zẹẹ ka ẹnị ẹ̀ dọ mị tụ́ ịzọọ.

¹² Avọọ dị mị hụrẹ wa ụvọ ka ebira odivi ẹnị ẹ̀ẹ ka ẹnị aa mẹ, ẹ̀ẹ mẹ̀ ẹ nị.

¹³ Àa vị ka Anisirẹrị aza amị yaanị zẹẹ ka ẹnị ẹ̀ wụ́ ịrẹyị amị,

¹⁴ o sị ku ọnị mị yaanị hú ọnịvị ẹnịnị ẹtẹ yị wa. Avaba ọnịvị ẹnịnị yaanị kụ́ hyẹdụ da.

¹⁵ Ohomorihi rẹ ka aza ana ka ẹnị e yi sì ịrẹyị ọnị Ẹnẹyịmavara, vị ana maanị vaa sị eyi kwọrọ ẹtẹ ọvịdị anị ángwa òó mèe hi wa. Ọ kà vị ẹnịnị vaa rị ụya pooro zịna-zịna nị.

¹⁶ Ohomorihi ka ama ọnị vaa sị ịsọyịrị ene zoza hu anaaa hị́ ihwiti dị ọnị sị yị ẹwụ. Dị ahịka ẹhụ ịnị akakana ịda ọnị sị wụ ka wa rị ọ nị.