Ahẹ Ụgama 80 - IWE ỌNỊNỊ

(Ahẹ ivenu ana Asahwi jị ana yà ịnị ụvọ ọga ọjahẹ Ọngwẹ anị vị ọngwẹ ahẹ ododo).

¹ Ẹwụ ana aa tẹsị Anisirẹrị anka ọza ene ee sere ịsụpa mẹ̀ẹ tẹsị ịsụpa anị avọọ, navọ wa wụ́ ịpẹ ọnị yaa dá.

² Ẹwaa sị oze zụ̀ ezi Ijosẹẹhụ nọ. Ẹwụ vị ana yà ịnị akakana icherubi nịnị. Navọ wa sị ụkata awụ zụ̀ Ehwireemi, Ịbẹnjamịnị ọnịrị Ịmanasẹ. Wâ nyị ụkata ẹtẹẹtẹrẹ, navọ wa kwẹẹtẹ dị wa sị ụkata awụ dọ yị tụ́.

³ Ohomorihi, navọ wa và yị vẹ udi ayị ịyẹẹyẹ, Navọ wa vayị ayị dị ya zụ há.

⁴ Ẹnẹyịmavara, Ohomorihi Ochẹtẹẹngụ, ụ kụkụ aa kụ́ ayị pooro kẹnẹ nị, wẹ yị kụkụ wụ́ ịpẹẹ?

⁵ Wâ mẹ ka ya ká ụya mụnẹ, yê sụ ùnè pooro, o kú du yi eyi.

⁶ Anokokooro ayị ee sụ ùnè ẹtẹ ayị, ọnịvị ayị nịnị kụkụ aa kụ̀ yị ụhụ.

⁷ Ohomorihi Ochẹtẹẹngụ, navọ wa vayị ayị dị ya zụ há.

⁸ Wâ kụ́ yị hụrẹ Ijipiti vẹ anka ọchị ịvayịnị avọọ. Dị ụ dụ anẹkụra ọsa hụụ ịzọọ, dị ụ sị yị tụ́ ịzọọ anka a mẹ̀ẹ hụ́ ọchị ịvayịnịị tụ́ aha avọọ nị.

⁹ Dị u tenyi ẹtẹ kara yị, dị yaa nyị ahụụ hị́ ẹtẹ, dị yaa yara, dị ị kụkụ dọ avaba ẹtẹ ọnọọ nị.

¹⁰ Dị ị sị mẹẹ anka ọchị oni ihuhu anị kú ataba nịnị, dị avọ anị hyakụ si huna ọchị ẹbanyị-ẹbanyị ene hi ịzọọ nị.

¹¹ Ya sị mẹẹ ọchị ọnọọ ana ha avọ nọ ngụ ini Òkū Imeditareniya, dị ẹpa anị na huu na ngụ ini Okuha Iyuhwireti.

¹² Àa yẹ déè, asị ụ chaka ọvọ ana kara a, aza ana aa parahu vị ana kụkụ aa ha ẹtụtụ anị kẹnẹ.

¹³ Uye ịnị avị irenyi-irenyi vị ana kụkụ aa rị ọ kẹnẹ.

¹⁴ Ohomorihi Ochẹtẹẹngụ, navọ wa và kà yị vẹ. Navọ wa kana eyi hụrẹ ẹbẹẹba di we re, navọ wa sị eyi pè ọchị ịvayịnị ọnọnị.

¹⁵ Wéē re ọchị ẹnị ẹwụ ụvọta sị ụkata awụ chire, mị ka we re ozi ẹnị ẹwụ ụvọta sị mẹ ozi ewu.

¹⁶ A kụ́ ọchị ịvayịnị awụ ma, a sị ọ rị ịra, ụ màa kụ́ ayịị hi aza awụ, ẹnịnị e si vú ẹtẹ.

¹⁷ Navọ aza ọnị ụ sị nyị yị ẹngụ awụ, we sere wa, dị wa sị wa tẹ.

¹⁸ Wàa vavọọ mẹ, yẹ yị vaa hụụ ịda awụ. Navọ wa hā yị vavẹ, ka ị vaa kụ́ wụ avọ.

¹⁹ Ẹnẹyịmavara, Ohomorihi Ochẹtẹẹngụ, navọ wa và yị vẹ udi ayị ịyẹẹyẹ. Navọ wa vayị ayị dị ya zụ ha.